ជំងឺទឹកនោមផ្អែម

តើជំងឺទឹកនោមផ្អែមជាអ្វី?

នៅពេលរាងកាយរំលាយអាហារ វាផ្តល់ជាតិស្ករទៅក្នុងឈាមរបស់យើង។ ជាតិស្ករនេះត្រូវបានហៅថា គ្លុយកូស​ ហើយរាងកាយរបស់យើងប្រើប្រាស់វាដើម្បីទាញយកនូវថាមពលដែលយើងត្រូវការ។ អាហារផ្អែមក្លាយទៅជាគ្លុយកូស ប៉ុន្តែអាហារដទៃទៀតក៏ក្លាយទៅជាគ្លុយកូសផងដែរ ជាពិសេសអាហារជាតិម្សៅរួមមាន បាយ​ ដំឡូង នំបុ័ង ឬរបបអាហារផ្សេងទៀតដែលធ្វើពីស្រូវសាឡី។​

ជំងឺទឹកនោមផ្អែម មានន័យថាជាការមានជាតិស្ករច្រើនពេក​នៅក្នុងឈាម។ ជាតិស្ករកាន់តែកើនឡើងនៅក្នុងឈាម គឺកាន់តែបង្កផលប៉ះពាល់កាន់តែអាក្រក់ដល់រាងកាយ។

បៀមនំបុ័ងសមួយដុំនៅក្នុងមាត់។ តើអ្នកអាចដឹងថាវាមានរសជាតិផ្អែមយ៉ាងណា?

ប្រភេទនៃជំងឺទឹកនោមផ្អែមដែលឃើញកើតមានញឹកញាប់បំផុតនោះគឺ ជំងឺទឹកនោមផ្អែមប្រភេទទី២។ ជំងឺទឹកនោមផ្អែមប្រភេទទី២ បង្កើនជាចម្បងដោយកង្វះសកម្មភាពរាងកាយ, ការបរិភោគអាហារមិនល្អ ជាពិសេសអាហារកញ្ចប់និង​អាហារកៃច្នៃ រួមទាំងការកើនឡើងនៃកម្រិតស្រ្តេសព្រមទាំងវិសមភាពនៅក្នុងជីវិតរស់នៅ។ ជំងឺទឹកនោមផ្អែមជា ជំងឺ “រ៉ាំរ៉ៃ” មានន័យថាថាវាអាចមានស្ថានភាពប្រសើរ ឬកាន់តែធ្ងន់ធ្ងរ ប៉ុន្តែវាមិនជាសះស្បើយទេ។

ដើម្បីរស់នៅឱ្យបានប្រសើរជាមួយនឹងជំងឺទឹកនោមផ្អែម កត្តាសំខាន់គឺត្រូវចេះគ្រប់គ្រងកម្រិតជាតិស្ករនៅក្នុងឈាមរបស់អ្នក។ ជំងឺទឹកនោមផ្អែមមានគ្រោះថ្នាក់ណាស់ព្រោះបើកម្រិតជាតិស្ករខ្ពស់ គឺអាចបណ្តាលឱ្យមានបញ្ហាផ្សេងៗ ដូចជាងងឹតភ្នែក បាត់បង់អវយវៈ បាត់បង់សមត្ថភាពរួមភេទ ដាច់សសៃរឈាមខួរក្បាលឬស្លាប់ទៀតផង។ នៅពេលរក្សាកម្រិតជាតិស្ករឱ្យនៅទាប យើងអាចជៀសវាងបញ្ហាទាំងនេះបានច្រើន ហើយអ្នកអាចប្រកបរបរផ្សេងៗក្នុងជីវិតនិងរស់នៅបានដោយសុខភាពប្រសើរ។

សញ្ញានៃជំងឺទឹកនោមផ្អែម

ជារឿយៗ សញ្ញាដំបូងៗនៃជំងឺទឹកនោមផ្អែម គឺអាចនឹងពិបាកសម្គាល់ណាស់។ ជួនកាល វាមិនបង្ហាញសញ្ញាអ្វីទាំងអស់។​ មនុស្សជាច្រើនមានជំងឺទឹកនោមផ្អែមដោយមិនដឹងខ្លួនទៀតផង។

សញ្ញាដែលអាចបណ្តាលមកពីជំងឺទឹកនោមផ្អែម ៖

• ស្រេកទឹក
• នោមញឹកញាប់
• ស្រវាំងភ្នែក
• គ្មានកម្លាំង ឬឆាប់ហត់
• របួសមិនងាយជា
• ស្ពឹកជើង
• មេរោគផ្សិត​ Candida កើតឡើងដដែលៗចំពោះស្រ្តី

