ខ្មែរ
English
Hongya Cave ឬ Hongya Dong គឺជាអគារកម្ពស់ 11 ជាន់ ដែលមានរចនាសម្ព័ន្ធសាងសងជាបន្តបណ្តាក់គ្នានៅលើភ្នំតាមបណ្តោយច្រាំងទន្លេ Jialang ក្នុងទីក្រុងឆុងឈឺង “Chongqing” ប្រទេសចិន។ អាគារត្រូវបានគេដាក់ឈ្មោះឱ្យថា អំពិលអំពែកនាពេលរាត្រីរបស់ទីក្រុងឆុងឈីង ព្រោះសម្រស់នៃអាគារ Hongya Cave ពាំនាំនូវពន្លឺភ្លើងជាច្រើនពណ៌ដ៏ស្រស់ស្អាត អមជាមួយក្បូរក្បាច់នៃអាគារយ៉ាងប្រណីតគួរឱ្យចង់គយគន់។
រូបរាងរបស់អគារនេះត្រូវបានគេប្រៀបធៀបទៅនឹងអគារដ៏លេចធ្លោរបស់ភាពយន្តគំនូរជីវចលជប៉ុន ចំណងជើងថា “Spirited Away” ក្នុងឆ្នាំ 2001 ទើបធ្វើឱ្យ Hongya Cave កាន់តែមានភាពល្បីល្បាញជុំវិញពិភពលោក និងក្លាយខ្លួនជាតំបន់ទេសចរណ៍លំដាប់មួយនៃប្រទេសចិនផងដែរ។
Hongya Cave មិនមែនជារូងភ្នំសាមញ្ញនោះទេ ប៉ុន្តែវាជាទីកន្លែងទេសចរណ៍ក្នុងការដើរកម្សាន្តយ៉ាងសម្បូរបែបទាំង 11 ជាន់ រួមមាន ហាងលក់ឥវ៉ាន់ជាច្រើនប្រភេទដូចជា សម្លៀកបំពាក់ វត្ថុអនុស្សាវរីយ៍ របររប្រើសប្រាស់ និងហាងម្ហូបអាហារដ៏សម្បូរបែប ជាពិសេសស៊ុបហ៊តផង ខណៈឆុងឈីងគឺជាម្ចាស់ដើមកំណើតនៃស៊ុបហ៊តផត។
បើនិយាយអំពី ទិដ្ឋភាពខាងក្រៅនៃអាគារ Hongya Cave ប្រៀបបានដូចជា គំនូរ 3D នៅក្នុងជីវិតពិត ព្រោះវាបានបង្ហាញអំពីភាពអស្ចារ្យនៃសំណង់ស្ថាបត្យកម្មបុរាណ ច្របាច់បញ្ចូលជាមួយពន្លឺភ្លើងពណ៌ស្រស់ឆើតឆាយនាពេលរាត្រី បង្កើតបានជាទស្សនីយ៍ភាពដ៏អស្ចារ្យនៃទីក្រុងឆុងឈីង។
នៅក្បែរ Hongya Cave មានស្ពានឆ្លងកាត់ទន្លេ Jialing ឌើម្បីទៅដល់ត្រើយម្ខាងទៀត ដូច្នេះប្រសិនបើអ្នកចង់ទស្សនាសម្រស់ផ្នែកខាងក្រៅនៃអាគារបុរាណដ៏អច្ឆរិយៈមួយនេះ អ្នកអាចធ្វើដំណើរឆ្លងស្ពានដោយមិនមានការបង់ប្រាក់ឡើយ។ គួរបញ្ជាក់ផងដែរថា អាគារឈើបុរាណនេះគឺជាតំបន់ប្រវត្តិសាស្រ្តអាយុកាលជាង 2300ឆ្នាំមកហើយ និងធ្លាប់ជាបន្ទាយយោធាសម័យអតីតកាល។
