ស្ថានទូតសាធារណរដ្ឋកូរ៉េប្រចាំព្រះរាជាណាចក្រ​​​​​កម្ពុជា ​រៀបចំ​ការប្រកួតកីឡា តេក្វាន់ដូពានរង្វាន់ឯកអគ្គរដ្ឋទូតឆ្នាំ​ ២០២៤

ស្ថានទូតសាធារណរដ្ឋកូរ៉េប្រចាំព្រះរាជាណាចក្រ​​​​​កម្ពុជា បានរៀបចំការប្រកួតកីឡា តេក្វាន់ដូពានរង្វាន់ឯកអគ្គរដ្ឋទូតឆ្នាំ​ ២០២៤ នៅមជ្ឈមណ្ឌលតេក្វាន់ដូ ប៊ូយ៉ុង-ខ្មែរ ក្នុងពហុកីឡដ្ឋានជាតិអូឡាំពិក។

ការប្រកួតកីឡាតេក្វាន់ដូពានរង្វាន់ឯកអគ្គរដ្ឋទូតឆ្នាំ​ ២០២៤នេះ ធ្វើឡើងក្នុង ៦វិញ្ញាសា​មេគុន (Poomsae) និង ២១  វិញ្ញាសាប្រយុទ្ធ(Kyorugi)​​ មានអត្តពលិកសរុបចំនួន ២៩៦បានចូលរួម។

 

ឯកឧត្តម ឯកអគ្គរដ្ឋទូត​ ​​ PARK Jung-Wook បានមានប្រសាសន៍ថា ទំនាក់ទំនង​សហប្រតិបត្តិការមិត្តភាពរវាងប្រទេសទាំងពីរកាន់តែជិតស្និទ្ធឡើង ដោយដំណើរ​ទស្សនកិច្ចផ្លូវការលើកទី១របស់សម្តេចធិបតីឯកឧត្តមនាយករដ្ឋមន្ត្រី ហ៊ុន ម៉ាណែត ទៅកាន់សាធារណរដ្ឋកូរ៉េកាលពីខែឧសភាកន្លងទៅទទួលបានជោគជ័យ ហើយប្រទេស​ទាំងពីរត្រូវបានដំឡើងកម្រិតទំនាក់ទំនងទៅជា “ភាពជាដៃគូយុទ្ធសាស្ត្រ” ដើម្បីជំរុញ​កិច្ចសហប្រតិបត្តិការឱ្យកាន់តែជិតស្និត ជាពិសេស តេក្វាន់ដូ គឺជាព្រឹត្តិការណ៍កីឡា​ដ៏ពេញនិយមមួយ ដែលតភ្ជាប់ប្រទេសទាំងពីរ ហើយសាធារណរដ្ឋកូរ៉េនឹងបន្ត​គាំទ្រដល់​ការពង្រីកមូលដ្ឋានកីឡាតេក្វាន់ដូនៅកម្ពុជា។

ឯកឧត្តម ឯកអគ្គរដ្ឋទូត​ ​​ PARK បានសង្ឃឹមថា កីឡាករ-កីឡាការិនីដែលបានចូលរួមការ​ប្រកួតនឹងខិតខំប្រឹងប្រែងហ្វឹកហាត់កីឡាតេក្វាន់ដូ និងរីកចម្រើនក្លាយជាអត្តពលិក​តំណាង​ឱ្យប្រទេសកម្ពុជានាពេលអនាគត។

 

កីឡាករ-កីឡាការិនីជ័យលាភីទាំង ១០៨ នាក់ក្នុងការប្រកួតលើកនេះ ទទួលបានមេដាយ​​ ប័ណ្ណសរសើរ ហើយជ័យលាភីដែលបានពិន្ទុល្អ ទទួលបានមេដាយ​​ ប័ណ្ណសរសើរ រួមជាមួយរង្វាន់ Galaxy ស្មាតហ្វូន និងGalaxy Fits ដែលឧបត្ថម្ភដោយ Samsung Electronics៕