ផ្តើមអាជីពក្នុងផ្ទះបាយ ដំបូងត្រឹមជាកូនកាំបិត ចិតខ្ទឹមបារាំង វិវឌ្ឍន៍ខ្លួនរហូតក្លាយជាមេចុងភៅធំ

ស្រ្តីម្នាក់នេះ ចាប់ផ្តើមការងារនៅក្នុងអាជីពជាចុងភៅដំបូងធ្វើជាកូនកាំបិតឱ្យគេ រហូតពេលនេះក្លាយជាមេចុងភៅធំ នៅព្រលានយន្តហោះអន្តរជាតិ Changi Airport។ ផ្តើមដំបូង ត្រឹមជាចិតបន្លែ និងមិនចេះចំអិនម្ហូបអ្វីសោះ អ្នកស្រី Linda Sim បានផ្លាស់ប្តូរ និង អភិវឌ្ឍន៍ខ្លួនឱ្យក្លាយជាមេចុងភៅលំដាប់ នៅក្នុងភោជនីយដ្ឋានកំពូល ​first class lounge ក្នុងព្រលានយន្តហោះអន្តរជាតិសិង្ហបុរី។

អ្នកដែលបានធ្វើដំណើរតាមជើងហោះហើរលំដាប់ខ្ពស់ នៅអាកាសយានដ្ឋានអន្តរជាតិរបស់សិង្ហបុរី ពិតជាបានឃើញនូវបញ្ជីមុខម្ហូបពិសេសមួយ ផ្សំឡើងពីរូបមន្តផ្ទាល់ខ្លួនរបស់ មេចុងភៅ Linda ដែលមុខម្ហូបនោះមានឈ្មោះថា “Chef Linda’s dry prawn and pork hae mee with beansprouts and chilli”។ ប៉ុន្តែមិនសូវមានអ្នកបានដឹងនិងស្គាល់ពីចុងភៅ នៅពីក្រោយការបង្កើតមុខម្ហូបពិសេសមួយមុខនេះទេ។

គិតមកទល់ពេលបច្ចុប្បន្ន Chef Linda មានអាយុ ៤៤ឆ្នាំ ដែលអ្នកស្រីជាមេចុងភៅមួយរូប មិនសូវនិយាយស្តីប៉ុន្មានទេ ប៉ុន្តែមានភាពម៉ត់ចត់​ ចំពោះការងារ។ តាមប្រវត្តិពីដំបូងមក អ្នកស្រីមិនចូលចិត្តចំអិនម្ហូបទេ ហើយក៏មិនដែលធ្លាប់បានចំអិនម្ហូបមួយមុខណាឡើយ ចាប់តាំងពីធំដឹងក្តីមក។​ ដោយកាលៈទេសៈបង្ខំ​ នៅក្នុងអាយុ ១៧ឆ្នាំ Linda បានទទួលការងារជាកូនកាំបិត នៅក្នុងភោជនីយដ្ឋានរបស់សណ្ឋាគារលំដាប់កំពូលសិង្ហបុរី Sangri-La Rasa Sentosa។ អ្វីដែលអ្នកស្រី ចាំមិនភ្លេចនោះ គឺរកចង់ឈប់តាំងពីថ្ងៃដំបូងម្ល៉េះ។

Linda រៀបរាប់ថា “នៅទីនោះគឺជា main kitchen ហើយខ្ញុំត្រូវបានគេប្រើឱ្យបកខ្ទឹមបារាំង និងហាត់វាជាចំណិតៗ។ ពេលនោះ ខ្ញុំយំខ្លាំងណាស់ ហើយខ្ញុំបាននិយាយជាមួយខ្លួនឯងថា ខ្ញុំមិនចង់ត្រឡប់ទៅធ្វើការងារនោះវិញទេ” ។

ក្រោយជម្នះចិត្តយកឈ្នះលើឧបសគ្ដដែលបានជួប អ្នកស្រីសម្រេចបន្តធ្វើជាកូនកាំបិត បន្តទៀត។ ៣ខែ​នៅ Sangri-La Rasa Sentosa អាចចាត់ទុកបានថាជាបទពិសោធន៍មួយដ៏ជូរចត់ ដោយត្រូវបាន មេចុងភៅស្រែកដាក់ជាប្រចាំ នៅពេលណាដែលចង្រ្កានបាយ មានភាពកខ្វក់ និង ខ្វះអនាម័យ។ក្រោយភ្លៀង មេឃស្រឡះ​ ចប់៣ខែ ជាកូនកាំបិត Linda ត្រូវបានប្រគល់ការងារពេញម៉ោងនៅក្នុងផ្ទះបាយធំ របស់សណ្ឋាគារលំដាប់កំពូលនោះ។ លុះក្រោយមកទៀត អ្នកស្រី បានយល់ឃើញថាខ្លួនអ្នកស្រី ពិតជាចាប់ផ្តើមស្រឡាញ់ការចំអិនម្ហូប ហើយក៏បានសម្រេចចិត្តបោះបង់ការសិក្សា ដើម្បីសម្រួចក្នុងការចាប់អាជីពជាមេចុងភៅ តាំងពីពេលនោះមក៕