ខ្មែរ
English
ក្រមាគឺជាស្នាដៃសិប្បកម្មត្បាញដែលដូនតាខ្មែរ បានបន្សល់ទុកសម្រាប់ជាកេរ្ត៍តំណែលតកូនចៅជាច្រើនជំនាន់មកហើយ ពីព្រោះជាផលិតផលសិប្បកម្មតម្បាញ ដែលមានអត្ថប្រយោជន៍ប្រើប្រាស់ច្រើនយ៉ាង ក្នុងជីវភាព ប្រចាំថ្ងៃរបស់ប្រជាជនខ្មែរគ្រប់ស្រទាប់វណ្ណៈ ។
កាលពីយប់ថ្ងៃទី០៤ ខែធ្នូ ឆ្នាំ២០២៤ ម៉ោងនៅកម្ពុជា មរតកវប្បធម៌ខ្មែរមួយទៀតត្រូវបានទទួលស្គាល់កម្រិតពិភពលោកជាសម្បត្តិបេតិកភណ្ឌរួមរបស់ពិភពលោក។ ក្រមាជាវត្ថុប្រើប្រាស់ ធ្វើពីសសៃកប្បាស ឬសូត្រត្បាញជាក្រណាត់ ដែលមានវត្តមាននៅស្ទើរគ្រប់សកម្មភាពរបស់ប្រជាជនខ្មែរយើងតាំងពីបូរាណកាល។ ក្រមាមានប្រវត្តិ និងបានចាក់ឫសក្នុងសង្គមខ្មែរយ៉ាងរឹងមាំ ដែលជាផ្នែកមួយនៃអត្តសញ្ញាណជាតិ។
កាលពីឆ្នាំ២០១៨ កម្ពុជាក៏ធ្លាប់បានបង្កើតភាពអស្ចារ្យតាមរយៈការត្បាញក្រមាវែងជាងគេ បំបែកកំណត់ត្រាពិភពលោក។ ក្រមា ប្រវែង ១.១៤៩,៨ ម៉ែត្រ ត្រូវបានចូលរួមត្បាញមួយសសៃរៗដោយប្រជាពលរដ្ឋមកពីគ្រប់ទិសទី រាប់តាំងពីព្រះមហាក្សត្រ និងសម្តេចយាយជាទីសក្ការៈដ៏ខ្ពង់ខ្ពស់បំផុត ថ្នាក់ដឹកនាំ ចាស់ព្រឹទ្ធាចារ្យ និងកុមារតូចៗ រហូតក្លាយជាសមិទ្ធផលដ៏អស្ចារ្យមួយដែលពុំដែលមានពីមុនមក។
ការចុះបញ្ជីនេះគឺជាមោទនភាពថ្មីមួយទៀតរបស់កម្ពុជា ដែលបានសម្រេចនូវសមិទ្ធផលសម្រាប់ប្រជាជាតិ និងប្រជាជនកម្ពុជាទាំងមូល។ នេះគឺជាការផ្តល់នូវតម្លៃចំពោះកម្ពុជា និងសហគមន៍អន្តរជាតិ ក្នុងការថែរក្សា ការពារ និងលើកតម្កើង គុណតម្លៃ «ក្រមា» ទុកជាកេរមរតកសម្រាប់មនុស្សជាតិជំនាន់ក្រោយតរៀងទៅផងដែរ។
