អាថ៌កំបាំងដើម្បីទទួលបានភ្នែកដ៏ស្រស់ស្អាត

មានពាក្យគេពោលថា “ភ្នែកជាបង្អួចនៃដួងព្រលឹង”។ ជាបច្ច័យអាក្រក់ ភ្នែករបស់យើងអាចទទួលរងអាការៈអាលែកហ្ស៊ីដែលបណ្តាលមកពី ស្រេ្តស អាការៈក្រហាយ ហើមត្របកភ្នែក ហើមប៉ោងជុំវិញភ្នែក និងថ្នក់ត្របកភ្នែកផ្នែកខាងក្រោមជាដើម។ ស្បែកជុំវិញភ្នែករបស់អ្នក គឺពិតជាស្តើងខ្លាំងណាស់ អ្នកត្រូវតែថែរក្សាវាឱ្យបានល្អ។ យើងសូមធ្វើការចែករំលែកនូវវិធីសាស្រ្តធម្មជាតិខ្លះៗក្នុងការថែរក្សាភ្នែករបស់អ្នកប្រកបដោយប្រសិទ្ធភាពខ្ពស់។

ខាងក្រោមនេះជាអាថ៌កំបាំងពិសេសដែលអ្នកមិនធ្លាប់បានដឹង ៖

អាការៈហើមប៉ោងជុំវិញភ្នែក

ការគេងមិនគ្រប់គ្រាន់ ធ្វើការនឿយហត់ពេក និងស្ត្រេស អាចនាំឱ្យអ្នកមានអាការៈហើមជុំវិញត្របកភ្នែក។

ដើម្បីចៀសវាងពីអាការៈទាំងអស់នេះ អ្នកអាចសាកល្បងវិធីសាស្រ្តខាងក្រោម ៖

ហាន់ដំឡូងបារាំងឆៅចំនួន ២ចំណិតរួចដាក់លើត្របកភ្នែករបស់អ្នក រយៈពេល ១៥ ទៅ ២០នាទី
ជ្រលក់សំឡី ២ដុំក្នុងទឹកដោះគោត្រជាក់ រួចដាក់ពីលើភ្នែករបស់អ្នករយៈពេល ២០នាទី
លាយប្រេងវីតាមីន E ក្នុងទឹកត្រជាក់រួចយកសំឡីជ្រលក់ក្នុងទឹកនោះរួចដាក់ពីលើភ្នែករបស់អ្នករយៈពេល ២០នាទី

កំចាត់ស្នាមជ្រីវជ្រួញ

ស្នាមជ្រីវជ្រួញភាគច្រើនបណ្តាលមកពីរបបអាហារ ការបំផ្លាញដោយកម្តៅថ្ងៃ ការជក់បារី ការវះកាត់ នឹងរបួសផ្សេងៗ។ ជាដំណឹងល្អសម្រាប់អ្នក ព្រោះស្នាមទាំងនោះអាចរលុបបាត់ដោយការម៉ាស្សាប្រេង ជុំវិញភ្នែកជាប្រចាំ។ ខាងក្រោមជាប្រភេទប្រេងដែលមានលក្ខណៈសមស្របចំពោះប្រភេទស្បែកជុំរង្វង់ភ្នែក៖

ប្រេងអាល់ម៉ុល និងប្រេងចូចូបា សម្រាប់គ្រប់ប្រភេទស្បែក
ប្រេង Rose Hip សម្រាប់ស្បែកចាស់មុនវ័យ ឬស្បែកស្ងួត
ប្រេងដូង សម្រាប់ស្បែកមានជាតិខ្លាញ់ច្រើន
សូមប្រើម្រាមដៃរបស់អ្នកម៉ាស្សាថ្នមៗជារង្វង់ចលនានៃទ្រនិចនាឡិការយៈពេល ២ ទៅ ៣នាទី សូមកុំព្យាយាមញីឬសង្កត់ភ្នែករបស់អ្នកខ្លាំងៗពេក។

កម្ចាត់សត្រូវដ៏ធំរបស់អ្នក! អ្វីអ្នកកំពុងគិតនោះគឺត្រឹមត្រូវហើយ យើងកំពុងនិយាយអំពីរង្វង់ភ្នែកខ្មៅ។ ដំឡូងបារាំង និងត្រសក់ជាដំណោះស្រាយដ៏ល្អក្នុងការកម្ចាត់រង្វង់ភ្នែកខ្មៅ និងថ្នក់ខាងក្រោមភ្នែក។

ដំឡូងបារាំង

វាសម្បូរទៅដោយជាតិប៉ូតាស្យូម វីតាមីន B6 និងវីតាមីន C ផ្តល់ឱ្យភ្នែករបស់អ្នកនូវសារជាតិចិញ្ចឹមជាច្រើនមុខដើម្បីទទួលបានសុខភាពល្អ នឹងស្រស់ថ្លា។

