ខ្មែរ
English
ពិធីមង្គលការប្រពៃណីខ្មែរ មានតាំងពីបុរាណកាលមកមានច្រើនថ្ងៃ ច្រើនកម្មវិធី ហើយតែងតែស្ថិតនៅក្រោមការរៀបចំពីមាតាបិតាទាំងសងខាង ប៉ុន្តែក្នុងសម័យថ្មី លោកផ្តល់សិទ្ធឲ្យកូនប្រុសកូនស្រី អាចស្វែងយល់ពីគ្នាជាមុន ដើម្បីស្វែងរកចំនុចរួមមួយក្នុងការកសាងសុភមង្គលគ្រួសារ នោះគឺការគោរព ផ្តល់តម្លៃចំពោះគ្នានឹងគ្នា។ លើសពីស្នេហា ទាំងកូនក្រមុំ និងកូនកំលោះត្រូវគោរពតាមបំណងប្រាថ្នា និងទំនៀមទម្លាប់របស់គ្នាទៅវិញទៅមក។ ក្នុងករណីដែលគូស្នេហ៍ទាំងពីរ ខុសជាតិសាសន៍គ្នា វាកាន់តែមានសារៈសំខាន់ណាស់ក្នុងការបើកចំហរអំពីតម្រូវការរបស់អ្នក ដើម្បីស្វែងរកចំណុចខ្លឹមក្នុងការកសាងគ្រួសារមួយ និងរបៀបរៀបចំកម្មវិធីឲ្យសមស្របតាមប្រពៃណីទាំងសងខាង។
ស្នេហានាំមនុស្សពីរនាក់មកជាជួបគ្នា បើទោះបីជាការចិញ្ចឹមបីបាច់ ធំធាត់មកដូចគ្នា ឬខុសគ្នាក៏ដោយ។ អាពាហ៍ពិពាហ៍ដែលរួមបញ្ចូលវប្បធម៌ពីរផ្សេងគ្នា គឺរឹតតែត្រូវរៀនអំពីគ្នាកាន់តែច្រើន ទាំងការយល់ឃើញ ទាំងទស្សនវិស័យលើប្រពៃណីដែលពួកគេត្រូវបានបង្រៀន និងអនុវត្តមកតាំងពីតូចក្រូចឆ្មា ដើម្បីស្វែងរកមូលដ្ឋានរួម ក្នុងការរៀបចំពិធីមួយឡើង។ ជាគូស្វាមីភរិយានឹងគ្នា ត្រូវតែចេះប្រាប់ ចេះស្តាប់ និងចេះស្វែងយល់ពីគ្នាទៅវិញទៅមក ចេះអត់ធ្មត់ និងអភ័យឲ្យគ្នា នោះហើយជាអ្វីដែលមានសារៈសំខាន់បំផុតសម្រាប់ជីវិតគូ។ ជីវិតគូម្នាក់ៗមានភាពផ្ទាល់ខ្លួន នឹងមិនដូចគ្នាទេ ប៉ុន្តែនោះហើយជាអ្វីដែលធ្វើឱ្យការរួបរួមរបស់មនុស្សពីរនាក់មានភាពស្រស់ស្អាត។
ការៀបចំពិធីមង្គលការនាសម័យកាលនេះ ពីមួយថ្ងៃទៅមួយថ្ងៃ មនុស្សកាន់តែច្រើនកំពុងដើរឆ្ងាយពីរបៀបរៀបចំបែបប្រពៃណីបូរាណ។ ទោះជាយ៉ាងណាក៏ដោយ ពួកគេនៅតែជ្រើសយកកម្មវិធីណាដែលពួកគេគិតថាមានន័យបំផុត សម្រាប់ថ្ងៃពិសេសរបស់ពួកគេ។ អ្វីៗក្នុងលោកនេះប្រែប្រួល និងរីកចម្រើនទៅតាមពេលវេលា ប៉ុន្តែអ្វីដែលសំខាន់នោះគឺថា ស្នេហានៅស្ថិតស្ថេរ និងរឹងមាំ។ អាពាហ៍ពិពាហ៍គឺជាពិធីដ៏ស្រស់ស្អាតមួយដែលប្រារឰនូវសេចក្ដីស្រឡាញ់ និងការភ្ជាប់ទំនាក់ទំនងរវាងមនុស្សពីរនាក់ និងក្រុមគ្រួសារទាំងសងខាងឱ្យក្លាយទៅជាចំណងដ៏រឹងមាំមួយ។
