ប្រសិន​បើ​លោកអ្នកចង់មានចំណងស្នេហ៍យូរអង្វែង សូម​យកចិត្តទុកដាក់​លើពាក្យ “ស្និទ្ធស្នាល”

ភាពផ្អែមល្អែម និងជូរចត់ជាផ្នែកមួយនៃទំនាក់ទំនងស្នេហា។ នៅក្នុងដំណើរជីវិតគូដ៏វែងឆ្ងាយ មានពេលវេលាជាច្រើនដែលអ្នកទទួលរងការឈឺចាប់ និងភាពភ័ន្តច្រឡំនូវរឿងមួយចំនួន ថែមទាំងពេលខ្លះអ្នកមិនចង់ឃើញមុខដៃគូស្នេហារបស់អ្នកទៀតផង អារម្មណ៍ទាំងនេះគ្រាន់ជាផ្នែកមួយនៅក្នុងទំនាក់ទំនងស្នេហាប៉ុណ្នោះ។ មានពេលវេលាខ្លះទៀតក្នុងចំណងស្នេហារបស់អ្នក អ្នកក៏ទទួលបាននូវអារម្មណ៍សប្បាយរីករាយ ភាពកក់ក្តៅ ការបារម្ភយកចិត្តទុកដាក់ និងភាពផ្អែមល្ហែមប្រៀបដូចជាស្ករគ្រាប់ ដែលអ្នកបានផ្តល់ឱ្យគ្នាទៅវិញទៅមក រហូតដល់ពេលខ្លះអ្នកគិតថា តើនឹងត្រូវរស់នៅដោយរបៀបណាប្រសិនបើគ្មានដៃគូស្នេហារួមរស់ក្បែរ​?

អ្វីដែលសំខាន់គឺថា អ្នកអាចប្រឈមនឹងពេលវេលាល្អ និងអាក្រក់ជាមួយគ្នា ជាពិសេសអ្នកត្រូវស្វែងយល់អំពីវិធីធ្វើឱ្យទំនាក់ទំនងស្នេហារបស់អ្នកកាន់តែផ្អែមល្ហែមជាងមុនបន្ថែមទៀត។

សម្រាប់ការពង្រឹងស្នេហាអ្នកឱ្យកាន់តែរឹងមាំ អ្នកត្រូវចំណាយពេលវេលាដ៏មានតម្លៃជាមួយមនុស្សដែលអ្នកស្រឡាញ់ និងយកចិត្តទុកដាក់ជាមួយគាត់បន្ថែមទៀត។ អ្វីដែលធ្វើឱ្យទំនាក់ទំនងស្នេហារបស់អ្នកកាន់តែផ្អែមល្ហែមនោះគឺ ភាពស្និទ្ធស្នាល។ ដូច្នេះ ពេលខ្លះភាពផ្អែមល្ហែមដែលអ្នកទាំងពីរបង្ហាញដល់គ្នាទៅវិញទៅមកក៏អាចផ្លាស់ប្តូរចំណងស្នេហារបស់អ្នកក្នុងផ្លូវដ៏វិជ្ជមានផងដែរ។

អាត្រាកើនឡើងនៃការលែងលះរបស់ជីវិតប្តីប្រពន្ធនៅជុំវិញពិភពលោកនេះ ក៏ព្រោះតែពួកគេភាគច្រើនមិនបានគិតដល់ការបង្កើនភាពស្និទ្ធស្នាលជាមួយគ្នាក្នុងទំនាក់ទំនងស្នេហា។ ជីវិតរស់នៅតាមបែបទាន់សម័យនាពេលបច្ចុប្បន្នគឺ ដៃគូស្នេហាស្រឡាញ់គ្នាខ្លាំង ប៉ុន្តែបែរជារស់នៅដូចជាមនុស្សមិនដែលស្គាល់គ្នា និងរស់នៅមិនប្រកបដោយសេចក្តីសុខសោះ។

តើអ្វីទៅជាភាពស្និទ្ធស្នាល? ហេតុអ្វីបានជាវាមានសារៈសំខាន់ខ្លាំងនៅក្នុងទំនាក់ទំនងស្នេហា?

