ប្រាសាទអង្គរវត្ត ជាប់ចំណាត់ថ្នាក់កំពូល ជាគោលដៅទេសចរណ៍ទាក់ទាញបំផុតនៅអាស៊ីសម្រាប់ឆ្នាំ២០២៥

“ប្រាសាទអង្គរវត្ត” ដែលជាសម្បត្តិបេតិកភណ្ឌជាតិ និងជានិមិត្តរូបនៃព្រះរាជាណាចក្រកម្ពុជាបានទទួលជាប់ចំណាត់ថ្នាក់លេខ១ ក្លាយជាគោលដៅទាក់ទាញទេសចរណ៍ល្អបំផុតនៅអាស៊ី ពីកម្មវិធីពានរង្វាន់ Traveler Choice Awards របស់ TripAdvisor ដែលជាគេហទំព័រផ្សព្វផ្សាយពី គោលដៅទេសចរណ៍នៅទូទាំងពិភពលោក សម្រាប់ឆ្នាំ២០២៥ ដោយឈរនៅលើ មហាកំផែងរបស់ប្រទេសចិន និងប្រាសាទ Taj Mahal របស់ប្រទេសឥណ្ឌា។ នេះបើតាមគេហទំព័រទេសចរណ៍ដ៏ល្បីល្បាញ Tripadvisor ចេញផ្សាយកាលពីពេលថ្មីៗនេះ។

គេហទំព័រ Tripadvisor បានគូសបញ្ជាក់៖ “ប្រាសាទអង្គរវត្ត គឺជាអច្ឆរិយៈរបស់ពិភពលោក ហើយមិនពិបាកក្នុងការស្វែងរកមូលហេតុនោះទេ ដែលប្រាសាទនេះជាប់ចំណាត់ថ្នាក់កំពូល។ សូមទៅទស្សនាបេតិកភណ្ឌពិភពលោករបស់អង្គការយូណេស្កូមួយនេះ នោះអ្នកនឹងស្ញប់ស្ញែងស្ថាបត្យកម្ម និងចម្លាក់ដ៏អស្ចារ្យរបស់ប្រាសាទអង្គរវត្ត”។

ភ្ញៀវទេសចរនានាក៏បានបញ្ចេញមតិកោតសរសើរ បន្ទាប់ពីបានទស្សនាប្រាសាទអង្គរវត្តផងដែរ ដោយភ្ញៀវទេសចរអន្តរជាតិម្នាក់បានសរសេរថា៖ “ការទៅទស្សនាប្រាសាទអង្គរវត្ត គឺជាបទពិសោធន៍ដ៏អស្ចារ្យមួយដែលមិនអាចបំភ្លេចបាន។ ប្រាសាទនេះ គឺពិតជាអច្ឆរិយៈ ជាមួយនឹងស្ថាបត្យកម្មដ៏អស្ចារ្យ ចម្លាក់ដ៏ប្រណិត និងបង្កប់នូវប្រវត្តិសាស្ត្រដ៏ជ្រាលជ្រៅ។ នៅពេលដើរកាត់តាមផ្លូវបុរាណ នោះយើងមានអារម្មណ៍ថាដូចជាបោះជំហានចូលទៅកាន់អតីតកាលយ៉ាងដូច្នោះដែរ”។

“ម្យ៉ាងទៀត ទិដ្ឋភាពថ្ងៃរះលើកំពូលប្រាសាទពិតជាគួរឱ្យស្ញប់ស្ញែងមែនទែន។ រឿងរ៉ាវគួរឱ្យចាប់អារម្មណ៍របស់អាណាចក្រខ្មែរ និងអត្ថន័យនៅពីក្រោយជញ្ជាំងប្រាសាទ មានតម្លៃសម្រាប់ការចែករំលែកជាចំណេះដឹង។ ថ្វីត្បិតតែប្រាសាទអង្គរវត្តជាកន្លែងទេសចរណ៍ដ៏ពេញនិយមក៏ដោយ ក៏កន្លែងនេះធ្វើឱ្យយើងមានអារម្មណ៍ស្ងប់សុខ។ មិនថាអ្នកជាអ្នកស្រលាញ់ប្រវត្តិសាស្ត្រ ជាអ្នកថតរូប ឬគ្រាន់តែជាមនុស្សដែលចូលចិត្តភាពស្រស់ស្អាតនោះទេ ប្រាសាទអង្គរវត្តគឺជាគោលដៅទេសចរណ៍ដែលត្រូវតែទៅទស្សនា។ ប្រាសាទនេះពិតជាសមនឹងកិត្តិនាមជាអច្ឆរិយៈមួយរបស់ពិភពលោកពិតមែន” ។

អ្នកធ្វើដំណើរម្នាក់ទៀតបានបញ្ចេញមតិថា ៖ «ប្រាសាទអង្គរវត្តពិតជាអស្ចារ្យណាស់! ការដើរកាត់ប្រាសាទបុរាណនៅពេលថ្ងៃរះ មានអារម្មណ៍ថាដូចជាមានមន្តអាគម ហើយដូចជាពន្លឺពណ៌មាសចាំងមកលើប៉មថ្ម។ ស្ថាបត្យកម្ម ចម្លាក់ និងទំហំប្រាសាទពិតជាហួសពីការស្មាន និងគួរតែទៅមើលឱ្យបានម្តងក្នុងមួយជីវិត»។

សូមបញ្ជាក់ជូនផងដែរថា ប្រាសាទអង្គរវត្តត្រូវបានសាងសង់ឡើងក្នុងសតវត្សទី១២ ក្នុងរជ្ជកាលព្រះបាទសូរ្យវរ្ម័នទី២ (១១១២-១១៥២) ហើយចុះក្នុងបញ្ជីសម្បត្តិបេតិកភណ្ឌពិភពលោក របស់អង្គការ UNESCO នៅថ្ងៃទី១៤ ខែធ្នូ ឆ្នាំ១៩៩២ នៅទីក្រុងសាន់តេហ្វេ សហរដ្ឋអាម៉េរិក។ កន្លងមក ប្រាសាទអង្គរវត្តធ្លាប់ទទួលបានការទទួលស្គាល់ជាអន្តរជាតិជាច្រើនដូចជា ជាកន្លែងដែលមើលថ្ងៃរះល្អបំផុតក្នុងពិភពលោក ជាកន្លែងដែលថតរូបស្អាតបំផុតនៅអាស៊ី និងជាតំបន់ទេសចរណ៍ល្អបំផុតនៅលើពិភពលោក ។ល៕ ដោយ នីកា AKP