រីករាយចុងសប្តាហ៍ជាមួយទេសភាពកោះធម្មជាតិដ៏ស្រស់ស្អាតនៅក្នុងតំបន់អាស៊ី!

អនុញ្ញាតឱ្យខ្លួនឯងទទួលនូវសេចក្តីសុខផ្លូវចិត្ត និងផ្លូវកាយបន្ទាប់ពីថ្ងៃដ៏មមាញឹកពេញមួយសប្តាហ៍ជាមួយទេសភាពធម្មជាតិដ៏ស្រស់ស្អាតអមវាលខ្សាច់ឆ្នេរសមុទ្រពណ៌សក្បុស បន្ថែមដោយខ្យល់អាកាសបរិសុទ្ធប្រៀបដូចឋានសួគ៌លើដី។
ខាងក្រោមនេះ គឺជាប្រជុំកោះធម្មជាតិដែលមានទេសភាពស្រស់ស្អាតបំផុតប្រចាំតំបន់អាស៊ី… ឆ្នេរខ្សាច់វែងអន្លាយ ទឹកសមុទ្រថ្លាឆ្វង់ ព្រៃប្រឹក្សាធម្មជាតិដែលនាំមកនូវអារម្មណ៍ស្រស់បំព្រង បំភ្លេចរាល់ទុកកង្វល់ទាំងអស់ ៖

• កោះ Nusa Penida, ប្រទេសឥណ្ឌូនេស៊ី

វាមានទីតាំងនៅជិតកោះបាលី ដោយ Nusa Penida ត្រូវបានគេផ្តោតសំខាន់ទៅលើសម្រស់ធម្មជាតិរបស់វា។ ទីប្រជុំជនដែលភ្ញៀវទេសចរនិយមទៅកំសាន្តជាងគេនោះគឺ ឆ្នេរ Kelingking ដោយវាមានរូបរាងស្រដៀងសត្វ T-Rex ដែលហាក់កំពុងប្រុងប្រៀបលោតចូលទៅក្នុងសមុទ្រពណ៌ដ៏ថ្លាឆ្វង់។ លើសពី Kelingking, Nusa Penida មានឆ្នេរប្លែកៗជាច្រើនផ្សេងទៀតដូចជា Crystal Bay សម្រាប់អ្នកចូលចិត្តរលកទឹកស្ងប់ស្ងាត់។

• កោះ Siargao, ប្រទេសហ្វីលីពីន

កោះនេះមានទីតាំងនៅភាគអាគ្នេយ៍នៃប្រទេសហ្វីលីពីន ដែលវាគឺជាតំបន់ទេសចរណ៍ដ៏ពេញនិយម អមដោយឆ្នេរខ្សាច់ពណ៌សក្បុស ទឹកសមុទ្រថ្លាដូចកញ្ចក់ មានរលកសមុទ្រស្រស់ស្អាត និងខ្យល់អាកាសធម្មជាតិ។ នៅទីនោះរួមមាន “Cloud 9” ដែលជាកន្លែងជិះស្គីដ៏ល្បីល្បាញនៅលើកោះពោរពេញទៅដោយរលកខ្ពស់។ ភ្ញៀវទេសចរក៏អាចទៅកំសាន្តនៅឆ្នេរ Alegria គេងអាងថ្ងៃ ហែលទឹកសមុទ្រ ជ្រមុជទឹកមើលផ្កាសមុទ្រ…។ អ្នកអាចធ្វើដំណើរមកកាន់កោះ Siargao នៅអំឡុងខែមីនា ដល់ខែកញ្ញា ដើម្បីបញ្ចៀសរដូវភ្លៀង។

• កោះ Kood, ប្រទេសថៃ

កោះ Kood ប្រៀបដូចជាត្បូងពេជ្រលាក់កំបាំងរបស់ប្រទេសថៃ កោះនេះបានទាក់ទាញភ្ញៀវទេសចរដោយសម្រស់ស្រស់ស្អាត បរិយាកាសស្ងប់ស្ងាត់ និងមានដើមដូងជាច្រើនដុះហ៊ុំពទ្ធបានផ្តល់ម្លប់ត្រជាក់គ្មានដែនកំណត់។ នៅកោះ Kood មានឆ្នេរសមុទ្រជាច្រើន ដែលឆ្នេរនីមួយៗផ្តល់នូវបទពិសោធន៍ប្លែកៗខុសពីគ្នា ប៉ុន្តែឆ្នេរដ៏ពេញនិយមជាងគេគឺ ឆ្នេរ Klong Chao, ឆ្នេរ Bang Bao Bay និងឆ្នេរ Ao Phrao។

