វត្តមានសៀវភៅ GOODGIRL នឹងបង្ហាញខ្លួនជាផ្លូវការនៅ Tsutaya Bookstore

Tsutaya Bookstore Cambodia នឹងធ្វើការសម្ពោធដាក់លក់សៀវភៅ “GOODGIRL” ក្រោមស្នាដៃនិពន្ធដោយ លោកស្រី អ៊ុង ប៉ីយ៉ាណេ ជាផ្លូវការនៅថ្ងៃសៅរ៍ ទី១៩ ខែកក្កដា ដែលមានទីតាំងនៅអ៊ីអនម៉លភ្នំពេញ ជាន់ទី ១ នៅរាជធានីភ្នំពេញ។ នៅក្នុងកម្មវិធីនេះទៀតសោត ក៏នឹងមានរួមបញ្ចូលនូវការសន្ទនាផ្ទាល់ជាមួយអ្នកនិពន្ធ ការចុះហត្ថលេខាលើសៀវភៅ និងការស្តាប់នូវប្រវត្តិដែលនាំឱ្យសៀវភៅមួយនេះត្រូវបានបង្កើតឡើង។

“GOODGIRL” គឺជាសៀវភៅដែលឆ្លុះបញ្ចាំងអំពីការបំបែកខ្លួនចេញពីការចូលចិត្តធ្វើអ្វី ដើម្បីតែបំពេញបំណងចិត្តរបស់អ្នកដទៃ ការអស់កម្លាំងផ្លូវចិត្ត និងសម្ពាធក្នុងការរស់នៅទៅតាមការរំពឹងទុករបស់អ្នកដទៃ ឱ្យងាកត្រឡប់មកស្វែងរក និងផ្ដោតសំខាន់លើគុណតម្លៃខ្លួនឯងវិញ។

ខ្លឹមសារដ៏សំខាន់នៅក្នុងសៀវភៅ GOODGIRL គឺជាការណែនាំមូលដ្ឋានគ្រឹះសំខាន់ៗចំនួន ៥ សម្រាប់រក្សាសុខុមាលភាពផ្ទាល់ខ្លួន៖
1. សុខុមាលភាពរាងកាយ
2. សុខុមាលភាពផ្លូវចិត្ត និងអារម្មណ៍
3. សហគមន៍
4. សុខុមាលភាពខាងវិញ្ញាណ
5. ចំណេះដឹងផ្នែកហិរញ្ញវត្ថុ

សៀវភៅ GOODGIRL បានជាប់ក្នុងលំដាប់ ១០០ នៅលើ Audible Australia ហើយលក់អស់យ៉ាងឆាប់រហ័សកំឡុងពេលចេញផ្សាយដំបូង ដែលធ្វើឱ្យលោកស្រី ប៉ីយ៉ាណេ ក្លាយជាអ្នកនិពន្ធជនជាតិខ្មែរដំបូងបង្អស់ក្នុងការសម្រេចបាននូវរឿងដ៏អស្ចារ្យនេះ។ ការបោះពុម្ពជាភាសាខ្មែរកំពុងស្ថិតក្នុងការអភិវឌ្ឍ និងចេញផ្សាយនាពេលឆាប់ៗ។

គួររម្លឹកថា លោកស្រី អ៊ុង ប៉ីយ៉ាណេ គឺជាសហគ្រិនជនជាតិខ្មែរដ៏មានសក្តានុពលមួយរូប ពោលគឺ លោកស្រី ជាម្ចាស់ស្ថាបនិកក្រុមហ៊ុន Nalia Skin ដែលជាម៉ាកយីហោថែរក្សាសម្រស់ផ្ដោតក្នុងការផ្ដល់ទំនុកចិត្តដល់អ្នកប្រើប្រាស់គ្រប់រូប និងជាវាគ្មិនសិក្ខាសាលា “I AM WORTHY” ដែលជាសិក្ខាសាលាស្តីអំពីការផ្ដល់តម្លៃឱ្យខ្លួនឯងទាំងក្នុងប្រទេសកម្ពុជា និងអូស្រ្ដាលី។ លោកស្រីក៏ជាគ្រូបង្វឹកផ្នែកសុខុមាលភាពផ្លូវចិត្ត និងជាអ្នកសម្របសម្រួលខាងសមាធិ ដែលមានវិញ្ញាបនបត្របញ្ជាក់ច្បាស់លាស់។