ពលរដ្ឋកម្ពុជាបានទទួលស្វាគមន៍យ៉ាងកក់ក្តៅ ចំពោះក្បួនរថយន្តទំនើប Gumble 3000 នៅមុខប្រាសាទអង្គរវត្ត

ខណៈពេលព្រឹកថ្ងៃទី 17 ប្រជាជនជាច្រើនកុះករបានសម្តែងការគាំទ្រ ក៏ដូចជាទទួលស្វាគមន៍ក្បួនរថយន្តទំនើបៗ នៅមុខប្រាសាទអង្គរវត្តដោយភាពកក់ក្តៅបំផុត។

សេចក្តីស្រឡាញ់ ក៏ដូចជាភាពរួសរាយរាក់ទាក់ ជាពិសេសការបង្ហាញនូវទឹកចិត្តគាំទ្រដ៏ធំធេងរបស់ពលរដ្ឋកម្ពុជាចំពោះព្រឹត្តិការណ៍ Gumball 3000 ពិតជាមិនអាចកាត់ថ្លៃបានទេ ដោយការតាំងពិពណ៌នេះបានពាំនាំនូវបទពិសោធន៍ថ្មីចំពោះប្រជាជនក្នុងស្រុកទទួលបានអារម្មណ៍ដែលមិនធ្លាប់មានពីមុនមក ទស្សនារថយន្តទំនើបៗមានតម្លៃថ្លៃ និងភាពច្នៃប្រឌិតរថយន្តប្លែកៗ ព្រមទាំងបង្កើតបរិយាកាសជួបជុំរវាងភ្ញៀវទេសចរជាតិ និងអន្តរជាតិ។

ជាពិសេសមានការប្រមូលផ្តុំដោយកំពូលតារាអន្តរជាតិល្បីៗ កីឡាករ YouTubers Influencer Streamer និងជនមានឥទ្ធិពលជុំវិញពិភពលោក។

ម្យ៉ាងវិញទៀត នេះក៏ជាឱកាសរបស់កម្ពុជា ទាញយកផលប្រយោជន៍ជាច្រើនរួមមានការទាំងការផ្សព្វផ្សាយអំពីវប្បធម៌ អរិយធម៌ និងសក្ដានុពលទេសចរណ៍ឱ្យកាន់តែមានភាពល្បីល្បាញជាសាកល។ ព្រឹត្តិការណ៍នេះពិតជាបានចូលរួម ជម្រុញវិស័យទេសចរណ៍នៅកម្ពុជាយ៉ាងខ្លាំង ថែមទាំងបានរកមូលនិធិជួយមន្ទីរពេទ្យកុមារអង្គរ ការបើកឱកាសឲ្យអ្នកវិនិយោគបានជួបគ្នា និងជាការបង្កើតកំណត់ត្រាពិភពលោកហ្គីណេសដែលមានការចតរថយន្តច្រើនជាងគេនៅមុខប្រាសាទអង្គរវត្ត។