ឯកឧត្តម បណ្ឌិត អ៊ាង សុផល្លែត ជំរុញឱ្យរោងចក្រនានា ប្រើប្រាស់ឧបករណ៍ត្រួតពិនិត្យដោយស្វ័យប្រវត្តិ សម្រាប់គ្រប់គ្រងកាកសំណល់រាវអោយមានប្រសិទ្ធភាព

រដ្ឋមន្ត្រីក្រសួងបរិស្ថាន បានយកចិត្តទុកដាក់ទៅលើការថែរក្សាបរិស្ថានប្រកបដោយប្រសិទ្ធភាពខ្ពស់ ដោយមានការជំរុញអោយគ្រប់រោងចក្រទាំងអស់ត្រូវយកចិត្តទុកដាក់បំផុត សម្រាប់គ្រងគ្រង និងទប់ស្កាត់ការបញ្ចេញកាកសំណល់រាវ ដោយមានការត្រួតពិនិត្យតាមរយៈឧបករណ៍ស្វ័យប្រវត្ត ដែលជាបច្ចេកវិទ្យាទំនើបសម្រាប់គ្រងកាកសំណង់នៅតាមរោងចក្រនានា។

ឯកឧត្តម បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានមានប្រសាសន៍កាលពីថ្ងៃទី០៣ ខែមករា ឆ្នាំ២០២៤ ដោយធ្វើការបញ្ជាក់អំពីតម្រូវការចាំបាច់នៅក្នុងការទប់ស្កាត់ការបញ្ចេញកាកសំណល់រាវ ដែលមានសារជាតិពុលសាយភាយទៅក្នុងបរិស្ថាន ធានាបាននូវនិរត្តរភាព និងប្រាក់ចំណេញរបស់រោងចក្រ។ នេះជាការលើកឡើងក្នុងឱកាសដែល លោករដ្ឋមន្រ្តី ចុះពិនិត្យប្រព័ន្ធបញ្ចេញសារធាតុរាវ និងគុណភាពទឹកនៅក្រុមហ៊ុន WANSHENG (CAMBODIA) TEXTILE & LAUNDRY CO.,LTD ក្នុងស្រុកគងពិសី ខេត្តកំពង់ស្ពឺ និងរោងចក្រ Guoao (Cambodia) Environmental Engineering Co., Ltd. ដោយមានការចូលរួមជាមួយសហគមន៍ សហគ្រាស ក្នុងតំបន់ដែលនៅក្បែព្រលានយន្តហោះពោធិ៍ចិនតុង ដោយសង្កត់ធ្ងន់ទៅលើការទទួលខុសត្រូវរួម ក្នុងការថែរក្សាបរិស្ថាន ។

នៅក្នុងនោះផងដែរ លោក សួរ ហុង ម្ចាស់រោងចក្រ WANSHENG (CAMBODIA) TEXTILE & LAUNDRY CO.,LTD បានធ្វើការថ្លែងអំណរគុណចំពោះការលើកឡើងដ៏ឈ្លាសវៃរបស់លោករដ្ឋមន្ត្រី ដោយមានការយកចិត្តទុកដាក់ទៅលើការគ្រប់គ្រងកាកសំណល់រាវ និងធ្វើការគ្រប់គ្រងតាមរយៈការបំពាក់ឧបករណ៍ត្រួតពិនិត្យស្វ័យប្រវត្តនេះ ក្នុងការជួយដោះស្រាយធ្វើយ៉ាងណាអោយរោងចក្រមានដំណើរការដោយរលូន និងទទួលបានផលចំណេញ ដោយមិនបង្កអោយមានផលប៉ះពាល់ និងសុខភាពរបស់ប្រជាពលរដ្ឋខ្មែរផងដែរ៕ ដោយ កែន មី