ពិព័ណ៍ពាណិជ្ជកម្មថៃ BCG Thai Festive Fair 2024 ត្រូវបានរៀបចំឡើងជាលើកដំបូងនៅកម្ពុជា និងពង្រីកទំនាក់ទំនងរវាងប្រទេសទាំងពីរ

ពិព័រណ៍ពាណិជ្ជកម្មថៃ «BCG Thai Festive Fair 2024» ត្រូវបានសម្ពោធបើកជាផ្លូវការ ក្រោមអធិបតីភាព លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម តំណាងលោកស្រី ចម និមល រដ្ឋមន្រ្តីក្រសួងពាណិជ្ជកម្ម និងលោក ឆឺតគៀត អាត់ថៈកន ឯកអគ្គរាជទូតថៃប្រចាំកម្ពុជា។

ពិព័រណ៍ពាណិជ្ជកម្មថៃ BCG THAI FESTIVE FAIR ត្រូវបានរៀបចំដោយអគ្គនាយកដ្ឋាន ជំរុញពាណិជ្ជកម្មអន្តរជាតិ នៃក្រសួងពាណិជ្ជកម្មថៃ។ ពិធីនេះ បានរៀបចំធ្វើឡើង នាថ្ងៃទី១៥ ខែសីហា ឆ្នាំ២០២៤។

ការរៀបចំតាំងពិព័រណ៍នេះ មានគោលបំណង ដើម្បីផ្តល់ជាវេទិកាសម្រាប់ពង្រីកទំនាក់ទំនងពាណិជ្ជកម្ម និងការតភ្ជាប់ពាណិជ្ជកម្មរវាងប្រទេសថៃ និងប្រទេសកម្ពុជា។ ជាពិសេស ប្រជាជនកម្ពុជា នឹងមានឱកាស ជ្រើសរើសទិញផលិតផលថៃ ដែលមានគុណភាពល្អ និងតម្លៃសមរម្យ។

លើសពីនេះទៅទៀត ពាណិជ្ជករថៃ និងកម្ពុជា នឹងមានឱកាសចាប់ដៃគូពាណិជ្ជកម្មជាមួយគ្នា ក្នុងអំឡុងពេលការតាំងពិព័រណ៍នេះផងដែរ។

ពិព័រណ៍ពាណិជ្ជកម្មនេះ គឺជាការផ្សព្វផ្សាយផលិតផល BCG របស់ប្រទេសថៃ (BCG មានន័យថា ជីវ-សេដ្ឋកិច្ច សេដ្ឋកិច្ចជារង្វង់ និងសេដ្ឋកិច្ចបៃតង) ដែលត្រូវបានរៀបចំឡើងជាលើកដំបូង នៅក្នុងប្រទេសកម្ពុជា និងដើម្បីឲ្យប្រជាជនកម្ពុជា បានស្គាល់និងយល់ដឹងពីផលិតផល BCG របស់ប្រទេសថៃ។

ផលិតផល BCG ពាក់ព័ន្ធនឹងការផលិតទំនិញ ពីធនធានជីវសាស្រ្តកកើតឡើងវិញ និងការបំប្លែងធនធានទាំងនេះ ទៅជាផលិតផលថ្មីមួយទៀត ហើយប្រែក្លាយទៅជាផលិតផល ដែលអាចប្រើប្រាស់ឡើងវិញ បាននិងការកែច្នៃវត្ថុធាតុដើម ដើម្បីបង្កើនតម្លៃនៃធនធាន ដែលមានស្រាប់ទាំងនេះ ជួយថែរក្សាបរិស្ថានបៃតង។

ពិព័រណ៍ពាណិជ្ជកម្មថៃ BCG THAI FESTIVE FAIR ធ្វើឡើងរយៈពេល៤ ថ្ងៃ គឺចាប់ ពីថ្ងៃទី១៥-១៨ ខែសីហា ឆ្នាំ២០២៤ ចាប់ពីម៉ោង៩ព្រឹក ដល់ម៉ោង៩យប់ នឹងមានការប្រគុំតន្រ្តី ដែលមានការចូលរួម ពីសំណាក់ តារាចំរៀងល្បីៗជាច្រើន ប្រចាំកម្ពុជា។ ក្នុងនោះ មានការតាំងបង្ហាញផលិតផលថៃជាង ២៥០ស្តង់ ដូចជា៖
១៖ ផ្នែកចំណីអាហារ និងភេសជ្ជៈ
២៖ ផ្នែកម៉ូដ សម្លៀកបំពាក់ និងសម្ភារៈប្រើប្រាស់ប្រចាំថ្ងៃ
៣៖ ផលិតផលសុខភាព និងសម្រស់
៤៖ សម្ភារៈផ្ទះបាយ និងដេគ័រ

សូមជម្រាប់ជូនថា ពិព័រណ៍ពាណិជ្ជកម្មថៃ BCG Thai Festive Fair 2024» នៅមជ្ឈមណ្ឌលតាំងពិព័រណ៍កោះពេជ្រ រាជធានីភ្នំពេញ ចាប់ពីថ្ងៃទី១៥ ដល់ថ្ងៃទី១៨ ខែសីហា ឆ្នាំ២០២៤ ដែលមានអ្នកចូលរួមយ៉ាងច្រើនគួរអោយកត់សម្គាល់៕