ព្រឹត្តិការណ៍ “ជិះកង់ដើម្បីបរិស្ថាន និងសុខភាពកុមារ” ឆ្នាំទី១១

មន្ទីរពេទ្យកុមារអង្គរ រៀបចំការព្រឹត្តិការណ៍ “ជិះកង់ដើម្បីបរិស្ថាន និងសុខភាពកុមារ” ក្រោមប្រធានបទ “ជិះកង់ដើម្បីសន្តិភាព និងស្មារតីរួបរួមជាតិ” ក្នុងខេត្តសៀមរាប កាលពីថ្ងៃទី៧ ខែកញ្ញា ឆ្នាំ២០២៥ ដោយទីតាំងចាប់ផ្ដើមនៅម៉ោង ៥:៣០ នាទីព្រឹក ដោយចេញដំណើរពីផ្លូវព្រះសីហនុ ទៅកាន់ប្រាសាទអង្គរវត្ត ហើយនឹងឈប់សម្រាកនៅខាងមុខប្រាសាទអង្គរវត្ត។ បន្ទាប់មក នឹងបន្តដំណើរទៅកាន់ខ្លោងទ្វារទន្លេអុំ ឡើងតាមប្រាសាទជ្រុង ចេញតាមខ្លោងទ្វារតាកាវ និងកាត់តាមប្រាសាទបាយ័ន លានជល់ដំរី ប្រាសាទតាកែវ ប្រាសាទតាព្រហ្ម ប្រាសាទបន្ទាយក្តី រហូតដល់សាលាបឋមសិក្សាក្រវ៉ាន់ ដែលជាទីតាំងបញ្ចប់ មានចម្ងាយសរុបប្រមាណ ២១ គីឡូម៉ែត្រ។

ព្រឹត្តិការណ៍នេះ មានគោលបំណងរៃអង្គាសថវិកា ឧបត្ថម្ភដល់ មន្ទីរពេទ្យកុមារអង្គរ និងដើម្បីផ្សព្វផ្សាយសក្តានុពលទេសចរណ៍របស់ខេត្តសៀមរាប ខណៈព្រឹត្តិការណ៍ជិះកង់ ដើម្បីបរិស្ថាន និងសុខភាពកុមារ។ ឆ្នាំទី១១នេះ មានអ្នកចូលរួមជិះកង់ យ៉ាងច្រើនកុះកររួមទាំងជាតិ និងអន្តរជាតិប្រមាណ ៨០០ នាក់។

យោងតាមសេចក្ដីជូនដំណឹងរបស់រដ្ឋបាលខេត្តសៀមរាប អោយដឹងថាព្រឹត្តិការណ៍ «ជិះកង់ដើម្បីបរិស្ថាន និងសុខភាពកុមារ» ឆ្នាំទី១១ ឆ្នាំ២០២៥ នេះ រៀបចំឡើងក្រោមកិច្ចសហការជាមួយគណៈកម្មការរៀបចំព្រឹត្តិការណ៍ជិះកង់ និងបណ្ដាក្រុមហ៊ុនមួយចំនួនទៀត ដើម្បីរៃអង្គាសថវិកាជួយដល់ការថែទាំ និងព្យាបាលកុមារនៅ មន្ទីរពេទ្យកុមារកម្ពុជា។ គិតចាប់ពីឆ្នាំ១៩៩៩ មក មន្ទីរពេទ្យកុមារមួយនេះ បានជួយសង្គ្រោះជីវិតកុមារជិត ៣ លាននាក់ និងផ្ដល់នូវសេវាថែទាំសុខភាពដែលពួកគេត្រូវការ ហើយមន្ទីរពេទ្យអាចដំណើរការទៅបាន ដោយពឹងផ្អែកទាំងស្រុងលើជំនួយមូលនិធិមនុស្សធម៌។