មកលេង កោះទន្សាយ ទុក្ខព្រួយទាំងឡាយនឹងរសាយបាត់អស់

កោះទន្សាយ ជាតំបន់ទេសចរណ៍កោះធម្មជាតិ ដ៏ស្រស់ស្អាតបំផុតមួយ ស្ថិតនៅក្នុងខេត្តកែប។ វាមានឈ្មោះជាភាសាអង់គ្លេសថា Rabbit Island ដោយឈ្មោះនេះត្រូវបានគេដាក់យ៉ាងដូច្នេះ ដោយសារតែរូបរាងរបស់កោះនេះមានសណ្ឋានដូចទៅនឹងសត្វទន្សាយ។

កោះទន្សាយ មានចម្ងាយប្រមាណ 4.5 គីឡូម៉ែត្រ ពីទីប្រជុំជនខេត្តកែប ហើយការធ្វើដំណើរតាមទូកដើម្បីទៅដល់កោះ គឺត្រូវចំណាយពេលប្រហែល 20 នាទី។ នៅពេលអ្នកធ្វើដំណើរទៅដល់លើកោះទន្សាយ អ្នកនឹងឃើញថាវាមានសភាពស្ងប់ស្ងាត់ ជាមួយនឹងទេសភាពដ៏ស្រស់ត្រកាលនៃឆ្នេរធម្មជាតិ។ ទីតាំងទេសចរណ៍ នៅកែបមួយកន្លែងនេះ ស័ក្តិសមសម្រាប់អ្នកដើរលេងបែបផ្សងព្រេង និង អ្នកស្រលាញ់ធម្មជាតិ។

អ្នកអាចធ្វើការសម្រាកនៅលើកោះ ដោយមាន Bungalow មួយចំនួនផងដែរ ប៉ុន្តែគួរបញ្ជាក់ថា វាមិនមែនជាប្រភេទផ្ទះស្នាក់ប្រណិតនោះទេ។ ភ្លើងអគ្គិសនី ត្រូវបានគេកាត់ផ្តាច់ត្រឹមម៉ោង 10 យប់ ខណៈ Wifi ភ្ញៀវអាចប្រើបាន​ក្នុងរយៈពេល 2 ទៅ 3 ម៉ោងប៉ុណ្ណោះ។ អ្នកនឹងចំណាយពេលជាច្រើនជាមួយនឹងធម្មជាតិ ដែលធ្វើឱ្យជីវិតរបស់យើងហាក់ដូចអ្នករស់នៅលើកោះ ពិតៗ អញ្ចឹងដែរ។

សកម្មភាពកម្សាន្តផ្សេងៗ ដែលភ្ញៀវអាចធ្វើនៅលើកោះទន្សាយ មានដូចជា ការស្ទូចត្រីនៅលើទូក មុជទឹកសមុទ្រ គេងសំដិលថ្ងៃនៅលើឆ្នេរ​ និង ស្រស់ស្រូបអាហារឆ្ងាញ់ៗជាដើម។ គួរឱ្យដឹងថា ភ្ញៀវអាច​អង្គុយ chill នៅ bar បែបអឺរ៉ុប នៅទីនោះ ជាមួយជម្រើស ស្រា cocktails ជាច្រើនប្រភេទ។ សាកស្រម៉ៃមើលថា ពេលថ្ងៃដើរលេងនៅលើកោះ ពេលល្ងាចហូបអាហារមើលថ្ងៃលិច បន្ទាប់មកផឹក cocktail ត្រជាក់ៗ និយាយរឿងក្នុងចិត្ត រួចក៏ចូលគេងជាមួយអារម្មណ៍ធូរស្បើយ Trip ទៅកាន់កោះទន្សាយ នឹងមិនធ្វើឱ្យអ្នកខកបំណងឡើយ៕