អ្នកច្នៃម៉ូដ និងគ្រូបង្ហាត់ម៉ូដែល អូលីវ៉ា គង់ ត្រៀមនាំយកវប្បធម៌ខ្មែរទៅចូលរួមមហោស្រពទីក្រុង Cannes

លោក ម៉ែន សីហា ហៅ អូលីវ៉ា គង់ ដែលជាអ្នកច្នៃម៉ូត ព្រមជាគ្រូបង្ហាត់ម៉ូដែលមួយរូបកំពុងមានកេរ្តិ៍ឈ្មោះរបស់កម្ពុជា ត្រៀមនឹងបង្ហាញខ្លួនលើកដំបូងបំផុតក្នុងមហោស្រពភាពយន្តទីក្រុងកាន Cannes Film Festival 2024 នៅប្រទេសបារាំង ដែលជាកម្មវិធីដ៏មានកិត្យានុភាពមួយរបស់ពិភពលោក។

អូលីវ៉ា បានប្រកាសដំណឹងនេះនៅលើបណ្ដាញសង្គមរបស់លោក ហើយក៏មានមិត្តភ័ក្ដិ សិល្បករជាច្រើនបានចូលរួមអបអរព្រោះថា អ្វីដែល គ្រូម៉ូដែលរូបនេះសម្រេចបាន មិនត្រឹមជាមុខមាត់របស់សាមីខ្លួននោះទេ ប៉ុន្តែជាមុខមាត់របស់ប្រជាជាតិខ្មែរទាំងមូល។

មហោស្រពភាពយន្តទីក្រុងកាន ឬ Cannes Film Festival 2024 គឺជាកម្មវីធីជួបជុំដ៏ធំរបស់សិល្បករមកពីវិស័យភាពយន្ត និង Fashion ជាដើម។ មានតែសិល្បករដែលមានស្នាដៃលេចធ្លោ ក៏ដូចជាមានកេរ្តិ៍ឈ្មោះតាមប្រទេសនីមួយមកពីជុំវិញពិភពលោកប៉ុណ្ណោះ ដែលនឹងត្រូវអញ្ជើញឲ្យមកដើរលើកម្រាលព្រំក្រហមដ៏មានកិត្តិយស។

ម៉ែន សីហា គឺជាសិល្បករម្នាក់នៅក្នុង Fashion Industry របស់កម្ពុជា ដែលទទួលបានកិត្តិយសនេះ។ នៅមុននេះ អូលីវ៉ា បានទទួលអ៊ីម៉ែលពី MODA ដែលជា ភ្នាក់ងារល្បីឈ្មោះនៅតំបន់អឺរ៉ុប និងជាតំណាងក្រុមរៀបចំ Cannes Film Festival 2024 បានផ្ញើសារមកអញ្ជើញរូបលោក ឲ្យចូលរួមកម្មវិធីកម្រិតពិភពលោកនេះ។ អ្នកច្នៃម៉ូតកម្ពុជា ប្រាប់ថា ទទួលបានសារភ្លាម លោកមានការភ្ញាក់ផ្អើលយ៉ាងខ្លាំង ហើយក៏បានព្យាយាមទំនាក់ទំនងទៅភាគីផ្សេងទៀតដែលជាប់ពាក់ព័ន្ធ ដើម្បីបញ្ជាក់។ ជាលទ្ធផល លោក បានប្រាកដថា ទទួលបានការអញ្ជើញពិតមែន។

ថ្លែងប្រាប់ ឡេឌីស៍ សីហា ឬ អូលីវ៉ា លើកឡើងថា “សប្បាយចិត្តណាស់ វាគឺជាក្ដីស្រមៃក្លាយជាការពិត…”។ អ្នកខេត្តពោធិសាត់រូបនេះ បានត្រៀមសំលៀកបំពាក់ជាច្រើនឈុតតំណាងឲ្យសិល្បៈវប្បធម៌ និងសម្បត្តិរបស់ខ្មែរ ដកស្រង់ពីរឿង “កូរសមុទ្រទឹកដោះ” និងអត្ថន័យនៃការកកើតផែនដី។ “ខ្ញុំសូមសន្យាថានឹងនាំយកកម្ពុជាទៅកាន់ពិភពលោក ឲ្យពិភពលោកចាប់អារម្មណ៍ និងស្គាល់ពីប្រទេសកម្ពុជារបស់យើងឲ្យកាន់តែច្រើន”។ អូលីវ៉ា ថ្លែង។

តាមគម្រោង Cannes Film Festival 2024 នឹងរៀបចំធ្វើនៅថ្ងៃទី ២៥ ឧសភា ហើយ អូលីវ៉ា គង់ នឹងចាកចេញពីកម្ពុជា នៅថ្ងៃទី ១០ ឧសភា។ ១០ថ្ងៃ បន្ទាប់ពីបញ្ចប់បេសកកម្មផ្សព្វផ្សាយស្នាដៃ និងសិល្បៈវប្បធម៌ខ្មែរ ព្រមទាំងដើរកម្សាន្តលើដីអឺរ៉ុប អូលីវ៉ា នឹងមកដល់កម្ពុជាវិញនៅព្រឹកថ្ងៃទី ២៧ ខែឆ្នាំដដែល។

អូលីវ៉ា គង់ គឺជាអ្នកច្នៃម៉ូត និងគ្រូបង្ហាត់ម៉ូដែលល្បីឈ្មោះមួយរូបនាពេលបច្ចុប្បន្នរបស់កម្ពុជា។ ក្រៅពីបទពិសោធន៍នៅក្នុងស្រុក លោកធ្លាប់ចេញបេសកកម្មការងារទៅអន្តរជាតិច្រើនទៀតអំពី Fashion and Model នៅវៀតណាម ម៉ាឡេស៊ី អ៊ីតាលី និងចុងក្រោយនេះ ប្រសិនបើមិនមានអ្វីផ្លាស់ប្ដូរ បទពិសោធន៍ការងាររបស់លោក នឹងកត់ត្រាចូលអំពីទឹកដីបារាំង ក្នុងកម្មវិធី Cane Film Festival 2024 ថែមទៀត៕