រវាងទីក្រុង តូក្យូ និងទីក្រុង អូសាកា មួយណាជាជម្រើសល្អនៃទិសដៅទេសចរណ៍នៅក្នុងប្រទេសជប៉ុន

នៅពេលដែលអ្នកមានគម្រោងធ្វើដំណើរកំសាន្តទៅកាន់ប្រទេសជប៉ុន ប្រាកដណាស់ទីក្រុង តូក្យូ និងទីក្រុង អូសាកា ពិតជាមិនត្រូវបានមើលរំលងនោះទេ។ ទីក្រុងដ៏អស្ចារ្យទាំងពីរនេះមានទីតាំងផ្ទុយគ្នាដោយទីក្រុងតូក្យូស្ថិតនៅក្នុងតំបន់ Kanto (ភាគខាងកើត) ចំណែកឯទីក្រុងអូសាកាស្ថិតនៅក្នុងតំបន់ Kansai (ភាគខាងលិច) នៃប្រទេសជប៉ុន។ តំបន់ទាំងពីរនេះមានលក្ខណៈខុសគ្នា រួមមានវប្បធម៌ របទជីវិត ទេសភាព ភាសា និងប្រវត្តិសាស្ត្រនៃតំបន់!

ទីក្រុង តូក្យូ និងទីក្រុង អូសាកា – តំបន់ទេសចរណ៍ធម្មជាតិ

ទាំងតូក្យូ និងអូសាកា បានផ្តល់នូវបទពិសោធន៍ដ៏មិនគួរឱ្យជឿអំពីតំបន់ទេសចរណ៍លក្ខណៈធម្មជាតិ គួរឱ្យកោតសរសើរនៅក្នុងចិត្តអ្នកដំណើរគ្រប់រូប។ ខណៈ ទីក្រុងតូក្យូជាប់ឈ្មោះជាទីក្រុងវាលព្រៃបេតុង លោកអ្នកនឹងទទួលការភ្ញាក់ផ្អើលបំផុតនៅពេលបានឃើញបណ្តុំនៃរុក្ខជាតិបៃតងរាយប៉ាយនៅជុំវិញទីក្រុងមានដូចជា សួន Ueno, Shinjuku Gyoen, Kiba Park, Yoyogi Park, Hama Rikyu Garden, Kiyosumi Garden, Showa Memorial Park និង Imperial Palace East Gardens ព្រមទាំង គឺ ភ្នំ Fuji នៅតំបន់ Kawaguchiko បឹង Ashi នៅ Hakone និងទឹកធ្លាក់ Kegon ក្នុង Nikko គឺជាអច្ឆរិយៈធម្មជាតិនៅជិតទីក្រុងតូក្យូ។

រីឯ ទីក្រុងអូសាកា ក៏មានចំណែកមួយចំនួននៃតំបន់ធម្មជាតិក្នុងការទាក់ទាញភ្ញៀវទេសចរផងដែរ ទាំងនោះរួមមាន សួន Nakanoshima, Nagai Park, Tennoji Park, Nishinomaru Garden និង Shirokita Park ដែលផ្តល់ភាពស្រស់ស្អាតពីធម្មជាតិ។ ជុំវិញទីក្រុង Osaka មានភ្នំ Koya ស្ថិតនៅខេត្ត Wakayama និងកោះ Awaji គឺជាតំបន់ព្រៃប្រឹក្សាធម្មជាតិដែលអ្នកមិនគួរមើលរំលង។

ពេលវេលាដែលល្អបំផុតសម្រាប់ធ្វើដំណើរកំសាន្តទៅកាន់ ទីក្រុងតូក្យូ និងទីក្រុងអូសាកា

វាអាស្រ័យលើចំណូលចិត្តនៃអាកាសធាតុ និងព្រឹត្តិការណ៍ពិធីបុណ្យទៅតាមរដូវដែលអ្នកពេញ ប៉ុន្តែរដូវកាលទេសចរណ៍ល្អបំផុតក្នុងការធ្វើដំណើរទស្សនកិច្ច គឺស្ថិតនៅក្នុងនិទាឃរដូវ (រាប់ចាប់ពីខែមីនា – រហូតដល់ពាក់កណ្តាលខែមេសា) និងក្នុងរដូវស្លឹកឈើជ្រុះ (ខែកញ្ញា – រហូតដល់ពាក់កណ្តាលខែវិច្ឆិកា) ។ វេលាទាំងនោះ គឺជារដូវផ្ការីកស្គុះស្គាយ និងរដូវស្លឹកឈើជ្រុះប្របមាត់ផ្លូវ។