ឈូសដំឡូងបារាំង រួចច្រកក្នុងថង់ក្រណាត់ស្តើងចំនួន ២
ដាក់ថង់នោះនៅលើភ្នែកទាំងសងខាងរបស់អ្នក
សម្រាករយៈពេល ១៥ ទៅ ២០នាទី
លាងសម្អាតជាមួយទឹកត្រជាក់ រួចលាបប្រេងដែលមានលក្ខណៈសមស្របសម្រាប់ស្បែកជុំវិញរង្វង់ភ្នែករបស់អ្នកប្រសិនបើវាស្ងួតពេក

ចំណិតត្រសក់

វាមិនត្រឹមតែជួយកម្ចាត់រង្វង់ភ្នែកខ្មៅតែប៉ុណ្ណោះទេ វាថែមទាំងជួយឱ្យរង្វង់ភ្នែករបស់អ្នកស្រស់ថ្លា និងមានសំណើមបន្ថែមទៀត។

ហាន់ត្រសក់ ២ចំណិត រួចដាក់នៅលើភ្នែករបស់អ្នក
ទុកចោលរយៈពេល ១៥ ទៅ ២០នាទី
លាងសម្អាតជាមួយទឹកស្អាតជាការស្រេច

ដំឡូងបារាំង និងត្រសក់

លាយគ្រឿងផ្សំទាំងពីរនេះចូលគ្នាដើម្បីកម្ចាត់រង្វង់ភ្នែកខ្មៅដោយប្រើវិធីខាងក្រោម៖

ឈូសដំឡូងបារាំងតូចមួយ
ចិតសំបក និងឈូសត្រសក់មួយកំណាត់តូច
លាយគ្រឿងផ្សំទាំងពីរក្នុងចានតែមួយ រួចដាក់ចូលថង់ក្រណាត់ចំនួន២ សឹមយកទៅដាក់នៅលើរង្វង់ភ្នែកទាំងគូរបស់អ្នកទុករយៈពេល ២០ ទៅ ៣០នាទី
ប្រសិនបើអ្នកធ្វើមុនចូលគេង សូមយកល្បាយនោះចេញពីភ្នែករួចលាបប្រេង សឹមចាំចូលគេង។ លាងសម្អាតជាមួយទឹកត្រជាក់នាព្រឹកព្រលឹម។

វិធីទទួលបានភ្នែកដ៏ស្រស់ស្អាតតាមរយៈការម៉ាស្សាភ្នែក

ការម៉ាស្សាទី១ ៖ ប្រើម្រាមដៃចង្អុល និងមេដៃសង្កត់ចិញ្ចើមរបស់ថ្នមៗ ពីស្តាំទៅឆ្វេង ពីលើចុះក្រោម ធ្វើដោយថ្មមដៃនឹងកុំលឿនពេក អ្នកអាចនឹងវិលមុខ។ វិធីនេះជួយកាត់បន្ថយស្នាមជ្រីវជ្រួញបានច្រើន។

ការម៉ាស្សាទី២ ៖ ប្រើម្រាមដៃរបស់អ្នកម៉ាស្សាផ្នែកខាងក្រោយនៃត្រចៀករបស់អ្នក រួចទាញត្រចៀករបស់អ្នកតិចៗ សឹមបើកភ្នែក។ វិធីនេះជួយកម្ចាត់ការកក់ស្ទះឡាំហ្វាទិចនៃរន្ធភ្នែករបស់អ្នកដែលនាំឱ្យមានអាការៈហើមប៉ោងជុំវិញភ្នែក និងស្នាមជ្រីវជ្រួញ។

រោមភ្នែកងស្អាត

រោមភ្នែកក្រាស់ និងវែងធ្វើឱ្យភ្នែករបស់អ្នកកាន់តែស្អាត។ ប្រសិនបើអ្នកចង់បានរោមភ្នែកវែងក្រាស់ស្អាត អ្នកអាចប្រើប្រាស់ប្រេងល្ហុងខ្វង (Castor oil) ដែលប្រេងនេះបានផ្តល់នូវសារធាតុចិញ្ចឹមលូតលាស់បានយ៉ាងល្អ។

លាងសម្អាតជក់ម៉ាស្ការ៉ាណាមួយដែលអ្នកឈប់ប្រើ
ជ្រលក់ក្នុងប្រេងល្ហុងខ្វង (Castor oil) រួចលាបលើរោមភ្នែករបស់អ្នក
លាបប្រេងនេះមុនចូលគេងជារៀងរាល់ថ្ងៃមុនចូលគេង

រោមចិញ្ចើមក្រាស់ល្អ

ដករោមចិញ្ចើមដែលគិតថាជាចំណែកលើស ឬអ្នកអាចឱ្យអ្នកដែលមានជំនាញធ្វើការដកជូនអ្នកក៏បាន។ អ្នកអាច ឬយកអំបោះមកដកតាមរាងដែលអ្នកពេញចិត្ត។ រោមចិញ្ចើមដ៏ស្រស់ស្អាតនឹងជួយលើកសម្រស់ភ្នែករបស់អ្នកឱ្យកាន់តែមុតថែមទៀត។