ខ្មែរ
English
កាលពីរាត្រីថ្ងៃព្រហស្បតិ៍ ទី19 ខែសីហា តារាហូលីវូដ អ្នកស្រី Angelina Jolie បានបង្ហាញខ្លួនបញ្ចេញពន្លឺដ៏ត្រចះត្រចង់ និងភាពស្រស់ស្អាតគ្មានទាស់ នៅលើកម្រាលព្រំក្រហមនៃមហោស្រពទីក្រុង Venice ឆ្នាំ 2024 អស់រយៈពេល 8 នាទីពេញធ្វើឱ្យផ្ទុះមានការចាប់អារម្មណ៍យ៉ាងខ្លាំង ហាក់ដូចកំពុងពាំនាំព្រលឹងតារាស្រីអូប៉េរ៉ា “Maria Callas” រស់រានមានជីវិតត្រឡប់មកកាន់ឆាកអន្តរជាតិវិញ។
សូមឱ្យដឹងថា Angelina Jolie បានសម្តែងតួជា Maria Callas នៅក្នុងខ្សែភាពយន្តស្តីអំពីជីវប្រវត្តិនៃស្ត្រីដ៏មានឥទ្ធិពល ចំណងជើង “Maria” ក្រោមស្នាដៃនិពន្ធដឹកនាំរឿងដោយ លោក Chilean Pablo Larrain។
“Maria” គឺជាខ្សែភាពយន្តបែបជីវប្រវត្តិដែល Angelina Jolie សម្តែងជាតួអង្គ Maria Callas ឆ្លុះបញ្ចាំងអំពីខ្សែជីវិតផ្ទាល់ខ្លួនរបស់តារាចម្រៀងអូប៉េរ៉ាដ៏ល្បីល្បាញរបស់ពិភពលោក និងជារូបតំណាងវប្បធម៌សិល្បៈឈ្មោះ Maria Callas កើតឡើងក្នុងកំឡុងឆ្នាំ 1970 នៅទីក្រុងប៉ារីស។
ខ្សែភាពយន្តនេះនិយាយអំពីរឿងសោកនាដកម្ម និងជីវិតដ៏ច្របូកច្របល់របស់ Callas ដោយឆ្លុះបញ្ចាំងអំពីការបាត់បង់ទំនុកចិត្តលើសម្លេងរបស់នាង ទំនាក់ទំនងស្នេហាប្រេះឆាជារវាង Aristotle Onassis និងភាពលំបាកតស៊ូនៅក្នុងជីវិតរហូតដល់ថ្ងៃចុងក្រោយនៃជីវិត។
ក្រោយមកនៅក្នុងខ្សែភាពយន្តក៏បានបង្ហាញឱ្យឃើញអំពីការលះបង់ពេញមួយជីវិតរបស់នាងទៅកាន់ទស្សនិកជនទូទាំងពិភពលោកជាមួយនឹងការសម្តែងចម្រៀងអូប៉េរ៉ាដែលច្រៀងដោយខ្លួនឯង ដើម្បីកំដរភាពសប្បាយរីករាយរបស់ទស្សនិកជនគ្រប់រូប។ បន្ថែមពីនេះ ខ្សែភាពយន្ត Maria ត្រូវបានថតនៅក្នុង La Scala Opera House នៅឈុតឆាកដែល Angelina Jolie សម្តែងបង្ហាញអំពីសមត្ថភាពសម្លេងថ្មីរបស់នាង ដោយតារាហូលីវូដស្រីមួយនេះមិនធ្លាប់បានច្រៀងសម្រៀងពីមុនមកឡើង “សូម្បីតែច្រៀងនៅខារ៉ាអូខេ” ។
អ្នករចនាផលិតកម្ម លោក Guy Hendrix Dyas បានខិតខំប្រឹងប្រែងរួមគ្នា ដើម្បីបង្កើតគំនិតបញ្ចូលគ្នានូវរចនាប័ទ្មនៃទសវត្សរ៍ឆ្នាំ 1940 ដល់ឆ្នាំ 1970 ជាមួយនឹងវង់តន្ត្រីអូប៉េរ៉ា។ រីឯ សម្លៀកបំពាក់របស់ Callas ត្រូវបានផលិតឡើងដោយមិនបំពាក់រោមសត្វថ្មីឡើយ ហើយក៏មានការពិគ្រោះយោបល់ជាមួយក្រុមសិទ្ធិសត្វ “PETA” ដើម្បីធានាថាគ្មានការខកខានណាមួយបានកើតឡើងនៅក្នុងផ្នែកសម្លៀកបំពាក់។
