អាកាសយានដ្ឋានអន្ដរជាតិតេជោ កម្រិត 4F បានបើកដំណើរការជាផ្លូវការចាប់ពីថ្ងៃទី៩ ខែកញ្ញា

សូមអបអរសាទរអាកាសយានដ្ឋានអន្តរជាតិភ្នំពេញតេជោ ដែលបានចាប់ផ្តើមដំណើរការបម្រើសេវាកម្មហោះហើរជូនភ្ញៀវជាតិ និងអន្តរជាតិ តភ្ជាប់ជើងមេឃកម្ពុជាទៅកាន់ពិភពលោកកាន់តែធំ និងទូលាយជាងមុន។

អាកាសយានដ្ឋានអន្ដរជាតិតេជោ (KTI) ថ្មី ប្រភេទ 4F នេះ ជាការរចនាឡើងក្នុងគោលបំណងបង្កើតនូវអារម្មណ៍ពិសេស ដែលអ្នកដំណើរទទួលបាន លើសពីអាកាសយានដ្ឋានធំៗ ប្រហាក់ប្រហែលគ្នាជាច្រើនទៀតក្នុងតំបន់អាស៊ី។

អាកាសយានដ្ឋានអន្តរជាតិតេជោ កម្រិត 4F ដែលអាចឱ្យយន្តហោះប្រភេទធំៗឆ្លងទ្វីបមកចុះចតបាន ត្រូវបានកសាងឡើងជា ៣ដំណាក់កាល ពោលគឺដំណាក់កាលទី១ មានផ្លូវរត់ចម្ងាយ៤ គីឡូម៉ែត្រជាមួយនឹងមានសមត្ថភាពទទួលអ្នកដំណើរជាង ១៥លាននាក់ក្នុងមួយឆ្នាំ នៅឆ្នាំ២០២៥។
រីឯដំណាក់កាលទី២ មានការបន្ថែមផ្លូវរត់ចំនួន ២បន្ថែមទៀត ដែលនឹងបង្កើនសមត្ថភាពអ្នកដំណើរដល់ ៣០លាននាក់ នៅឆ្នាំ២០៣០។

ចំពោះដំណាក់កាលទី៣ អាកាសយានដ្ឋាននេះនឹងពង្រីកបន្ថែមទៀតជាមួយនឹងការដាក់ឱ្យប្រើប្រាស់ផ្លូវរត់ទីបី ដែលអាចទទួលអ្នកដំណើរបានរហូតដល់ ៤៥លាននាក់ នៅឆ្នាំ២០៥០។

សូមបញ្ជាក់ជូនផងដែរថា អាកាសយានដ្ឋានអន្តរជាតិតេជោ ត្រូវបានបើកការដ្ឋានសាងសង់នៅក្នុងឆ្នាំ២០១៨ ក្រោម ទុនវិនិយោគ ១៥០០ លានដុល្លារអាម៉េរិក របស់ក្រុមហ៊ុនសាជីវកម្មវិនិយោគទុននៅក្រៅប្រទេស (OCIC) ដោយមានសមត្ថភាពទទួលបានការហោះហើរ ពីឆ្ងាយឆ្លងទ្វីបដោយអាចឱ្យយន្តហោះធុនធំរហូតដល់ Airbus A380-800 និង យន្តហោះ Boeing 747-800 ចុះចតបាន។