អបអរសាទរ ពិធីសម្ពោធដាក់ឲ្យដំណើរការបឋមកម្មវិធីទូទាត់បាគងទេសចរ “Bakong Tourist App”

ពិធីសម្ពោធដាក់ឲ្យដំណើរការបឋមកម្មវិធីទូទាត់បាគងទេសចរ (Bakong Tourist App) ក្រោមអធិបតីភាពរបស់ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ត្រូវបានរៀបចំឡើងក្នុងគោលបំណង ប្រកាសដាក់អោយដំណើរការបឋមកម្មវិធីទូទាត់បាគងទេសចរ (Bakong Tourist App) ដើម្បីសម្រួលដល់ការទូទាត់របស់ភ្ញៀវទេសចរអន្តរជាតិ ដែលបានអញ្ចើញមកកំសាន្តនៅកម្ពុជា និងរួមចំណែកគាំទ្រវិស័យទេសចរណ៍នៅកម្ពុជា។

នៅក្នុងពិធីដាក់សម្ពោធអោយដំណើរការបឋមកម្មវិធីទូទាត់បាគងទេសចរនារសៀលនេះ មានការចូលរួមពីថ្នាក់ដឹកនាំ ធនាគារជាតិនៃកម្ពុជា និងតំណាងមកពីស្ថាប័នផ្សេង និងតំណាងគ្រឹះស្ថានធនាគារ និងហិរញ្ញវត្ថុ ដែលជាសមាជិកប្រព័ន្ធបាគង សរុបប្រមាណ ៧៥០នាក់។

លោក រ័ត្ន​ សោភ័ណ ប្រធានសមាគមនធនាគារនៅកម្ពុជា(ABC) បានលើកឡើងនៅក្នុងកម្មវិធីនេះថា វិស័យទេសចរណ៍ជាវិស័យមួយដ៏សំខាន់ និងមានសក្កដានុពលមួយនៅក្នុងការជំរុញកំណើនសេដ្ឋកិច្ច។ រាជរដ្ឋាភិបាល​បានយកចិត្តទុកដាក់ខ្លាំងបំផុតនៅក្នុងការស្តា និងលើកស្ទួយការអភិវឌ្ឍទេសចរណ៍ ជាពិសេស ក្នុងវេទិការាជរដ្ឋាភិបាល ផ្នែកឯកជនលើកទី១៩ កាលពីថ្ងៃទី១៣ ខែវិច្ឆិកា ឆ្នាំ២០២៣ កន្លងទៅនេះ រាជរដ្ឋាភិបាល បានដាក់ចេញនូវវិធានការកែទម្រង់ដ៏មុតស្រួចជាកញ្ចប់ដើម្បីជំរុញ និងលើកស្ទួយវិស័យទេសចរណ៍ ជាពិសេសកម្មវិធីទស្សនាសៀមរាប ឆ្នាំ២០២៤ ក៏ដូចជាការតភ្ជាប់ជើងយន្តហោះដោយត្រង់ពីគោលដៅទេសរណ៍ល្បីៗមកខេត្តសៀមរាប និងវិធានការផ្សេងៗទៀត សំដៅជំរុញវិស័យទេសចរណ៍ក្នុងខេត្តសៀមរាប អោយមានសន្ទុះងើបឡើងវិញ។ ចំណែកឯវិស័យធនាគារ និងហិរញ្ញវត្ថុ ក្រោមការដឹកនាំ ដោយធនាគារជាតិនៃកម្ពុជា គ្រឹះស្ថានធនាគារជាតិ និងហិរញ្ញវត្ថុ រួមចំណែកផ្តល់ឥណទានប្រាក់កម្ចីលើវិស័យទេសចរណ៍ និងចូលរួមរៀបចំឥណទានឡើងវិញ ចំពោះវិស័យទេសចរណ៍នៅខេត្តសៀមរាប។

វិស័យធនាគារនៅកម្ពុជា ថ្វីត្បិតតែមានការប្រឈមមួយចំនួនក៏អាចនៅបន្តភាពរឹងមាំ ភាពធន់ ព្រមទាំងបានចូលរួមដោះស្រាយ បញ្ហាលំបាករបស់ប្រជាពលរដ្ឋ ជាបន្តបន្ទាប់ ។

កម្ពុជាមានផលិតផលទេសចរណ៍សម្បូរបែបរួមមាន ទេសចរណ៍បែបប្រវត្តិសាស្រ្ត ទេសចរណ៍បែបបេតិកភណ្ឌ ធម្មជាតិ និងវប្បធម៌  ឆ្នេរសមុទ្រដ៏ស្រស់ស្អាត និងទេសចរណ៍កែច្នៃ ដែលជាគោលដៅ ទេសចរណ៍សំខាន់ៗ របស់ប្រទេសកម្ពុជាយើង។ ដូច្នេះការដាក់ដំណើរការបឋមកម្មវិធីទូទាត់បាគងទេសចរ នេះព្រៀបដូចជា ផលិតផលថ្មីមួយទៀតសម្រាប់ទាក់ទាញទេសចរណ៍បន្ថែមលើផលិតផលទេសចរណ៍ដែលមានស្រាប់។ ការនេះនឹងជួយអោយភ្ញៀវទេសចរកាន់តែមានភាពងាយស្រួល និងមានផាសសុខភាពតាមរយៈការប្រើប្រាស់ការទូទាត់បាគងទេសចរ(Bakong Tourist App) ភ្ញៀវបរទេសអាចរីករាយទៅនឹងការទូទាត់តាមរយៈ KH QR  ខណៈដែលពួកគេស្នាក់នៅ និងកំសាន្តនៅប្រទេសកម្ពុជានៃយើង។

