ខ្មែរ
English
ចំនួនទេសចរជាតិ-អន្តរជាតិ និងបងប្អូនប្រជាពលរដ្ឋ ចូលទស្សនាខេត្តសៀមរាប ក្នុងព្រឹត្តិការណ៍ ស្នាមញញឹមនៃកម្ពុជា ចាប់ពីថ្ងៃទី២៩-៣០ ខែតុលា ឆ្នាំ២០២៤ មានចំនួនប្រមាណ ៤៤ ៨២៤ នាក់ ក្នុងនោះទេសចរអន្តរជាតិមានចំនួន៦ ០២៤ នាក់ ទេសចរជាតិ និងបងប្អូនប្រជាពលរដ្ឋមានចំនួនប្រមាណ៣៨ ៨០០ នាក់ ដោយយោងតាមរបាយការណ៍របស់មន្ទីរទេសចរណ៍ខេត្តសៀមរាប។
“ស្នាមញញឹមនៃកម្ពុជា” លើកទី២នេះ ធ្វើឡើងដើម្បីអបអរសាទរខួប២០ព្រះវស្សានៃការយាងឡើងគ្រងព្រះបរមសិរីរាជសម្បត្តិរបស់ព្រះករុណា ជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងក្នុងគោលបំណងរួមគ្នា ជំរុញការផ្សព្វផ្សាយពីសិល្បៈ វប្បធម៌ អរិយធម៌ដ៏ល្អផូរផង់របស់ខ្មែរ និងបង្ហាញពីសក្តានុពលវិស័យទេសចរណ៍នៅកម្ពុជា។
ទន្ទឹមនឹងនេះ ក៏ជាការគាស់រំលឹកឡើងវិញពីប្រវត្តិសាស្ត្រដ៏មហស្ចារ្យ ការបង្ហាញពីទម្រង់នៃសិល្បៈវប្បធម៌ ខ្មែរដ៏ល្អផូរផង់ ជូនដល់ភ្ញៀវជាតិ និងអន្តរជាតិបានទស្សនា បានស្គាល់ និងបានយល់នាពេលនោះថា កម្មវិធី “ស្នាមញញឹមនៃកម្ពុជា” ក៏ត្រូវបាននិម្មិតឡើងក្នុងគោលបំណងដ៏ធំបំផុតមួយ គឺជំរុញការផ្សព្វផ្សាយ និងទាក់ទាញភ្ញៀវទេសចរបរទេស មកទស្សនាកម្ពុជាជាថ្មីម្ដងទៀត នៅចុងឆ្នាំ២០២៤ និងការត្រៀមខ្លួនរួចជាស្រេចនៃការឈានចូលមកដល់នៅឆ្នាំ២០២៥។
សូមបញ្ជាក់ថា ស្នាមញញឹមនៃកម្ពុជា លើកទី២នេះ មានកម្មវិធីសំខាន់ៗជាច្រើន ដូចជា នៅព្រឹកថ្ងៃទី២៩ ខែតុលា គឺជាពិធីបើកព្រឹត្តិការណ៍ ស្នាមញញឹមនៃកម្ពុជា លើកទី២ និងមានការសម្ដែងសិល្បៈផ្សេងៗ អមជាមួយនឹងការតាំងពិព័រណ៍សិល្បៈវប្បធម៌ចម្រុះផងដែរ។ រីឯនៅ ពេលរសៀល គឺជាព្រឹត្តិការណ៍ដ៏អស្ចារ្យនៃទស្សនីយភាពការដង្ហែក្បួនព្រះមហាក្សត្រខ្មែរនាសម័យអង្គរ និងការសម្ដែងរបាំបុរាណខ្មែរជាច្រើនទម្រង់ ដោយមានសិល្បករសិល្បការិនីល្បីៗប្រមាណ៥០០នាក់ បានស្ម័គ្រចិត្តចូលរួមសម្ដែងយ៉ាងរស់រវើក។
ដោយឡែក នៅថ្ងៃទី៣០ ខែតុលា មានរៀបចំកម្មវិធី ស្នាមញញឹមនៃកម្ពុជា ដែលក្នុងនោះមានរៀបចំពិព័រណ៍ភ្លក្សម្ហូបអាហារ នំចំណី ផ្លែឈើ និងភេសជ្ជៈបែបខ្មែរ ការប្រគំតន្ត្រីខ្នាតតូច ការសម្តែងផ្ទាំងទស្សនីយភាពល្បែង របាំ ជាច្រើនទម្រង់ ដើម្បីជាកិច្ចស្វាគមន៍ និងផ្ដល់ភាពសប្បាយរីករាយជូនភ្ញៀវទេសចរជាតិ-អន្តរជាតិ៕
