ផ្សារបោះដុំ ផលិតផលរបស់ខ្មែរ និងលេចចេញជារូបរាងឡើងនៅពេលឆាប់ៗខាងមុខ

កម្ពុជានឹងមានផ្សារបោះដុំដ៏ធំមួយ សម្រាប់ដាក់លក់ផលិតផលខ្មែរ ដើម្បីជំរុញការលក់ផលិតផលក្នុងស្រុក និងការនាំចេញ ហើយរំពឹងថានឹងមានទីផ្សារកាន់តែច្រើននាពេលខាងមុខ ដោយផ្តោទៅលើគុណភាពជាចម្បង។

យោងតាមការចុះផ្សាយរបស់ ទូរទស្សន៍ជាតិកម្ពុជា បានអោយដឹងថា ផ្សារបោះដុំ​ ផលិតផលរបស់ខ្មែរ​ និងលេចចេញជារូបរាងឡើងនៅពេលឆាប់ៗខាងមុខ​ ដែលបង្កភាពងាយស្រួលសម្រាប់បំពេញ​ តម្រូវការប្រជាពលរដ្ឋ​ ក្រោយការសហការរវាងក្រុមហ៊ុនផ្សារអាណាចក្រ​ និងផ្សារ​ KC​ ស្ថិតក្នុងខណ្ឌពោធិ៍សែនជ័យ​ បានបើកដំណើរការ​ ។ នេះបើតាមការបញ្ជាក់នៅក្នុងសិក្ខាសាលាមួយស្តីពី​ បទបង្ហាញនៃផែនការបើកផ្សារបោះដុំដើម្បី ជំរុញការលក់ផលិតផលក្នុងស្រុកនិងជម្រុញទិសដៅទីផ្សារ​ ក្រោមអធិបតី​ ឯកឧត្តម​ ងិន​ ឆាយ​ ប្រតិភូរាជរដ្ឋាភិបាលកម្ពុជាទទួលជាអគ្គនាយកអគ្គនាយកដ្ឋានកសិកម្ម​ ដោយមានការចូលរួមពី​ផ្នែកពាក់ព័ន្ធេជាច្រើន​ នៅព្រឹកថ្ងៃទី១២​ ខែមិថុនា​ ឆ្នាំ២០២៤​ នាទីតាំងផ្សារ​ KC ស្ថិតតាមបណ្តោយផ្លូវ​ 105K ខណ្ឌពោធិ៍សែនជ័យ​ រាជធានីភ្នំពេញ​ ។

​លោក​ ញេវ​ សិទ្ធសុផារី​ ប្រធានក្រុមហ៊ុនផ្សារអាណាចក្រ​ (AKHP Co Ltd)  បានបង្ហាញអោយដឹងថា​ គោលបំណង​ សិក្ខាសាលានាថ្ងៃនេះ​ គឺដេីម្បីធ្វើបទបង្ហាញនៃផែនការបើកផ្សារបោះដុំដើម្បី “ការជំរុញការលក់ផលិតផលក្នុងស្រុក និងតម្រង់ទិសដៅទីផ្សារ” តាមរយៈកិច្ចសហប្រតិបត្តិការជាមួយដៃគូរពាក់ព័ន្ធទាំងអស់ នឹង ផ្សារអាណាចក្រ ផលិតផលខ្មែរ (AKHP Co.,Ltd) ដែលដើរតួ នាទីសំខាន់ៗ បង្ហាញចក្ខុវិស័យសាមគ្គីភាពសម្រាប់តម្រង់ទិសទីផ្សារនេះ​ នឹងធ្វើជាចំណុចប្រមូលផ្តុំ តាំងបង្ហាញ បណ្តាញចែកចាយ ជំរុញទីផ្សារ គាំទ្រការលក់ទាំងនៅក្នុងស្រុក ហើយនាំចេញ ដែលអាចជួយគាំទ្រដល់អ្នកផលិត សមាគមកសិកម្ម សហគមន៍អ្នកចិញ្ចឹមសត្វ និងចិញ្ចឹមត្រី អ្នកនាំចេញ និងអ្នកពាក់ព័ន្ធផ្សេងទៀត រួមគ្នាសហការគាំទ្រ ចែករំលែក ពិភាក្សាការស្រាវជ្រាវអភិវឌ្ឍន៍ និងដំណោះស្រាយ។​

​លោក​ គិត​ ឈឿន​ អគ្គនាយកផ្សារ​ KC បានអោយដឹងថា​ ការសហការរវាង​ ក្រុមហ៊ុនផ្សារអាណាចក្រ​ និងផ្សារ​  KC នាពេលនេះ​ គឺដើម្បីបង្កើតអោយមានការបង្កើតជាផ្សារបោះដុំផលិតផលខ្មែរ​ ដើម្បីជួយជម្រុញដល់ផលិតផលរបស់ខ្មែរកាន់តែត្រូវបានទទួលស្គាល់​ និងមានទីផ្សារកាន់តែច្រើន។

ឯកឧត្តម​ ងិន​ ឆាយ​ ប្រតិភូរាជរដ្ឋាភិបាលកម្ពុជាទទួលជាអគ្គនាយកអគ្គនាយកដ្ឋានកសិកម្ម​ បានមានប្រសាស៍ថា​ ការបង្កើតអោយមានផ្សារបោះដុំ​ ផលិតផលខ្មែរ​ នាពេលនេះនិងជម្រុញ​អោយមានការគាំទ្រដល់ផលិតផលខ្មែរ​  និងជួយជម្រុញដល់កសិករ​ មានទីផ្សារ​កាន់តែទូលាយ​ ខណៈអគ្គនាយកដ្ឋានកសិកម្ម​ និងជម្រុញ​អោយផ្សារសហការជាមួយសហគមន៍កសិកម្ម​ ដើម្បីអោយទីផ្សារមានចរន្តមួយស្របតាមតម្រូវការ​ មិនជាន់ផលិតផលរបស់កសិករ​ ប្រកបដោយស្តង់ដារ​បច្ចេកទេស​ មានគុណភាព​ អាចតម្រូវ​តាមតម្រូវការរបស់និងប្រជាពលរដ្ឋ​ និងផ្គត់ផ្គង់ទីផ្សារបានដោយមានប្រសិទ្ធភាព។   ឯកឧត្តមបានបញ្ជាក់ថា​ ដើម្បីអោយសកម្មភាពនេះជោគជ័យទៅបាន​ ប្រជាពលរដ្ឋ​ត្រូវមានការប្តេជ្ញាចិត្តអោយបាន​ ត្រូវធ្វើយ៉ាងណាប្រើប្រាស់ផលិតផលខ្មែរអោយបានច្រើន​ ។ ឯកឧត្តម​ បានថ្លែងអំណរគុណដល់ក្រុមហ៊ុនទាំងពីរ​ ដែលបានដំណើរការគម្រោងនេះ​ ហើយឯកឧត្តម​ សង្ឃឹមថា​នៅថ្ងៃខាងមុខ​ និងមានការបង្កើតឡើងនូវសាខាថ្មីអោយបានច្រើន​ ដើម្បីជម្រុញ​ និងមិនអោយមានការកកស្ទះនៅផលិតផលខ្មែរ​ កាន់តែប្រសើរ​ឡើង៕