ខ្មែរ
English
កាលពីរាត្រីថ្ងៃទី 10 ខែវិច្ឆិកា ឆ្នាំ 2024 កម្មវិធីប្រឡងចម្រៀងលំដាប់ពិភពលោក Cambodian Idol រដូវកាលទី 5 បានប្រកាសរកឃើញម្ចាស់ជ័យលាភីប្រចាំរដូវកាលថ្មីនេះ គឺ បានទៅលើកម្លោះសម្លេងក្រអួន លោក គី សាវីន “Ki Savin”។
លោក គី សាវីន ជាបេក្ខជនមួយរូបក្នុងចំណោមបេក្ខជនប្រឡងទាំងអស់ ដែលហាក់អង្រួនបេះដូងហ្វេនៗ ងាកមកគាំទ្រយ៉ាងពេញទំហឹង ក្រោមសម្លេងដ៏ស្រាលស្រទន់ ក្រអួនគ្រប់ឃ្លោងឃ្លា ច្រៀងបានទាំងបទបុរាណ និងសម័យ។
សាវីន ទទួលបានប្រជាប្រិយភាព និងមានភាពលេចធ្លោយ៉ាងខ្លាំង ចាប់តាំងពីបង្ហាញវត្តមាននៅក្នុងវគ្គ Jude Audition ។ កាលនោះ លោក បានលើកយកបទបុរាណ “អនអើយស្រីអន” មកបកស្រាយលើឆាក ហើយបានឆក់យកការពេញចិត្តពីគណៈកម្មការទាំង 4 ព្រមទាំងទស្សនិកជនគ្រប់ៗរូប។
នៅរាត្រីថ្ងៃប្រកួតផ្តាច់ព្រ័ត្រ គី សាវីន មិនធ្វើឱ្យហ្វេនៗខកចិត្តឡើយ លោកបានបកស្រាយចម្រៀងដែលជ្រើសរើសយកមកប្រកួតប្រជែងបានយ៉ាងល្អ នៅទីបំផុត សាវីន ក៏ទទួលបានសម្លេងបោះឆ្នោតច្រើនជាងគេពីសំណាក់ទស្សនិកជន ឡើងកាន់តំណែងជាម្ចាស់ជ័យលាភី Cambodian Idol រដូវកាលទី 5 នេះ។