ចំពោះលោកជំទាវបណ្ឌិត ជា សិរី បានលើកឡើងក្នុងពិធីនេះថា ការជ្រើសរើសទីតាំងខេត្តសៀមរាបដើម្បីរៀបចំកម្មវិធីនេះឡើងពីព្រោះថា ខេត្តសៀមរាប ជាគោលដៅទេសចរណ៍ដ៏សំខាន់ ឈានមុខប្រកបដោយភាពសម្បូរបែប និងបេតិកភណ្ឌវប្បធម៌ ដែលបានឆ្លុះបញ្ជាំងពីអរិយធម៌ខ្មែរ និងលើកស្ទួយកិតិនាមកម្ពុជា ក៏ដូជាផ្សព្វផ្សាយ ទាក់ទាញផ្ញៀវទេសចរពិភពលោកចាប់អារម្មណ៍មកទស្សនា។

ការអភិវឌ្ឍប្រព័ន្ទទូទាត់សងប្រាក់ជាការងារអទិភាពមួយក្នុងចំណោមការងារអទិភាពផ្សេងទៀតរបស់ធនាគារជាតិនៃកិម្ពុជាដើម្បីផ្តល់នូវហេដ្ឋារចនាសម្ព័ន្ធប្រព័ន្ធទូទាត់សងប្រាក់ប្រកបដោយនវានុវត្តន៍ សុវត្ថិភាព និងប្រសិទ្ធភាព សម្រួលការទូទាត់ពាណិជ្ជកម្ម និងសកម្មភាពសេដ្ឋកិច្ច ទាំងក្នុងប្រទេស និងក្នុងតំបន់។

គិតត្រឹមឆមាសទី១ ឆ្នាំ២០២៤នេះ ប្រព័ន្ធបាគងមានមានសមាជិកសរុប ៧២គ្រឹះស្ថាន ក្នុងនោះមានគ្រឹះស្ថានចំនួន ៦០​បានដាក់អោយដំណើរការជាផ្លូវការ និងគ្រឹះស្ថានចំនួន១២ទៀត ដែលកំពុងបន្តធ្វើសន្ធានកម្មប្រព័ន្ធ។ ចំពោះប្រតិបត្តិការផ្ទេរប្រាក់ និងទូទាត់ ដែលធ្វើឡើងតាមរយៈប្រព័ន្ធបាគងមានចំនួន ២២២លានប្រតិបត្តិការ ដោយក្នុងនោះ ៩៣លានប្រតិបត្តិការជាប្រាក់រៀល និង ១២៤ប្រតិបត្តិការជាប្រាក់ដុល្លារអាម៉េរិក និងមានទំហំគិតជាប្រាក់រៀលចំនួន ៧៧ទ្រីលានរៀល និងជាប្រាក់ដុល្លារអាម៉េរិក ៤៦ប៊ីលានដុល្លារអាម៉េរិក។

ផ្អែកលើទិន្នន័យខាងលើបង្ហាញថា ប្រតិបត្តិការទូទាត់សងប្រាក់ជាអេឡិចត្រូនិកតាមប្រព័ន្ធបាគង និង KH QR ទទួលការពេញនិយមក្នុងការប្រើប្រាស់យ៉ាងឆាប់រហ័សក្នុងចំណោមសាធារណជនដែលបានលើកទឹកចិត្តអោយធនាគារជាតិនៃកម្ពុជា បន្តអភិវឌ្ឍប្រព័ន្ធបាគងនៅជំហានបន្តបន្ទាប់ ក្រោយពីបានដាក់ដំណើរការប្រកបដោយភាពជោគជ័យ ដើម្បីអោយប្រព័ន្ធបាគងអាចបំពេញមុខងារកាន់តែសម្បូរបែប អាចសម្រួលដល់សាធារណជនជាតិ និងអន្តរជាតិ ធ្វើប្រតិបត្តិការទូទាត់តាមរយៈឌីជីថលប្រកបដោយបរិយាប័ន្ន។

ធនាគារជាតិនៃកម្ពុជា បានអភិវឌ្ឍកម្មវិធីទូទាត់បាគងទេសចរ(Bakong Tourist App) និងប្រកាសដាក់អោយប្រើប្រាស់នៅពេលនេះ។ ការដាក់អោយដំណើរការកម្មវិធីទូទាត់បាគងទេសចរនាពេលនេះ​ មានគោលបំណងលើកកម្ពស់សេវាទូទាត់នៅកម្ពុជា អោយកាន់តែប្រសើរ រួមចំណែកគាំទ្រវិស័យទេសចរណ៍ នៅកម្ពុជាតាមរយៈការជួយសម្រួលដល់ការទូទាត់ឌីជីថល លើថ្លៃទំនិញ និងសេវារបស់ភ្ញៀវទេសចរអន្តរជាតិ ដែលអញ្ចើញមកកំសាន្តនៅប្រទេសកម្ពុជា។ ​