អបអរសាទរ ខួបលើកទី៩ ចាប៉ីដងវែង ត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ

ថ្ងៃទី៣០ ខែវិច្ឆិកា ឆ្នាំ២០២៥ គឺជាខួប៩ឆ្នាំ នៃការដាក់បញ្ចូលចាប៉ីដងវែង ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ (៣០ វិច្ឆិកា ២០១៦ – ៣០ វិច្ឆិកា ២០២៥)។

ចាប៉ីដងវែងរបស់កម្ពុជា ត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ នៅទីក្រុងអាឌីស អាបាបា ប្រទេសអេត្យូពី កាលពីថ្ងៃទី៣០ ខែវិច្ឆិកា ឆ្នាំ២០១៦។

សូមជម្រាបថា ចាប៉ីដងវែង គឺជាឧបករណ៍តន្ត្រីវ័យចំណាស់មួយរបស់កម្ពុជា ដែលជាឧបករណ៍ដែលមានឆ្លាក់ នៅជញ្ជាំងប្រាសាទអង្គរវត្តផងដែរ។ ចាប៉ី អាចលេងបានមានអមជាមួយបទចម្រៀង ព្រមទាំងអាចច្នៃប្រឌិត និងបង្កើតបទថ្មីៗដោយខ្លួនឯងទៀតផង។

បទចម្រៀងចាប៉ីជាទូទៅរៀបរាប់អំពីរឿងបុរាណ ឬរឿងអប់រំខ្លីៗ ដល់ប្រជាជនពីគុណធម៌ និងវប្បធម៌ជាដើម។
សិល្បៈចាប៉ីដងវែង ថាមិនគ្រាន់តែប្រគុំសម្រាប់កម្សាន្តទេ តែជាសិល្បៈប្រពៃណីខ្មែរដ៏សម្បូរបែប, ជាបេតិកភណ្ឌ វប្បធម៌ និងជាស្នាដៃបុព្វបុរសមានតម្លៃលើសលប់មិនអាចកាត់ថ្លៃបាន។

សូមចូលរួមថែរក្សា សិល្បៈបុរាណខ្មែរ “ចាប៉ីដងវែង” ឱ្យបានគង់វង្សគ្រប់ជំនាន់ ដោយមានអ្នកបន្តវេន និង ចូលរួមគ្រប់សកម្មភាពថែរក្សា ចាប៉ីដងវែងឱ្យកាន់តែល្បីល្បាញដល់ឆាកអន្តរជាតិ។