ការចែករលែករឿងរ៉ាវក្នុងចិត្តទាំងអស់ប្រាប់ដៃគូរបស់អ្នក គឺជាអ្វីដែលល្អបំផុតសម្រាប់ទំនាក់ទំនងស្នេហា ចៀសវាងការរស់នៅជាមួយគ្នាដោយលាក់នូវអាថ៌កំបាំងពីគ្នា។ មិនមានអ្វីដែលប្រសើរជាងការដែលមានមនុស្សម្នាក់ស្តាប់រឿងរ៉ាវក្នុងចិត្ត​ ឬរឿងដែលអ្នកហត់នឿយជាមួយពេញមួយថ្ងៃ ហើយក៏ទទួលបានពាក្យផ្អែមល្ហែមលើកទឹកចិត្តធ្វើឱ្យអារម្មណ៍អ្នកប្រសើរឡើង និងបំពាក់ស្នាមញញឹមឡើងវិញនៅលើផ្ទៃមុខ។​ វានឹងធ្វើឱ្យទំនាក់ទំនងស្នេហារបស់អ្នកកាន់តែរំភើបញាប់ញ័រ ហើយនេះគឺជាសេចក្តីសុខដ៏ខ្លាំងក្លាជាងគេបំផុតនៅក្នុងពិភពលោក។​

តើទំនាក់ទំនងស្នេហាអាចប្រសើរឡើងទេ ប្រសិនបើគ្មានភាពស្និទ្ធស្នាល?

នៅក្នុងទំនាក់ទំនងស្នេហាត្រូវការរបស់ពីរយ៉ាងគឺ ភាពស្និទ្ធស្នាលរូបរាងកាយ និងភាពសិទ្ធស្នាលផ្លូវអារម្មណ៍ ដើម្បីឱ្យទំនាក់ទំនងកាន់តែស្អិតរមួត។ ការកាន់ដៃគ្នា ការឱបត្រកងបីបម លួងលោមដោយពាក្យសម្តីផ្អែមល្ហែម និងប្រលែងលេងគ្នាទៅវិញទៅមក គឺពិតជាសំខាន់ខ្លាំងណាស់ ដូចទៅនឹងការចំណាយពេលវេលាដ៏មានតម្លៃជាមួយគ្នាដើម្បីដឹងថាដៃគូរបស់ខ្លួនមានអារម្មណ៍បែបណា។ ទង្វើសាមញ្ញ ប៉ុន្តែបង្កប់ដោយក្តីស្រឡាញ់យ៉ាងពេញលេញ។

ភាពស្និទ្ធស្នាល គឺពិតជាសំខាន់ខ្លាំងណាស់សម្រាប់ទំនាក់ទំនងស្នេហាមួយក្នុងការឆ្លងកាត់ពេលវេលាលំបាកៗ។ អ្នកទាំងពីរ គួរចេះជួយគ្នានៅពេលដែលជួបបញ្ហាទុក្ខលំបាកក្នុងជីវិត។

ការយល់ច្រឡំ ភាពមិនចុះសម្រុង និងការខឹងសម្បារ គឺជារឿងមួយដែលចៀសមិនផុតនៅក្នុងជីវិតគូ។ ទោះជាយ៉ាងណាក៏ដោយ នៅពេលនរណាម្នាក់មិនសប្បាយចិត្ត ម្នាក់ទៀតត្រូវក្លាយខ្លួនជាអ្នកដែលយល់ចិត្តបំផុត និងធ្វើយ៉ាងណាឱ្យដៃគូរបស់ខ្លួនប្រសើរឡើងវិញ។

