ស្វែងយល់អំពីជំងឺធ្លាក់ទឹកចិត្ត និងជំងឺវង្វេង – Alzheimer

ជំងឺធ្លាក់ទឹកចិត្ត និងជំងឺវង្វេង គឺជាប្រភេទជំងឺ ពីរ ផ្សេងដាច់ពីគ្នា។

ជំងឺធ្លាក់ទឹកចិត្ត ជាជំងឺដែលទាក់ទងទៅនឹងបញ្ហាផ្លូវចិត្ត រីឯជំងឺវង្វេង – Alzheimer ត្រូវបានចាត់ថ្នាក់ជាជំងឺដែលពាក់ព័ន្ធជាមួយប្រព័ន្ធប្រសាទ ឬការចងចាំ ហើយជំងឺនេះច្រើនតែកើតចំពោះមនុស្សមានវ័យចំណាស់។

អ្នកជំងឺធ្លាក់ទឹកចិត្ត រួមមានរោគសញ្ញា ដូចជា មានអារម្មណ៍បាក់ទឹកចិត្ត អស់សង្ឃឹម ​ពិបាក​ចិត្ត​ជាប់​រហូត បាត់បង់ភាពរីករាយ ឬ​ចំណង់​ចំណូល​ចិត្ត អារម្មណ៍មិនមូល អស់កម្លាំង គេងមិនលក់ និងបាត់បង់ចំណាប់អារម្មណ៍ក្នុងការធ្វើសកម្មភាពក្នុងរយៈពេលយូរ។

ចំពោះ រោគសញ្ញាជំងឺវង្វេង រួមមាន ការចងចាំចុះខ្សោយ ឧស្សាហ៍ភ្លេចភ្លាំង ការវិនិច្ឆ័យថយចុះ ពិបាកក្នុងការធ្វើទំនាក់ទំនង និងផ្លាស់ប្តូរបុគ្គលិកលក្ខណៈ ទាំងអារម្មណ៍ ឬ អាកប្បកិរិយាទាំងស្រុង។

ខណៈ ដែលជំងឺទាំងពីរនេះ​មាន​លក្ខណៈ​ និងរោគសញ្ញាស្រដៀង​គ្នាច្រើន​ ដូច្នេះហើយ វា​ពិតជា​សំខាន់ណាស់​ក្នុង​ការ​កត់​សម្គាល់​ទៅលើ ការផ្លាស់ប្តូរអារម្មណ៍ អាកប្បកិរិយា និងសមត្ថភាពក្នុងការបំពេញមុខងារ ដើម្បីបែងចែកប្រភេទនីមួយៗឱ្យដាច់ពីគ្នា។

ប្រសិនបើអ្នកកត់សម្គាល់ថា ខ្លួនកំពុងមានរោគសញ្ញាខាងលើ សូមស្វែងរកជំនួយជាបន្ទាន់ ដោយធ្វើការពិគ្រោះជាមួយវេជ្ជបណ្ឌិត ដើម្បីធ្វើរោគវិនិច្ឆ័យ និងព្យាបាលឱ្យបានត្រឹមត្រូវ ។

សកម្មភាពមួយចំនួនដែលអ្នកអាចជួយដល់អ្នកជំងឺធ្លាក់ទឹកចិត្ត ឬអ្នកជំងឺវង្វេង បាន ៖

• ផ្តល់ការលើកទឹកចិត្ត តាមរយៈចូលរួមសកម្មភាពបង្កើតបរិយកាសរីករាយ
• បង្កើតនូវបរិយាកាសដែលមានផាសុកភាព និងបង្កើនអារម្មណ៍កក់ក្តៅចំពោះពួកគេ
• ផ្តល់ការគាំទ្រផ្នែកអារម្មណ៍ និងការពង្រឹងការគិតវិជ្ជមានឱ្យបានច្រើន
• កុំដាក់សម្ពាធ កាត់បន្ថយភាពតានតឹង និងអារម្មណ៍ថប់បារម្ភជ្រុលហួសហេតុដល់ពួកគេ
• ផ្តល់ជាជំនួយ ចំពោះអ្វីដែលអ្នកជំងឺកំពុងខ្វះខាត ដូចជាការស្រលាញ់ ការយកចិត្តទុកដាក់​ ជាដើម…

អ្នកជំងឺក៏គួរយកចិត្តទុកដាក់ចំពោះសុខុមាលភាពផ្ទាល់ខ្លួនផងដែរ ដូចជា ៖

• ត្រូវស្វែងរកជំនួយពីក្រុមគ្រួសារ មិត្តភក្តិ និងសមាគមន៍ថែទាំគាំពារសុខុមាលភាពផ្លូវចិត្ត
• ពិចារណាលើការថែទាំសង្គ្រោះបណ្តោះអាសន្ន
• បើកចិត្តទទួលយកការគាំទ្រពីមនុស្សជុំវិញខ្លួន និងព្យាយាមដោះលែងផ្លូវចិត្តម្តងបន្តិចៗ