• កោះ Labuan Bajo, ប្រទេសឥណ្ឌូនេស៊ី

ភូមិនេសាទដ៏ស្ងប់ស្ងាត់នេះ ស្ថិតនៅចុងភាគខាងលិចនៃខេត្ត Nusa Tenggara ក្នុងប្រទេសឥណ្ឌូនេស៊ី ដែលត្រូវបានគេស្គាល់ និងពេញនិយមទៅទស្សនាកំសាន្តដោយសារតែមានទេសភាពធម្មជាតិដ៏ស្រស់ត្រកាល ជាពិសេសគឺបេតិកភណ្ឌវប្បធម៌ផ្ទាល់ខ្លួន។ ទីក្រុងនេះធ្លាប់ត្រូវបានប្រើសម្រាប់ការធ្វើពាណិជ្ជកម្មរវាងកុលសម្ព័ន្ធពីរ។ សព្វថ្ងៃនេះ វាបានវិវត្តទៅជាកន្លែងលំហែកាយប្រកបដោយសុខសន្តិភាព គេចចេញពីភាពអ៊ូអរនៃទីក្រុង។ Labuan Bajo មានទេសភាពភ្នំធម្មជាតិ ឆ្នេរខ្សាច់សក្បុស និងទឹកសមុទ្រថ្លា សាកសមបំផុតសម្រាប់ការរុករកជីវចម្រុះសមុទ្រ។

• កោះ Yao Noi, ប្រទេសថៃ

ប្រទេសថៃ សម្បូរទៅដោយកោះធម្មជាតិជាច្រើនដែលគួរឱ្យចង់ទៅទស្សនាកំសាន្ត រួមទាំងកោះ Yao Noi ធ្វើដំណើរដោយជិះទូកប្រហែលមួយម៉ោងប៉ុណ្ណោះពីកោះភូកេត ឬ កោះ Krabi ។ កោះនេះរុំព័ទ្ធដោយទឹកសមុទ្រពណ៌ខៀវខ្ចី និងឆ្នេរខ្សាច់ Phang Nga ធានាថាអ្នកនឹងទទួលបានអារម្មណ៍រីករាយជាខ្លាំងជាមួយនឹងកីឡាក្នុងទឹក ទស្សនាកសិដ្ឋានចិញ្ចឹមត្រីក្នុងតំបន់ រុករកចម្ការដូង និងដើមកៅស៊ូ… ។

• កោះ Kota Kinabalu, ប្រទេសម៉ាឡេស៊ី

Kota Kinabalu គឺជារដ្ឋធានីនៃ Sabah ប្រទេសម៉ាឡេស៊ី ហើយតំបន់នេះបានផ្តល់នូវសម្រស់ធម្មជាតិដ៏ស្រស់ស្អាតព្រមទាំងសត្វព្រៃ និងកន្លែងបេតិកភណ្ឌជាច្រើន អាហារឆ្ងាញ់ៗ និងមានអ្វីកំសាន្តជាច្រើនផ្សេងទៀត។ ឧទ្យាន Tunku Abdul Rahman Marine ជាឧទ្យានរដ្ឋដែលមានទីតាំងនៅឈូងសមុទ្រ Gaya (ចម្ងាយ 3គីឡូម៉ែត្រពីឆ្នេរសមុទ្រ Kota Kinabalu) ។ ឧទ្យាននេះមានកោះចំនួន 5 និងថ្មសមុទ្រ Reefs ព័ទ្ធជុំវិញ ជាដំណឹងល្អសម្រាប់អ្នកចូលចិត្តជ្រមុជទឹកមើលផ្កាថ្មស្រស់ស្អាត។