ដៃគូស្នេហាម្នាក់ៗ ត្រូវតែយល់ដឹងការបង្ហាញភាពស្និទ្ធស្នាលទៅគ្នានៅត្រង់ចំណុចនេះ។ ប្រសិនបើនារីមិនសប្បាយចិត្តអំពីរឿងអ្វីមួយ ដែលដៃគូបុរសរបស់ខ្លួនបានធ្វើ វាជាការទទួលខុសត្រូវខាងបុរសដើម្បីដោះស្រាយរាល់បញ្ហាទាំងអស់នោះ។ គាត់អាចឱបនាង ធ្វើឱ្យនាងមានអារម្មណ៍ប្រសើរជាងមុន និងកក់ក្តៅបំផុត បុរសក៏អាចសុំទោសនាងក្នុងការដែលធ្វើឱ្យនាងមានអារម្មណ៍មិនល្អ។ នេះនឹងធ្វើឱ្យនាងមានអារម្មណ៍ថាទទួលបានក្តីស្រឡាញ់ដ៏ពេញលេញបំផុត។

ភាពស្និទ្ធស្នាល គឺពិតជាសំខាន់ខ្លាំងណាស់នៅក្នុងទំនាក់ទំនងស្នេហា។ អ្នកនឹងដឹងថា ដៃគូរបស់អ្នកស្រឡាញ់អ្នកជាអ្នក​ ទទួលយកអ្នកជាអ្នក និងតែងតែ​នៅទីនេះដើម្បីអ្នក។

តើអ្នកអាចបង្កើតភាពស្និទ្ធស្នាលក្នុងទំនាក់ទំនងរបស់អ្នកបានដោយរបៀបណា?

• ផ្តល់ក្តីស្រឡាញ់ ៖ នៅពេលអ្នកស្ថិតនៅក្នុងទំនាក់ទំនងស្នេហាមួយ អ្នកត្រូវតែយល់អំពីតម្រូវការនៃសេចក្តីស្រឡាញ់។ កាលណាអ្នកផ្តល់ក្តីស្រឡាញ់ និងការយកចិត្តទុកដាក់ទៅលើដៃគូស្នេហារបស់អ្នកកាន់តែច្រើន អ្នកក៏ទទួលបានមកវិញនូវក្តីស្រឡាញ់ និងការយកចិត្តទុកដាក់ដូចគ្នាផងដែរ។
• រកពេលវេលានិយាយគ្នា ៖ ការចែករំលែកការគិតទៅកាន់គ្នា អាចឱ្យអ្នកទាំងសងខាងយល់អំពីគ្នាកាន់តែច្បាស់ ដូចជា អ្វីដែលគាត់ចូលចិត្ត ឬមិនចូលចិត្ត។

• ផ្តល់កិត្តិយស លើកសរសើរ និងគោរពគ្នាទៅវិញទៅមក ៖ នៅពេលដែលគាត់ធ្វើអ្វីមួយសម្រាប់អ្នក គួរតែចេះលើកសរសើរ និងផ្តល់កិត្តិយសដល់គាត់។ នេះជាវិធីក្នុងការលើកទឹកចិត្តដើម្បីឱ្យគាត់ធ្វើអ្វីបន្ថែមទៀតសម្រាប់អ្នក។ គោរពការគិតរបស់គាត់ និងការសម្រេចចិត្តរបស់គាត់ ក៏ដូចជាយល់ដឹងអំពីតម្លៃរបស់គាត់។ អ្នកអាចធ្វើអ្វីមួយដែលធ្វើឱ្យគាត់សប្បាយចិត្ត ដូចជាផ្តល់ការភ្ញាក់ផ្អើល និងផ្តល់អំណោយដល់គាត់ក្នុងឱកាសពិសេសៗ។
• ភាពស្និទ្ធស្នាលមិនមែនជាការរួមសិចឡើយ ៖ សិចអាចនឹងកើតឡើងដោយមិនភ្ជាប់ទំនាក់ទំនងផ្នែកអារម្មណ៍ វាជាអ្វីដែលលើសពីតណ្ហា។ ប៉ុន្តែបើអ្នកមានភាពស្និទ្ធស្នាលជាមួយដៃគូស្នេហារបស់អ្នក និងមានអារម្មណ៍ល្អជាមួយគ្នាទៀតនោះ​ រឿងរ៉ាវដ៏អស្ចារ្យនឹងកើតមានឡើងជាក់ជាមិនខាន៕