ខ្មែរ
English
កម្មវិធីបោះឆ្នោតជ្រើសរើសប្រធានសមាគមសិល្បករខ្មែរ ដែលបានប្រព្រឹត្តទៅនាព្រឹកថ្ងៃទី២ ខែឧសភា ឆ្នាំ២០២៤ បានដំណើរការ និងបញ្ចប់ទៅដោយរលូន ប្រកបជាមួយភាពអធិកអាធមបំផុត ក្រោមការជាប់ឈ្មោះ លោកជំទាវអ្នកឧកញ៉ា ម៉ៅ ចំណាន ជាប្រធានសិល្បករខ្មែរអាណត្តទី៦ ដោយមានការចូលរួមបោះឆ្នោតជាអសាកលពីសិល្បករ-សិល្បការិនីកម្ពុជាប្រមាណជាង ៦០០រូប។
បន្ទាប់ពីខកខានបោះឆ្នោតជ្រើសរើសប្រធានថ្មី កាលពីអាណត្តមុនកន្លងទៅ ដោយសារតែវិបត្តិនៃជំងឺកូវីដ-១៩ សាមាគមសិល្បៈ ចំណុះក្រសួងវប្បធម៌ និងវិចិត្រសិល្បៈ បានធ្វើការរៀបចំឡើងវិញនូវពិធីបោះឆ្នោតជ្រើសរើសប្រធានសមាគមសិល្បករខ្មែរ នាឯរាជបណ្ឌិត្យសភាកម្ពុជា (អាគារខេមរវិទូ) ដោយមានបេក្ខភាពឈរឈ្មោះតំណាងចំនួន៣រូប រួមមាន ៖ លោកជំទាវអ្នកឧកញ៉ា ម៉ៅ ចំណាន (អតីតតារាសម្តែង), លោក ផាត់ ដារ៉ារដ្ឋ និងលោក គួច ខេវិន។
ប៉ុន្តែ សន្លឹកឆ្នោតគាំទ្រដែលមានការផ្ទុះឡើងខ្លាំងជាងគេនោះគឺ លោកជំទាវអ្នកឧកញ៉ា ម៉ៅ ចំណាន ដែលទទួលបានសំឡេងគាំទ្ររហូតដល់ ៥២៧សំឡេង ស្មើនឹង ៩៣ %។ សិល្បករ-សិល្បការិនីជាច្រើនហាក់ដូចជាបានបង្ហាញនូវការគាំទ្រយ៉ាងពេញទំហឹង និងសាទរបំផុតចំពោះលទ្ធផលនៃសន្លឹកឆ្នោតចំពោះការជ្រើសរើសប្រធានសាមាគមសិល្បៈថ្មីនេះ។
គួរបញ្ជាក់ផងដែរ ក្រោយពីលោកជំទាវអ្នកឧកញ៉ា ម៉ៅ ចំណាន បានជាប់ឈ្មោះជាប្រធានសមាគមសិល្បករខ្មែរ នៅអាណត្តិទី៦ហើយ លោកជំទាវបានថ្លែងនៅក្នុងឆាកកម្មវិធីយ៉ាងមុះមុតអំពីគោលបំណង និងបានបង្ហាញនូវឆន្ទៈដ៏ខ្លាំងក្លាក្នុងការដឹកនាំវិស័យសិល្បៈ វប្បធម៌ខ្មែរឱ្យមានការរីកចម្រើនឆ្ពោះទៅមុខបន្ថែម អភិរក្ស និងអភិវឌ្ឍសិល្បៈ ជាពិសេសរៀបចំយុទ្ធការក្នុងការរួមវិស័យសិល្បៈស្របតាមគោលនយោបាយជាតិ ឱ្យបានរួមចំណែកជំរុញដល់វិស័យសេដ្ឋកិច្ចនៃព្រះរាជាណាចក្រកម្ពុជា និងអ្វីដែលសំខាន់បំផុតគឺឆ្លើយតបទៅតាមយុទ្ធសាស្រ្តបញ្ចកោណរបស់រាជរដ្ឋាភិបាល អាណត្តទី៧នេះ។
សូមជម្រាបជូនថា លោកជំទាវអ្នកឧកញ៉ា គឺជាអតីតតារាសម្តែងជួរមុខ និងពិធីការីនីដែលមានភាពប៉ិនប្រសប់ សំឡេងផ្អែមស្រទន់ ព្រមទាំងមានសម្រស់ស្រស់ស្អាតតាមបែបធម្មជាតិ បានបោះជំហានចូលប្រឡូកក្នុងវិថីសិល្បៈ ក្នុងអំឡុងឆ្នាំ ១៩៩៨។ ក្រោយមក លោកជំទាវអ្នកឧកញ៉ាក៏បានបាត់មុខពីសិល្បៈអស់រយៈពេលជាយូរ ទើបបានក្លាយជាតំណាងនៃប្រធានសមាគមសិល្បករខ្មែរ អាណត្តទី៦ ឆ្នាំ ២០២៤។
