ពិធីរាត្រីសមោសរសំពត់បត់ខ្មែរ លើកទី 2

នារាត្រីថ្ងៃថ្ងៃទី 24 ខែកុម្ភៈ ឆ្នាំ 2025 ក្រសួងវប្បធម៌ និងវិចិត្រសិល្បៈ បានរៀបចំព្រឹត្តិការណ៍ រាត្រីសមោសរសំពត់បត់ខ្មែរ លើកទី 2 ស្ថិតនៅសាលសន្និសីទចតុម្មុខ។

កម្មវិធីនេះមានអត្ថន័យបំផុតសម្រាប់ យុវជន យុវតីខ្មែរ ជំនាន់ក្រោយគ្រប់រូបស្វែងយល់ដឹងកាន់តែច្បាស់អំពីប្រវត្តិ ទម្រង់ ក៏ដូចជាតម្លៃសម្លៀកបំពាក់ប្រពៃណីបុរាណខ្មែរ ដែលមានតាំងពីយូរលង់ណាស់មកហើយ។

សម្លៀកបំពាក់ប្រណីខ្មែរជាសម្លៀកបំពាក់ដ៏ថ្នៃថ្នូរ និងបង្ហាញភាពស្រស់ស្អាត សមសួនបំផុត ល្បីសុះសាយជុំវិញពិភពលោក ម្យ៉ាងមានអាយុចំណាស់ជាងគេនៅលើទឹកដីសុវណ្ណភូមិ ។

នៅក្នុងកម្មវិធីក៏បានបង្ហាញឱ្យឃើញផងដែរអំពីសម្លៀកបំពាក់អាពាហ៍ពិពាហ៍ប្រពៃណីខ្មែរ ចាប់តាំងពី សម័យអង្គរ សម័យលង្វែក សម័យឧត្ដុង្គ សម័យចតុមុខសម័យអាណានិគមនិយមបារាំង សម័យសាធារណៈរដ្ឋខ្មែរ រហូតមកដល់បច្ចុប្បន្ន និងមានការដាក់តាំងបង្ហាញផ្ទាំងគំនូររូបផ្កា ឆ្លុះបញ្ចាំងនូវការប្រៀបប្រដូចស្រ្តីខ្មែរទៅនឹងផ្កាដ៏បរិសុទ្ធ។

ការបង្កើតកម្មវិធីទៀតសោត ក៏បានធ្វើឱ្យមហាជនជាច្រើនស្គាល់ពីតម្លៃនៃវប្បធម៌ និងសម្រស់ដ៏ស្រស់ស្អាតរបស់សម្លៀកបំពាក់ខ្មែរ និងមានគោលបំណងថែរក្សា ការពារ លើកតម្កើងប្រពៃណី កេរដំណែលដែលបន្សល់ទុករបស់ដូនតាខ្មែរតាំងពីបរមបុរាណពីជំនាន់ទៅមួយជំនាន់។