ឥណ្ឌូណេស៊ី បន្ធូរបន្ថយច្បាប់នាំចូលគ្រឿងអេឡិចត្រូនិក ស្បែកជើង និងវាយនភណ្ឌ

រដ្ឋមន្ត្រីក្រសួងសេដ្ឋកិច្ចរបស់ ប្រទេសឥណ្ឌូណេស៊ី បានបន្ធូរបន្ថយច្បាប់នាំចូលសម្រាប់ផលិតផល អេឡិចត្រូនិក ស្បែកជើង និងវាយនភណ្ឌ ដោយសម្រួលនីតិវិធីនៃការនាំចូល មួយចំនួននៅកំពង់ផែ នេះបើយោងតាមចុះផ្សាយរបស់ Nikkei Asia ។

កាលពីខែមីនា រដ្ឋាភិបាលឥណ្ឌូណេស៊ីបានរឹតបន្តឹងច្បាប់នៃការនាំចូលបានប៉ះពាល់ ដល់ទំនិញជាង ៣.០០០មុខ។ ច្បាប់នេះបានធ្វើឡើងក្នុង គោលបំណងការពារ ទំនិញឧស្សាហកម្មក្នុងស្រុក ពីការហូរចូលនៃផលិតផលក្រៅស្រុក។

នៅក្នុងខែមេសា បទប្បញ្ញតិ្តបន្ថែមទៀតដើម្បីរឹតបន្តឹងការនាំចូលទំនិញអេឡិចត្រូវនិក រួមទាំងម៉ាស៊ីនត្រជាក់ ទូទឹកកក និងកុំព្យូទ័រយូរដៃត្រូវបានប្រកាស។

រដ្ឋាភិបាលបាននិយាយថា ចាប់តាំងពីពេលនោះមក កុងតឺន័រជាង ២៦,០០០ ត្រូវបានជាប់គាំងនៅឯកំពង់ផែសមុទ្រដ៏ធំបំផុតពីររបស់ប្រទេសនេះ ដោយសារតែឧបសគ្គខាងការិយាធិបតេយ្យ។

នៅក្នុងកំពុងផែនោះត្រូវបានផ្ទុកទំនិញជាច្រើនប្រភេទ រួមទាំងដែកថែប សំលៀកបំពាក់ គ្រឿងអេឡិចត្រូវនិក និងផលិតផលគីមី ជាដើម។

លោក Airlangga Hertarto ដែលជាប្រធានរដ្ឋមន្ត្រីសេដ្ឋកិច្ច បាននិយាយនៅក្នុងសន្និសីទសារព័ត៌មានមួយថា រដ្ឋាភិបាលបានសម្រេចចិត្តត្រឡប់រកច្បាប់មុន ដើម្បីលុបការដឹកកុងតឺន័រនៅកំពង់ផែ ដែលមានប្រសិទ្ធភាពភ្លាមៗ។

បន្ទាប់ពីមានការតវ៉ាពីសភាពាណិជ្ជកម្ម និងឧស្សាហកម្មឥណ្ឌូណេស៊ី រដ្ឋាភិបាលបាន សម្រេចប្រើច្បាប់មុន ហើយលុបចោលការរឹតបន្តឹងសម្រាប់មុខទំនិញមួយចំនួន ដែលដឹកជញ្ជូនតាមកុងតឺន័រនៅកំពង់ផែ។