សំបុកសត្វកុកពាក់អំបោះចំនួន៥ និងកូនចំនួន៩ក្បាល ត្រូវបានគេរកឃើញនៅដែនជម្រកសត្វព្រៃលំផាត់

កុកពាក់អំបោះ ឬសត្វ ក ស ត្រូវបានចាត់ចូលក្នុងបញ្ជីក្រហមពិភពលោក របស់អង្គការ IUCN ថាជាប្រភេទសត្វជិតរងការគំរាមកំហែង ហើយចំនួនរបស់វានៅលើពិភពលោកកំពុងមានការធ្លាក់ចុះអាស្រ័យដោយការរំខានពីមនុស្ស ការបរបាញ់ និងការបាត់បង់ទីជម្រកជាដើម។ កុកពាក់អំបោះ (Woolly-necked Stork) ជាប្រភេទបក្សីដែលនិយមរស់នៅតំបន់ដីសើម ជាពិសេសនៅតាមបណ្ដាខេត្តជាប់ទន្លេសាបនៃប្រទេសកម្ពុជា។ កន្លែងពងកូនធំជាងគេរបស់កុកពាក់អំបោះ គឺស្ថិតនៅតំបន់ព្រែកទាល់ ក្នុងបឹងទន្លេសាប។

អង្គការជីវិតធម្មជាតិនៅកម្ពុជា (NatureLife Cambodia) បានឱ្យដឹងថាដែនជម្រកសត្វព្រៃលំផាត់ ខេត្តរតនគិរី ជាទីតាំងជម្រកដ៏សំខាន់ និងមានសុវត្ថិភាពរបស់បក្សីប្រភេទនេះ និងជីវចម្រុះដទៃផ្សេងទៀត។ បក្សីដ៏គួរឱ្យស្រឡាញ់នេះត្រូវបានរកឃើញមានការបន្តពូជជារៀងរាល់ឆ្នាំនៅដែនជម្រកសត្វព្រៃលំផាត់។

ប្រភពខាងលើនេះបានបញ្ជាក់បន្ថែមថានារដូវបន្តពូជរបស់បក្សីនេះ គឺចាប់ពីខែកក្កដា រហូតដល់ខែធ្នូ ពួកវាចូលចិត្តធ្វើសំបុកលើដើមឈើធំៗ ដែលដុះនៅតាមមាត់ទន្លេ ឬអូរ។ ក្នុងរដូវបន្តពូជឆ្នាំ២០២៤នេះ គិតមកត្រឹមខែតុលាឆ្នាំ២០២៤ សំបុកសត្វកុកពាក់អំបោះចំនួន ៥សំបុកនិងមានកូនសរុបចំនួន ៩ក្បាល ត្រូវបានកត់ត្រាបាននៅដែនជម្រកសត្វព្រៃលំផាត់ដែលជាទីតាំងដែលយើងបានធ្វើការអភិរក្សនិងការពារយ៉ាងសកម្មតាមរយ:គម្រោងរេដបូក។

គួរបញ្ជាក់ថាបក្សីប្រភេទនេះរស់នៅតាមទំនាបលិចទឹក និងតំបន់ដីសើមក្នុងព្រៃល្បោះ។កុកពាក់អំបោះមានទំហំចាប់ពី៧៥-៩១សង់ទីម៉ែត្រ ហើយខ្លួនទាំងមូលរបស់វាមានពណ៌ខ្មៅរលោង លើកលែងតែ ក ផ្នែកខាងក្រោមពោះ និងក្រោមកន្ទុយរបស់វាមានពណ៌ស៕

ប្រភព ៖ AKP