កញ្ញាឯកកូនកាត់ អង់គ្លេស Julia ចូលរួមដើរម៉ូតរកមូលនិធិជួយព្យាបាលជំងឺមហារីករបស់ ឆាលី

តាមការ​ជូនដំណឹងរបស់ Cambodia International Models បានឲ្យដឹងថា បេក្ខភាពកញ្ញាឯក Miss Celebrity Cambodia 2024 គឺកញ្ញា Julia Russell នឹងមានវត្តមានចូលរួមជាតារាបង្ហាញម៉ូត ក្នុងព្រឹត្តិការណ៍ដាក់ដេញថ្លៃសិល្ប:គំនូរ និងបង្ហាញម៉ូតសម្លៀកបំពាក់ ដើម្បីរៃអង្គាសថវិកាសប្បុរសធម៌។

ព្រឹត្តិការណ៍មួយនេះ ត្រូវបានរៀបចំឡើងដើម្បីរៃអង្គាសមូលនិធិសប្បុរសធម៌ជួយសង្គ្រោះជីវិត ឆាលី តាមរយៈកម្មវិធីលក់វត្ថុសិល្បៈ សំលៀកបំពាក់ និងការលក់សំបុត្រ ហើយ វត្តមានរបស់ Julia រួមជាមួយសិល្បករខ្មែរជាច្រើននាក់ទៀត នឹងក្លាយជាពន្លឺថ្មីក្នុងការជួយសង្គ្រោះជីវិតឆាលីពីជម្ងឺមហារីកដំណាក់កាលទី៤។

កម្មវិធីនេះ នឹងប្រព្រឹត្តទៅនៅថ្ងៃទី ១៩ ខែឧសភា ឆ្នាំ២០២៤ ចាប់ពីម៉ោង ៥ ល្ងាច នៅហ្វេកធើរីភ្នំពេញ។

ឆលី វ័យ ៤ឆ្នាំ ជាក្មេងប្រុសកំពុងតស៊ូពុះពារនឹងជំងឺ​មហារីកដុំសាច់ក្នុងខួរក្បាលកម្រិតធ្ងន់ធ្ងរដែលកំពុងត្រូវការថវិកាច្រើនក្នុងការព្យាបាលពីបងប្អូនមហាជន។ ឆាលី ត្រូវជាកូនបង្កើតរបស់សិល្បករគំនូរ ព្រហ្ម ពន្លឺ ដែលមានមូលដ្ឋាននៅខេត្តសៀមរាប។

 

ក្រុមគ្រួសាររបស់ ឆាលី កំពុងពុះពារគ្រប់យ៉ាង ដើម្បីអោយកូនជាទីស្រឡាញ់របស់ខ្លួន គេចផុតពីជំងឺដ៏កាចសាហាវមួយនេះ ដែលបាន និងកំពុងធ្វើបាបកុមារដទៃទៀតផងដែរ៕