វិធីបន្ថែម “តែ” ទៅក្នុងទម្លាប់នៃការថែរក្សាសម្រស់របស់អ្នក

អស់រយៈពេលជាច្រើនសតវត្សមកហើយដែលរុក្ខជាតិ “តែ” គឺជាផ្នែកមួយនៃឱសថបុរាណ ត្រូវបានគេចាត់ទុកថាវាជាឱសថទិព្វដែលមិនអាចកាត់ថ្លៃបាន ក្នុងបណ្តាប្រទេសនៅតំបន់អាស៊ីមួយចំនួន ខណៈតែទាំងអស់នោះត្រូវបានគេប្រើប្រាស់ជាថ្នាំសម្រាប់ព្យាបាលរោគសញ្ញាក្រពះ ឬជំងឺផ្តាសាយ។

អ្វីដែលកាន់តែអស្ចារ្យទៅទៀតនោះ គឺអត្ថប្រយោជន៍របស់តែមិនត្រឹមតែកំណត់ទៅលើការព្យាបាលជំងឺតែប៉ុណ្ណោះទេ ប្រភេទតែមួយចំនួនក៏អាចបញ្ចូលទៅក្នុងវិធីថែរក្សាសម្រស់តាមបែបធម្មជាតិ ដើម្បីទទួលបានសម្រស់ស្រស់ស្អាតផងដែរ។

តែបៃតង

តែបៃតងមានលក្ខណៈសម្បត្តិប្រឆាំងនឹងការរលាកដ៏ល្អ សម្រាប់សុខភាពស្បែកដែលងាយរងប្រតិកម្ម ព្រោះវាជួយកាត់បន្ថយការរលាកក្រហម ក្រហាយ និងរមាស់ រួមមានក្នុងស្ថានភាពជំងឺមួយចំនួនដូចជា ជំងឺត្រអក ជំងឺស្បែករបកក្រហម និងបញ្ហាអង្គែ។

តែបៃតងក៏អាចចូលរួមការពារស្បែករបស់អ្នកដោយកម្ចាត់រ៉ាឌីកាល់សេរី ជាពិសេសរ៉ាឌីកាល់ពន្លឺព្រះអាទិត្យ… លើសពីនេះ វាគឺជាភ្នាក់ងារ Antibacterial ជួយព្យាបាលបញ្ហាមុន រន្ធញើសរីកធំ និងកាត់បន្ថយជាតិខ្លាញ់លើផ្ទៃមុខ។

តែខ្មៅ

វាត្រូវបានគេប្រើប្រាស់ តាំងពីរជ្ជកាល Ming ដោយសារតែវាសម្បូរទៅដោយ Tannins ដែលជាសារធាតុប្រឆាំងអុកស៊ីតកម្ម ជួយការពារស្បែករងការខូចខាតពីបរិស្ថានខាងក្រៅ ប្រឆាំងបាក់តេរី ផ្តល់សំណើម និងសារធាតុចិញ្ចឹមជាច្រើនដល់ស្បែក ។

ម្យ៉ាងទៀត វាមានជាតិកាហ្វេអ៊ីនខ្ពស់ក្នុងការរក្សាសំណើមសុខភាពស្បែក និងល្អបំផុតសម្រាប់ស្បែកដែលមានផ្ទុកជាតិខ្លាញ់លើស ហើយបន្ថែមពីលើនេះ វាក៏បានជួយកាត់បន្ថយស្នាមជ្រីវជ្រួញ និងស្នាមរង្វង់ភ្នែកខ្មៅយ៉ាងមានប្រសិទ្ធិភាព។

តែស

វាមានប្រភពមកពីរុក្ខជាតិដូចគ្នាជាមួយតែបៃតង ប៉ុន្តែតែសមានផ្ទុកជាតិកាហ្វេអ៊ីនច្រើន ដែលជួយឱ្យស្បែកស និងផ្តល់សំណើមដល់ស្បែក និងមានសារធាតុប្រឆាំងអុកស៊ីតកម្មខ្ពស់ជាងតែបៃតង។ តែសជាជំនួយដ៏មានឥទ្ធិពលអាចធ្វើឱ្យសម្រស់មើលទៅក្មេងជាងវ័យ វាក៏មានសមត្ថភាពប្រឆាំងនឹងរ៉ាឌីកាល់សេរី ព្រមទាំងជួយថែរក្សា Collagen និង Elastin នៅក្នុងរាងកាយ។

តែក្រហម

វាត្រូវបានគេស្គាល់ផងដែរថាជា Rooibos មានផ្ទុកនូវវីតាមីន C និងវីតាមីន E ក៏ដូចជាសារធាតុ Flavonoids ។ វាអាចកម្ចាត់បាក់តេរី និងការរលាកដែលធ្វើឱ្យតែក្រហមក្លាយទៅជាការព្យាបាលដ៏ល្អបំផុតសម្រាប់ស្បែកមុខមានបញ្ហាមុន។