ទីកន្លែងដែលត្រូវទស្សនាដែលអ្នកមិនគួររំលង នៅពេលឈានជើងចូលទឹកដីទាំងពីរនេះ

ទីក្រុង តូក្យូ

• Akihabara និង Nakano Broadway – សម្រាប់ទំនិញគំនូរជីវចល ឧបករណ៍អេឡិចត្រូនិចជជុះ និងហ្គេមតុក្កតាអេឡិចត្រូនិច
• Imperial Castle Grounds – ទស្សនាសួនច្បារថ្ម ដែលភាគច្រើនគេស្គាល់ថា “Zen Garden” ដើម្បីស្វែងយល់អំពីចំណេះដឹងប្រវត្តសាស្រ្តរបស់ប្រទេសជប៉ុន
• Tokyo Tower, Tokyo Skytree និង Shibuya Sky – សម្រាប់ទស្សនាទិដ្ឋភាពទាំងមូលពីខាងលើនៃទីក្រុងតូក្យូ
• Harajuku និង Shin-Okubo – ជាតំបន់សម្បូរទៅដោយហាងលក់សម្លៀកបំពាក់ម៉ូដទាន់សម័យចុងក្រោយបង្អស់
• Sensoji Temple និង Nakamise Street – អ្នកអាចទស្សនាទៅលើសំណង់ស្ថាបត្យកម្មបុរាណតាមបែបប្រពៃណី និងស្វែងយល់អំពីទំនៀមទម្លាប់របស់ទីក្រុងតូក្យូ
• Shibuya Crossing – ជាផ្លូវឆ្លងកាត់ថ្មើរជើងដ៏មមាញឹកបំផុតនៅក្នុងពិភពលោក ដែលមានអ្នកថ្មើរជើងប្រមាណមួយលាននាក់ក្នុងមួយថ្ងៃ
• Tokyo Disneyland និង DisneySea – រំលឹកកុមារភាពជាមួយការចងចាំដ៏ល្អបំផុត និងធ្វើឱ្យសុបិន្តក្លាយជាការពិត
• Meiji Shrine – សម្រាប់ការបួងសួង និងគេចចេញពីភាពអ៊ូអររបស់មនុស្សជាច្រើន ដើម្បីស្រូបយកខ្យល់អាកាសបរិសុទ្ធជាមួយធម្មជាតិរស់រវើក

ទីក្រុង អូសាកា

• Dontonburi – ជាតំបន់កំសាន្តទេសចរណ៍មួយដែលពោរពេញទៅដោយភោជនីយដ្ឋានឆ្ងាញ់ៗ បាររាត្រី និងប្រភេទហាងនានាផ្សេងទៀត
• Osaka Temple – ស្វែងយល់ពីមូលដ្ឋាននៃទីកន្លែងតំណាងដ៏ល្បីល្បាញមួយរបស់ប្រទេសជប៉ុន
• Universal Studios Japan – សាកល្បងចំណាយពេលពេញមួយថ្ងៃជាមួយតួអង្គតុក្កតាជីវចល Mario, Harry Potter, Hello Kitty និង Minions
• Kaiyukan Aquarium – នាំមកនូវបទពិសោធន៍ទស្សនាទិដ្ឋភាពអាងចិញ្ចឹមត្រីដ៏ធំបំផុតនៅក្នុងពិភពលោក ហាក់ដូចអ្នកបានចូលខ្លួនទៅរស់នៅក្រោមបាតសមុទ្រជាមួយមច្ឆជាច្រើនប្រភេទ។
• Shinsaibashi – តំបន់ដើរទិញឥវ៉ាន់នៅក្នុងអូសាកាដែលពោរពេញទៅដោយហាងកាហ្វេ ជាពិសេសហាងម៉ាកយីហោជប៉ុនទាំងជាតិ និងអន្តរជាតិ
• Sumiyoshi Taisha – ទស្សនាទីសក្ការបូជា Shinto នេះដើម្បីស្វែងយល់ទៅលើសំណង់ស្ថាបត្យកម្មបុរាណរបស់វា