ខ្មែរ
English
នៅថ្ងៃទី ១ ខែសីហា ឆ្នាំ២០២៥ សមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA) បានរៀបចំសិក្ខាសាលាបណ្ដុះបណ្ដាលសម្រាប់អ្នកសារព័ត៌មាន និងអ្នកបង្កើតមាតិកា។ សិក្ខាសាលានេះមានចំណងជើងថា «វិស័យធនាគារ និងហិរញ្ញវត្ថុ និងចំណេះដឹងផ្នែកហិរញ្ញវត្ថុប្រចាំឆ្នាំ២០២៥»។
គោលបំណងចម្បងនៃព្រឹត្តិការណ៍នេះ គឺដើម្បី បង្កើនចំណេះដឹង ជួយឲ្យអ្នកសារព័ត៌មាន និងអ្នកបង្កើតមាតិកាយល់ដឹងកាន់តែស៊ីជម្រៅអំពីវិស័យធនាគារ និងហិរញ្ញវត្ថុ និង កសាងទំនាក់ទំនងល្អរវាងអ្នកជំនាញក្នុងវិស័យហិរញ្ញវត្ថុ និងអ្នកសារព័ត៌មាន។
សិក្ខាសាលានេះមានការអញ្ជើញចូលរួមដោយ ឯកឧត្តម គឹម គុណវឌ្ឍន៍ រដ្ឋលេខាធិការក្រសួងព័ត៌មាន លោក ឌិត សុចល តំណាងសមាគមធនាគារនៅកម្ពុជានិងសមាគមមីក្រូហិរញ្ញវត្ថុកម្ពុជា លោកបណ្ឌិត ឡាយ សុខហេង ឧបការីទេសាភិបាលនិងជាអគ្គនាយកបទប្បញ្ញត្តិនិងបរិយាបន្នហិរញ្ញវត្ថុ លោក កាំង តុងងី ប្រធាននាយកដ្ឋានទំនាក់ទំនងនៃសមាគមហិរញ្ញវត្ថុកម្ពុជា លោក សុខ ចាន់ នាយកបរិយាបន្នហិរញ្ញវត្ថុ និងទំនាក់ទំនងសាធារណៈនៃសមាគមធនាគារនៅកម្ពុជា អ្នកសារព័ត៌មាននិងអ្នកផលិតមាតិកា ជាច្រើនរូបនាក់ ។
លោក ឌិត សុចល តំណាងសមាគមធនាគារនៅកម្ពុជានិងសមាគមមីក្រូហិរញ្ញវត្ថុកម្ពុជា ក៏បានលើកឡើងដែរថា សិក្ខាសាលាបណ្តុះបណ្តាលនេះ រៀបចំឡើងក្នុង គោលបំណងជួយលើកកម្ពស់ការយល់ដឹងជាមូលដ្ឋាននៃវិស័យហិរញ្ញវត្ថុដល់អ្នកសារព័ត៌មាន។
ចំណែកឯ ឯកឧត្តម គឹម គុណវឌ្ឍន៍ រដ្ឋលេខាធិការក្រសួងព័ត៌មាន បានគូសបញ្ជាក់ថា វិស័យធនាគារ និងហិរញ្ញវត្ថុនៅកម្ពុជាបានរីកចម្រើនយ៉ាងខ្លាំងក្នុងរយៈពេលជាង ២ ទសវត្សរ៍ចុងក្រោយនេះ ដែលបានរួមចំណែកដល់កំណើនសេដ្ឋកិច្ច និងការកាត់បន្ថយភាពក្រីក្រ។ទន្ទឹមនឹងការរីកចម្រើននេះ តម្រូវឱ្យមានការទទួលខុសត្រូវខ្ពស់ពីគ្រប់ភាគីពាក់ព័ន្ធ ដែលជះឥទ្ធិពលខ្លាំងលើការយល់ដឹងរបស់សាធារណជន ។
ហេតុដូច្នោះហើយទើប ឯកឧត្តមបានលើកឡើងទៀតថា អ្នកសារព័ត៌មាន និងអ្នកបង្កើតមាតិកាដើរតួនាទីយ៉ាងសំខាន់ក្នុងការផ្សព្វផ្សាយព័ត៌មាន និងចំណេះដឹងផ្នែកហិរញ្ញវត្ថុដល់សាធារណជន ដើម្បីជួយពួកគេក្នុងការសម្រេចចិត្តប្រកបដោយទំនុកចិត្ត។
លោកបណ្ឌិត ឡាយ សុខហេង ឧបការីទេសាភិបាលនិងជាអគ្គនាយកបទប្បញ្ញត្តិនិងបរិយាបន្នហិរញ្ញវត្ថុ ក៏បានសង្កត់ធ្ងន់ពីសារៈសំខាន់នៃសារព័ត៌មាន ដែលជាផ្នែកមួយមិនអាចខ្វះបានក្នុងជីវិតប្រចាំថ្ងៃរបស់ប្រជាពលរដ្ឋ សម្រាប់ការទទួលបានព័ត៌មានសំខាន់ៗអំពីព្រឹត្តិការណ៍សេដ្ឋកិច្ច សង្គម និងការកម្សាន្ត។
