មូលហេតុនៃការកើតមានវិបត្តិផ្លូវចិត្ត និងវិធីសាស្រ្តព្យាបាលដ៏មានប្រសិទ្ធិភាព

វិបត្តិផ្លូវចិត្ត គឺជាជំងឺបាក់ទឹកចិត្ត ដែលធ្វើឱ្យអ្នកមានអារម្មណ៍សោកសៅជាប់រហូត និងបាត់បង់ចំណាប់អារម្មណ៍ទៅលើអ្វីៗទាំងអស់ មិនថាសកម្មភាពដែលអ្នកធ្លាប់រីករាយជាមួយពីមុនមក ឬអានាគតដែលអ្នកតែងប៉ងប្រាថ្នា។ វា​​បង្ក​ឱ្យ​មានគំនិតអវិជ្ជមាន ​ពិបាក​ក្នុង​ការគិត បាត់បង់ការចងចាំ ឧស្សាហ៍ភ្លេចភ្លាំង មិនឃ្លានអាហារ និងប៉ះពាល់ដល់ដំណេកយ៉ាងខ្លាំង​។

មូលហេតុនាំឱ្យមានវិបត្តិផ្លូវចិត្ត រួមមាន ៖

• កត្តាហ្សែន – មានប្រវត្តិគ្រួសារនៃជំងឺបាក់ទឹកចិត្ត

• អតុល្យភាពនៅក្នុងប្រព័ន្ធបញ្ជូនសរសៃប្រសាទដូចជា Serotonin និង Dopamine ដែលទាំងពីរនេះដើរតួនាទីយ៉ាងសំខាន់ក្នុងការគ្រប់គ្រងអារម្មណ៍បាក់ទឹកចិត្ត

• ការផ្លាស់ប្តូរវដ្តជីវិតសំខាន់ៗ ដូចជា ការបាត់បង់ការងារ ការបែកបាក់ទំនាក់ទំនងស្នេហា មរណៈភាពមនុស្សជាទីស្រឡាញ់ ទទួលរងការរំលោភបំពាន មានបញ្ហាផ្នែកហិរញ្ញវត្ថុ ឬការប៉ះទង្គិចផ្លូវចិត្តជាញឹកញយ

• មានបុគ្គលក្ខណៈទុទិដ្ឋិនិយម តែងតែរិះគន់លើខ្លួនឯង

• កង្វះការគាំទ្រពីសង្គម ឬទទួលអារម្មណ៍ឯកា ដែលឃ្លាតឆ្ងាយដាច់ចេញពីក្រុមគ្រួសារ និងក្រុមមិត្តភក្តិ

• មានជំងឺរ៉ាំរ៉ៃ

• ការប្រើប្រាស់សារធាតុញៀន ដូចជា គ្រឿងស្រវឹង ឬគ្រឿងញៀនច្រើន

• ផលប៉ះពាល់នៃថ្នាំ ពោល ថ្នាំវេជ្ជសាស្រ្តមួយចំនូនខ្លះអាចប៉ះពាល់ដល់ផ្នែកអារម្មណ៍

ដូច្នេះហើយ ប្រសិនបើអ្នកកំពុងស្ថិតនៅក្នុងដំណាក់កាលនៃជំងឺបាក់ទឹកចិត្ត អ្នកគួរតែស្វែងរកវិធីសាស្រ្តព្យាបាលឱ្យបានឆាប់រហ័សបំផុត… ហើយវិធីសាស្រ្តទាំងអស់នោះ រួមមាន​ដូចជា ៖

• ធ្វើលំហាត់ប្រាណឱ្យបានទៀងទាត់ និងធ្វើសាមាធិ ព្រោះថាវាសារៈសំខាន់សម្រាប់ការរក្សាកាយសម្បទា និងជួយធ្វើឱ្យអារម្មណ៍ប្រសើរឡើង ធ្វើខួរក្បាលរបស់អ្នកស្រឡះល្អ គិតចេញអ្វីថ្មីៗ និងផ្លាស់ប្តូរទស្សនៈរបស់អ្នក។

• ទទួលទានរបបអាហារមានតុល្យភាព មានដូចជាបន្លែ និងផ្លែឈើធម្មជាតិ កាត់បន្ថយអាហារមានជាតិស្ករខ្ពស់ ឬអាហារជាតិខ្លាញ់។ បញ្ចូលអាហារូបត្ថម្ភបន្ថែម និងបង្កើតផែនការរបបអាហារសុខភាពឱ្យបានត្រឹមត្រូវតាមតម្រូវការរបស់អ្នក។

• ចៀសវាងគ្រឿងស្រវឹង និងគ្រឿងញៀន ៖ បើទោះបីជាការផឹកស្រា និងការជក់បារីអាចធ្វើឱ្យអ្នកមានអារម្មណ៍ធូរស្រាលក្នុងរយៈពេលខ្លីក៏ដោយ ក៏ប៉ុន្តែពួកវាអាចជះឥទ្ធិពលអវិជ្ជមានដល់សុខភាពផ្លូវកាយ និងផ្លូវចិត្តរបស់ក្នុងរយៈពេលយូរទៅថ្ងៃក្រោយ។

• គេងឱ្យបានគ្រប់គ្រាន់ សម្រាក និងបញ្ចូលថាមពលឡើងវិញ ដោយកំណត់អាទិភាពនៃការគេងពី 7 ទៅ 9 ម៉ោងជារៀងរាល់យប់ ដើម្បីអនុញ្ញាតឱ្យរាងកាយ និងចិត្តរបស់អ្នកបានសម្រាក។ អ្នកអាច Take Nap 30 នាទីនៅពេលថ្ងៃ ដើម្បីបង្កើនកម្លាំងផងដែរ។

• ព្យាយាមផ្តោតលើអារម្មណ៍វិជ្ជមាន ជាជាងអារម្មណ៍អវិជ្ជមាន។

• រក្សាទំនាក់ទំនងនៅក្នុងសង្គម និងស្វែងរកជំនួយពីអ្នកដទៃ ដោយនិយាយជាមួយក្រុមមិត្តភក្តិ ឬសមាជិកគ្រួសារណាម្នាក់ដែលអ្នកទុកចិត្តបំផុត និងអាចជួយឱ្យអ្នកមានអារម្មណ៍ធូរស្រាល។

• សូមផ្តល់ទស្សនៈល្អៗចំពោះខ្លួនឯងឱ្យបាន និងលើកទឹកចិត្តខ្លួនឯងថា ជា “មនុស្សពូកែ មនុស្សអស្ចារ្យ ខ្ញុំអាចជម្នះបានគ្រប់ឧបសគ្គទាំងអស់”។

• ជួបពិគ្រោះជាមួយគ្រូពេទ្យចិត្តសាស្រ្ត ដើម្បីទទួលការព្យាបាលតាមបែបវេជ្ជសាស្រ្តប្រកបដោយប្រសិទ្ធភាព។