សិល្បការីនីខ្មែរម្នាក់ បានច្រៀងចម្រៀងរបស់ខ្លួនជាភាសាកូរ៉េ បង្កការចាប់អារម្មណ៍ពីទស្សនិកជនយ៉ាងខ្លាំង

មិនត្រឹមតែមាន លោក វណ្ណដា ដែលបានពាំនាំសិល្បៈខ្មែរទៅកាន់ឆាកអន្តរជាតិក្រៅប្រទេសនោះទេ ថ្មីៗនេះតារាចម្រៀងស្រីសម្លេងស្រាលស្រទន់ម្នាក់ ឈ្មោះ ចិត្ត កញ្ចនា បានច្រៀងចម្រៀងផ្ទាល់របស់ខ្លួនជាភាសាកូរ៉េ បង្កការភ្ញាក់ផ្អើលពីសំណាក់ទស្សនិកជន និងផ្ទុះការចាប់អារម្មណ៍ជាខ្លាំងនៅក្នុងឆាកកម្មវិធី ASEAN Korea Music Festival – 2024 Round។

នៅលើឆាកតន្រ្តីអន្តរជាតិដ៏មានអនុភាព ពោរពេញទៅដោយសម្រែកសាទរ កញ្ចនា បានជ្រើសយកចម្រៀងស្នេហ៍យ៉ាងលន្លង់លន្លោចមួយបទ មានចំណងជើងថា “Missing You” មកសម្តែងនៅក្នុងកម្មវិធីដោយច្រៀងដំបូងជាភាសាខ្មែរ (ភាសាដើម) ក្រោយមកកញ្ញាក៏បាននិយាយជាសារធារណៈអំពីការច្រៀងចម្រៀងរបស់ខ្លួនបកប្រែទៅជាភាសាកូរ៉េ ដើម្បីទុកជាកាដូជូនដល់ទស្សនិកជនក្នុងកម្មវិធីទាំងអស់បានយល់អំពីអត្ថន័យដ៏ជ្រាលជ្រៅ។

មហាជនកូរ៉េដែលបានចូលរួមក្នុងកម្មវិធី មានភាពស្រឡាំងកាំងចំពោះទេពកោសល្យរបស់កញ្ញា ដែលអាចច្រៀងជាភាសាកូរ៉េបានជាមួយសម្រែកស្រាលស្រទន់ តុងបញ្ចេញសម្លេង និងការលើកដាក់ឃ្លាឃ្លោងបានយ៉ាងល្អឥតខ្ចោះ។ មិនត្រឹមតែប៉ុណ្ណោះ ពួកគេក៏បានកោតសរសើរអំពីទឹកដមនៃសំនៀងរបស់កញ្ញាជាមួយបទផ្សេងៗទៀតផងដែរ នេះហាក់បង្ហាញឱ្យឃើញថាសមត្ថភាពនៃសិល្បករ សិល្បការីនីខ្មែរពិតជាមិនធម្មតា… អាចទាមទារចំណាប់អារម្មណ៍ជាលក្ខណៈអន្តរជាតិ និងបានពាំនាំនូវសិល្បៈតន្រ្តីខ្មែរទៅប្រទេសខាងក្រៅ។

ដូចប្រិយមិត្តបានដឹងស្រាប់ហើយថា តារាចម្រៀង ចិត្ត កញ្ចនា គឺជាតារាចម្រៀងស្រី Original ខ្មែរ ដែលបានឆក់យកបេះដូងយុវវ័យគ្រប់រូបតាមរយៈសំនៀងស្រាលស្រទន់របស់ខ្លួន អមជាមួយអត្ថន័យនៃចម្រៀងផ្ទាល់ខ្លួន ទើបធ្វើឱ្យកេរ្តិ៍ឈ្មោះរបស់នាងល្បីសុះសាយទូទាំងប្រទេសរហូតមកដល់បច្ចុប្បន្ន ជាពិសេសគឺបទ “Missing You” និងបទ “អ្នកដទៃ”។

@satsothearith ប្រជាជនកូរ៉េមានការភ្ញាក់ផ្អើលជាខ្លាំងនៅពេលដែលគាត់ច្រៀងបទខ្លួនឯងជាភាសាកូរ៉េ😮 #satsothearith #cambodia ♬ suara asli – 𝘼𝙑𝙀𝙀𝙋𝙇𝘼𝙔𝙀𝙍 – 𝘼𝙑𝙀𝙀𝙋𝙇𝘼𝙔𝙀𝙍🎧