តើពិតទេ? អ្នកម្តាយលើកដំបូងគ្រប់រូប តែងតែបារម្ភខ្លាចខ្លួនមិនបានបំពេញតួនាទីល្អ

ទទួលបានសមាជិកថ្មីនៅក្នុងគ្រួសារ គឺជារឿងដ៏ត្រេកត្រអាលបំផុតនៅក្នុងជីវិត ប៉ុន្តែខណៈពេលដែលកំពុងរីករាយទាំងនោះ អ្នកម្តាយថ្មីថ្មោងក៏ទទួលបាននូវអារម្មណ៍ភ័យព្រួយ និងបារម្មណ៍យ៉ាងខ្លាំងទៅលើការមើលថែទាំចំពោះទារកដំបូងរបស់ពួកគេ។

អ្នកម្តាយលើកដំបូងគ្រប់រូបតែងចោទសំណួរទាំងនេះឡើងជារឿយៗ

• តើខ្ញុំនឹងអាចមើលថែកូនតូចរបស់ខ្ញុំបានដែរឬទេ?
• តើខ្ញុំកំពុងតែបំពេញតួនាទីបានត្រឹមត្រូវដែរឬទេ?
• តើខ្ញុំត្រូវធ្វើដូចម្តេចនៅពេលគេឃ្លាន?
• តើកូនខ្ញុំគេងលក់ស្រួលដែរទេ?
• តើពេទ្យណាសាកសមនឹងកូនរបស់ខ្ញុំ នៅពេលគេឈឺក្តៅខ្លួន?

ឡេឌីស៍ សូមចែករំលែកជូនជាចំណេះដឹងខ្លះៗ ហើយសង្ឃឹមថាចំណុចទាំងនេះនឹងធ្វើឱ្យអ្នកស្ងប់ចិត្ត ព្រមទាំងជួយឱ្យអ្នកក្លាយជាអ្នកម្តាយលើកដំបូងដ៏រីករាយបំផុតផងដែរ។​

ការបំបៅដោះ

ពិតណាស់ អាហារសម្រាប់ពួកគេនៅពេលនេះ គឺមានតែទឹកដោះម្តាយតែមួយគត់។ ចំណុចមួយដែលអ្នកម្តាយដំបូងគ្រប់រូបត្រូវដឹង គឺពួកគេចូលចិត្តគេងដោយអ្នកបំបៅពួកគេ។ អ្នកប្រហែលធ្លាប់ឮអំពីអាការឈឺក្បាលសុដន់ និងមានអារម្មណ៍នៅពេលកូនរបស់អ្នកចាប់ផ្តើមជញ្ជក់ ព្រមទាំងមានអាការៈអស់កម្លាំង និងបាក់ទឹកចិត្តផងដែរ ប៉ុន្តែសូមកុំបារម្ភអាការទាំងនេះនឹងធូរស្បើយមកវិញនៅពេលដែលអ្នកសម្រាកបានគ្រប់គ្រាន់។

ការបំបៅដោះកូន គឺបង្ហាញថាអ្នកបានផ្តល់នូវជីវជាតិដ៏ល្អបំផុតសម្រាប់កូន ព្រមទាំងបង្កើតភាពជិតស្និទ្ធរវាងអ្នកម្តាយ និងកូនផងដែរ ម៉្យាងអ្នកក៏អាចសង្កេតឃើញអំពីភាពរីករាយរបស់ទារកក្នុងពេលបំបៅពួកគេផងដែរ នេះអាចបញ្ជាក់ឱ្យឃើញថា ការបំបៅដោះគឺជាបទពិសោធន៍ដ៏ល្អមួយចំពោះមាតាគ្រប់រូប។

ការលួងលោម

ផ្នែកនេះ ជាផ្នែកដ៏សំខាន់មួយនៅពេលដែលអ្នកមានកូន។ អ្នកត្រូវតែយល់ថា ទារកតែងតែយំជានិច្ច ពួកគេអាចនឹងយំនៅពេលឃ្លាន ឬមានការឈឺចុកចាប់នៅផ្នែកណាមួយនៃរាងកាយរបស់ពួកគេ ឬមិនមានផាសុកភាព។ ពួកគេក៏អាចយំ នៅពេលគេងងុយគេងផងដែរ។

នៅពេលកូនរបស់អ្នកយំ អ្នកអាចលួងលោមកូនរបស់អ្នកដោយ អ្នកលើកពរពួកគេបញ្ឈរដាក់លើខ្លួនរបស់អ្នក និងបង្កើតសំឡេងបំពេរលួងថ្នមៗ រួចទះខ្នងគេថ្នមៗបំផុត។

ប្រសិនបើវិធីនេះមិនបានផល​ ក៏ព្រោះតែកូនរបស់អ្នកមិនបានឃ្លាន មិនមានអាការឈឺ ឬមិនងងុយគេង នោះអ្នកអាចងូតទឹកក្តៅឧណ្ណៗឱ្យគេបាន។ វិធីងូតទឹកនេះអាចជួយឱ្យកូនអ្នកមានអារម្មណ៍ល្អ និងជួយឱ្យគេមានអារម្មណ៍ងងុយគេង រួមទាំងទទួលបានផាសុកភាពផងដែរ។

យកកូនរបស់អ្នកចេញក្រៅ

អ្នកអាចសាកល្បងនាំកូនរបស់អ្នកចេញទៅបរិវេណខាងក្រៅ ដូចជា ឧទ្យានកំសាន្ត ក៏ដូចជាហាងសៀវភៅ (សូមចៀសវាង ទៅទីកន្លែងដែលអ៊ូរអរខ្លាំង) នោះអ្ន្កកនឹងយល់ថា​ ការចេញទៅខាងក្រៅគឺជាការល្អ។ សូមរៀបចំសម្ភារៈសម្រាប់កូនរបស់អ្នក និងសម្រាប់ខ្លួនឯងឱ្យបានត្រឹមត្រូវ។

ការដែលក្លាយជាអ្នកម្តាយលើកដំបូងអាចនឹងពិបាកបន្តិចមែន ប៉ុន្តែអ្នកទទួលបាននូវបទពិសោធន៍ដ៏អស្ចារ្យមួយ និងភាពរីករាយពីការខិតខំប្រឹងប្រែងទាំងឡាយសម្រាប់កូនរបស់អ្នក និងខ្លួនឯង។