សញ្ញាទាំងនេះកើតឡើងជាញឹកញាប់នៅក្នុងបញ្ហាសុខភាពជាច្រើន។ដូច្នេះអ្នកមិនអាចសន្និដ្ឋានថាមនុស្សម្នាក់មានជំងឺទឹកនោមផ្អែមដោយផ្អែកលើតែសញ្ញាទាំងនេះបាននោះទេ។ អ្នកត្រូវធ្វើតេស្តឈាម ដើម្បីឱ្យដឹងច្បាស់។

សញ្ញាគ្រោះថ្នាក់

នៅពេលដែលកម្រិតជាតិស្ករក្នុងឈាមឡើងខ្ពស់ពេក វាអាចបណ្តាលឱ្យ ៖

• ស្រេកទឹកជាខ្លាំង
• ខ្សោយ និងងងងុយគេងជាខ្លាំង
• វង្វេង
• ឃ្លានខុសប្រក្រតី
• ស្រកទំងន់ បើទោះបីជាបរិភោគគ្រប់គ្រាន់ក៏ដោយ

អ្នកដែលមានសញ្ញាទាំងនេះ គួរតែធ្វើតេស្តនិងទទួលការព្យាបាលយ៉ាងឆាប់រហ័ស។ អ្នកអាចនឹងស្លាប់ដោយសារកម្រិតជាតិស្ករខ្ពស់ពេក ប្រសិនបើមិនបានទទួលកាលព្យាបាលទេ។

បញ្ហានានាបង្កឡើងដោយជំងឺទឹកនោមផ្អែមដែលមិនត្រូវបានគ្រប់គ្រង

ប្រសិនបើអ្នកមិនបានព្យាបាលជំងឺទឹកនោមផ្អែមរាប់ខែ ឬរាប់ឆ្នាំ នោះកម្រិតជាតិស្ករឡើងខ្ពស់វាអាចបំផ្លាញដល់សិរីរាង្គ សរសៃប្រសាទ និងសរសៃឈាម។ បែបនេះបណ្តាលឱ្យមានបញ្ហាធ្ងន់ធ្ងរនៅក្នុងរាងកាយដែលអាច​បង្កគ្រោះថ្នាក់ជាអចិន្ត្រៃយ៍ ឬស្លាប់ទៀតផង។

1. ដាច់សរសៃឈាមខួរក្បាល (ខ្វិន)
2. ងងឹតភ្នែក
3. ជំងឺអញ្ចាញធ្មេញ បាក់ធ្មេញ
4. គាំងបេះដូង
5. វិបត្តិក្រលៀន
6. ការបង្ករោគលើស្បែកដែលមិនសះស្បើយ និងដំបៅកាន់តែរីកទៅៗ
7. ភាពស្ពឹក ឬឈឺចាប់ (ជំងឺប្រព័ន្ធប្រសៃប្រសាទ)
8. បាត់បង់ចំណង់ផ្លូវភេទ ការរួមភេទមានការឈឺចាប់
9. ចំពោះបុរស៖ លិង្គមិនឡើងរឹង
10. ចំពោះស្រ្តី៖ មេរោគផ្សិត Candida នៅទ្វាមាស

ជាតិស្ករនៅក្នុងឈាម អាចបណ្តាលឱ្យខូចសរសៃប្រសាទ។ មនុស្សជាច្រើនដែលមានកម្រិតជាតិស្ករខ្ពស់ ចាប់ផ្តើមនាបអារម្មណ៍ឈឺចាប់នៅក្នុងជើង ឬស្ពឹកជើង។ វាក៏បង្កបញ្ហាពាក់ព័ន្ធនឹងចរន្តឈាមរត់ផងដែរ ដែលអាចធ្វើឱ្យកើតមានដំបៅលើស្បែក មិនសះស្បើយ និងសះយឺតយ៉ាវ។ ពួកគេអាចនឹងអស់កម្លាំងយ៉ាងឆាប់រហ័ស។ កម្រិតជាតិស្ករក្នុងឈាមខ្ពស់ អាចបំផ្លាញដល់ភ្នែកនិងក្រលៀន ធ្វើឱ្យ​ដំណើរការមិនបានល្អ ឬឈប់ដំណើរការតែម្តង។