ស្វែងយល់ពីតម្លៃនៃម៉ាកប្រណីត៖ គុណភាព សិល្បៈហត្ថកម្ម និងកិត្យានុភាព

ថ្មីៗនេះបណ្តាញព័ត៌មាន Indian News Channel បានចេញផ្សាយ រឿងរ៉ាវស្តីពីការស៊ើបអង្កេតរបស់ប្រទេសអ៊ីតាលីលើតម្លៃផលិតផលរបស់ម៉ាកប្រណីត បង្ហាញពីភាពខុសគ្នារវាងតម្លៃផលិតកម្ម និងតម្លៃលក់រាយ។ អត្ថបទខាងក្រោមនេះ នឹងបង្ហាញពីគុណតម្លៃនៅពីក្រោយស្លាកតម្លៃនៃម៉ាកប្រណីត៖

ភាពទាក់ទាញនៃម៉ាកយីហោប្រណិតគឺ មិនត្រឹមតែនៅលើគុណភាពនៃផលិតផលរបស់ពួកគេប៉ុណ្ណោះទេ ប៉ុន្តែគុណតម្លៃអរូបីផ្នែកអារម្មណ៍ ដែលម្ចាស់ប្រេនផ្តល់ជូនអតិថិជនរបស់ពួកគេ។ បើទោះជាសង្វាក់ផលិតកម្ម អាចមានតម្លៃទាប តែស្លាកកំណត់តម្លៃចុងក្រោយនៃផលិតម៉ាកប្រណីត គឺសម្រាប់ឆ្លុះបញ្ចាំងលើកត្តាជាច្រើនដែលលើកកំពស់គុណតម្លៃនៃផលិតផល លើសពីមុខងារសម្រាប់តែប្រើប្រាស់តែមួយមុខ។

ទីមួយ ម៉ាកយីហោប្រណិត បានវិនិយោគយ៉ាងច្រើនក្នុងការស្រាវជ្រាវ និងអភិវឌ្ឍន៍ ដោយធានាថាផលិតផលរបស់ពួកគេ បានធ្វើបរិយាបន្នលើការច្នៃប្រតិដ្ឋចុងក្រោយ រួមផ្សំនឹងការរចនាម៉ូតដ៏ទំនើបបំផុតផងដែរ។ ការប្តេជ្ញាចិត្តរបស់ម្ចាស់ម៉ាកចំពោះឧត្តមភាពនេះ ត្រូវបានឆ្លុះបញ្ចាំង តាមរយៈការយកចិត្តទុកដាក់ ភាពម៉ត់ចត់ ការត្រួតពិនិត្យរាល់ព័ត៌មានលម្អិត និងការជ្រើសប្រើប្រាស់សម្ភារៈកម្រិតខ្ពស់ ហើយការណ៍នេះហើយ ដែលបានខ័ណ្ឌចែកភាពខុសគ្នានៃផលិតផលម៉ាកប្រណីត ដាច់ពីផលិតផលទូទៅ។

ជាងនេះទៅទៀត ម៉ាកយីហោប្រណិត តែងផ្អែកលើលក្ខណៈពិសេស ដែលត្រូវបានបន្សល់ទុកមកគ្រប់ជំនាន់នូវប្រវត្តិដ៏សម្បូរបែប នៃសិល្បៈហត្ថកម្ម និងប្រពៃណី។ តម្លៃនៃកេរដំណែលទាំងនេះ គឺគេមិនអាចគណនាបានទេ ប៉ុន្តែវាអាចត្រូវបានគេមើលឃើញនៅគ្រប់ស្នាមកាត់ ថ្នេរដេរ ដែលត្រូវបានគេធ្វើឡើងយ៉ាងផ្ចិតផ្ចង់នឹងលំអិតបំផុត សម្រាប់ចម្រាញ់ចេញនូវផលិតផលសម្រេច។ គ្រប់ផលិតភាពនៃផលិតផលម៉ាកប្រណិត ត្រូវបានគេយកចិត្តទុកដាក់ចំពោះភាពល្អឥតខ្ចោះ មិនថាតែលើចំនុចតូចតាចនោះទេ ផ្គួបជាមួយនឹងជំនាញដ៏អស្ចារ្យផងនោះ បានធ្វើឲ្យគុណតម្លៃនៃផលិតផលម៉ាកប្រណីត មានតម្លៃមិនអាចកាត់ថ្លៃបាន។

លើសពីនេះ ម៉ាកយីហោប្រណិតផ្តល់នូវកម្រិតនៃសេវាកម្មអតិថិជនរបស់ខ្លួនខុសពីគេ ដោយពួកគេផ្តល់នូវការយកចិត្តទុកដាក់ជាពិសេស និងផ្តល់ជូននូវបទពិសោធន៍ដ៏ល្អឥតខ្ចោះ ដែលជំរុញឱ្យមានទំនាក់ទំនងយ៉ាងស៊ីជម្រៅជាមួយអតិថិជនរបស់ពួកគេ។

ជាចុងក្រោយ តម្លៃនៃទំនិញម៉ាកប្រណីត ក៏អាចជះឥទ្ធិពលយោងតាមកេរ្តិ៍ឈ្មោះ កិត្យានុភាព និងភាពផ្តាច់មុខរបស់ម៉ាកយីហោនោះផងដែរ។ តម្លៃនៃការក្លាយជាម្ចាស់នៃទំនិញម៉ាកប្រណិតណាមួយ គឺមិនត្រឹមតែនៅលើមុខងាររបស់វានោះទេ ប៉ុន្តែក៏បង្ហាញពីស្ថានភាពនៃការរស់នៅក្នុងសង្គម ភាពទំនើបទាន់សម័យ និងរសនិយមផងដែរ។

សរុបមក បើទោះតម្លៃនៃការផលិត អាចនៅមានកម្រិតទាប ប៉ុន្តែតម្លៃនៃទំនិញប្រណិតសម្រាប់ផលិតផលសម្រេច បង្ហាញពីអន្តរកម្មយ៉ាងស្មុគស្មាញនៃកត្តាដែលបញ្ផាក់ពីគុណតម្លៃរបស់ផលិតផល ក្នុងការផលិតឡើងផ្តាច់មុខនូវផលិតផលទាំងនេះ។ ម៉ាកយីហោប្រណីត ផ្តល់ជូននូវការរួមបញ្ចូលគ្នាតែមួយគត់នៃគុណភាព សិល្បៈហត្ថកម្ម បេតិកភណ្ឌ កិត្យានុភាព និងសេវាកម្មអតិថិជន ដែលចំនុចទាំងអស់នេះហើយ ដែលរួមចំណែកធ្វើឲ្យផលិតផលម៉ាកប្រណិត មានតម្លៃកាន់តែខ្ពស់ដូចដែលម្ចាស់ម៉ាកនិមួយៗបានកំណត់ឡើង។