មន្ត្រីរាជការស៊ីវិលកម្ពុជា ៤០រូប មកពីក្រសួង ស្ថាប័នចំនួន ១០ នឹងចូលរួមវគ្គបណ្តុះបណ្តាលស្តីពីគោលនយោបាយ និងអភិបាលកិច្ចល្អ នៅសាធារណរដ្ឋឥណ្ឌា

នារសៀលថ្ងៃទី១០ ខែកញ្ញា ឆ្នាំ២០២៥ មន្ត្រីរាជការចំនួន៤០រូប មកពីក្រសួង ស្ថាប័នចំនួន១០ នឹងចូលរួមវគ្គបណ្តុះបណ្តាលខ្លីនៅសាធារណរដ្ឋឥណ្ឌា។ វគ្គបណ្តុះបណ្តាលនេះ ធ្វើឡើងចាប់ពីថ្ងៃទី ១៥ ដល់ថ្ងៃទី ២៦ ខែកញ្ញា ឆ្នាំ ២០២៥ គឺជាព្រឹត្តិការណ៍ដ៏សំខាន់មួយទៀតក្នុងភាពជាដៃគូដែលកំពុងបន្តរវាង ឥណ្ឌា និងកម្ពុជា ក្នុងការបណ្តុះ បណ្តាលមន្ត្រីរាជការស៊ីវិល។

កម្មវិធីពង្រឹងសមត្ថភាពនេះត្រូវបានរៀបចំឡើងជាផ្នែកមួយនៃកម្មវិធីសហប្រតិបត្តិការបច្ចេកទេស និងសេដ្ឋកិច្ចឥណ្ឌា (ITEC) ក្រោមក្រសួងកិច្ចការបរទេស រដ្ឋាភិបាលនៃប្រទេសឥណ្ឌា ហើយនឹងក្លាយជាវគ្គបណ្តុះបណ្តាលឯកទេសលើក ទី ១១ ស្តីពីគោលនយោបាយ និងអភិបាលកិច្ច សាធារណៈសម្រាប់មន្ត្រីកម្ពុជា។ នៅឆ្នាំ 2023 បួនវគ្គដែលរួមមានមន្ត្រីរាជការ កម្ពុជាសរុបចំនួន 160 នាក់បានចូលរួមក្នុងកម្មវិធីបណ្តុះបណ្តាល នៅ NCGG ។ កិច្ចសហប្រតិបត្តិការនេះ បានពង្រីកបន្ថែមទៀតនៅឆ្នាំ 2024 គឺមានចំនួនប្រាំមួយវគ្គ ដែលផ្តល់អត្ថប្រយោជន៍ដល់ មន្ត្រីរាជការកម្ពុជាចំនួន 240 នាក់មកពីបណ្តាក្រសួងផ្សេងៗ។ បណ្តាមន្ត្រីរាជការ ដែលចូលរួមនាពេលនេះ គឺតំណាងឱ្យក្រសួងចំនួនដប់នៃរាជរដ្ឋាភិបាលកម្ពុជា រួមមាន ក្រសួងមុខងារសាធារណៈ ក្រសួងសុខាភិបាល ក្រសួង ពាណិជ្ជកម្ម។ល។

ក្នុងឱកាសនោះ ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ នៃព្រះរាជាណាចក្រកម្ពុជាបានអញ្ជើញចូលរួមជាអធិបតីភាព និង ឯកឧត្តម Vanlalvawna Bawitlung ឯកអគ្គរដ្ឋទូតនៃសាធារណរដ្ឋឥណ្ឌាបានលើកឡើងពីសារៈសំខាន់នៃការកសាងសមត្ថភាពក្នុងវិស័យ គោលនយោបាយសាធារណៈ ដើម្បីផ្តល់អភិបាលកិច្ចល្អ។ លោក បានលើកទឹកចិត្តមន្ត្រីកម្ពុជា ឱ្យបង្កើនបទពិសោធន៍សិក្សារបស់ខ្លួននៅក្នុងប្រទេសឥណ្ឌា និងក្លាយជាអ្នករួមចំណែកវិជ្ជមានដល់ការ រីកចម្រើននៃទំនាក់ទំនងទ្វេភាគីរវាងឥណ្ឌា និងកម្ពុជា។

ឯកឧត្តមឧបនាយករដ្ឋមន្រ្តី បានសម្តែងនូវការជឿជាក់យ៉ាងមុតមាំថា មន្រ្តីរាជការទាំង៤០រូប ដែលទទួលបានការបំពាក់បំប៉នចំណេះដឹង និងជំនាញពីសាធារណរដ្ឋឥណ្ឌានឹងប្រើប្រាស់ឱកាសដ៏មានតម្លៃនេះដើម្បីដកស្រង់ឧត្តមានុវត្តន៍និងបទពិសោធ ដើម្បីយកមកអភិវឌ្ឍនៅតាមក្រសួង ស្ថាប័នសាមីរបស់ខ្លួន ប្រកបដោយប្រសិទ្ធភាព និងស្របតាមបរិបទរបស់កម្ពុជា ហើយរួមចំណែកនូវកិច្ចខំប្រឹងប្រែងរបស់រាជរដ្ឋាភិបាលដើម្បីជាតិនិងប្រជាជនរបស់យើង។