មូលហេតុដែលបណ្តាលឱ្យ… សក់ស្កូវមុនអាយុ

កាលណាគេនិយាយអំពីសក់ស្កូវ គេតែងសំដៅទៅលើមនុស្សដែលមានវ័យចំណាស់ ឬ មនុស្សដែលមានអាយុច្រើន ប៉ុន្តែ តើអ្នកធ្លាប់ឆ្ងល់ទេ? ហេតុអ្វីអ្នកអាយុនៅវ័យក្មេងសោះ បែរជាមានសក់ស្កូវពាសពេញក្បាលទៅវិញ?

ជឿជាក់ថាមនុស្សគ្រប់ៗ តែងតែប្រាថ្នាចង់បានសក់ខ្មៅរលោងក្រឹប ដែលជំនួយលើកសម្រស់មួយកម្រិតបន្ថែម និងមើលទៅនៅតែក្មេងជានិច្ច។ សក់ស្កូវ ជាពិសេសស្កូវមុនអាយុមិនត្រឹមតែធ្វើឱ្យយើងបាក់សម្រស់ទេ ថែមទាំងធ្វើឱ្យ​យើងមានអារម្មណ៍មិនសប្បាយចិត្ត ​អំពល់​ទុក្ខ ខាតពេលវេលា និងចំណាយអស់ថវិកាច្រើនទៅលើការលាបសក់ប្រែពណ៌ខ្មៅប្រចាំ​ដើម្បី​បិទ​បាំង។

សូមក្រឡេកមកមើលមូលហេតុខាងក្រោមមួយចំនួន ដែលបណ្តាលឱ្យសក់របស់អ្នកឡើងស្កូវមុនអាយុ ៖

មេតាប៉ូលីស

ការប្រែប្រួលរបស់មេតាប៉ូលីស បានបំប្លែងសារធាតុប្រូតេអ៊ីន ជាតិស្ករ ជាតិខ្លាញ់ និងបំប្លែងផ្សេងៗទៀតនៅក្នុងសារពាង្គកាយ ដែលជាហេតុបណ្តាលឱ្យពណ៌សក់មានការប្រែប្រួលខុសពីសក់ធម្មជាតិ។

ការប្រើប្រាស់ឱសថ

ការទទួលទានឱសថព្យាបាលមួយចំនួន ដូចជា ឱសថសាស្រ្ត ឱសថព្យាបាលជំងឺមហារីក ជំងឺគ្រុនចាញ់ និងជាប្រភេទឱសថកាត់បន្ថយសម្ពាធឈាមខ្ពស់ក៏ជាកត្តាធ្វើឱ្យសក់ប្រែពណ៌ក្លាយជាស្កូវផងដែរ។

កង្វះវីតាមីន

សក់របស់អ្នកនឹងប្រែជាស្កូវលឿនបំផុត លើសពីអ្វីដែលអ្នកនឹកស្មាន ប្រសិនបើសិរីរាង្គកាយរបស់អ្នក មានការខ្វះវីតាមីន B12 និងជាតិដែក។ ដូច្នេះសូមទទួលទានក្រុមអាហារ ដែលមានផ្ទុកសារធាតុទាំងពីរនេះជាប្រចាំ។

ស្ត្រេស (Stress)

លើសពីនេះ ស្ត្រេស គឺជាកត្តាចម្បងដែលបណ្តាលឱ្យអ្នកឡើងស្កូវទាំងវ័យក្មេង។ នៅពេលដែលអ្នកមានអារម្មណ៍ស្រ្តេស រាងកាយនឹងបញ្ចេញសារធាតុ norepinephrine ដែលធ្វើឱ្យប៉ះពាល់ដល់កោសិកា melanocyte ជាមូលហេតុសរសៃសក់ប្រែពណ៌ជាស។

មុខសញ្ញានៃស្រ្តេសរួមមាន៖

1. បញ្ហានៃការគេង
2. ការថប់បារម្ភ
3. ការផ្លាស់ប្ដូរចំណង់អាហារ
4. សម្ពាធ​ឈាម​ខ្ពស់