កម្ពុជានាំចេញអង្ករជាង៥៧ម៉ឺនតោន ដោយទទួលបានទឹកប្រាក់ជាង៤១៣លានដុល្លារ ក្នុងរយៈពេល១១ខែនៃឆ្នាំ២០២៤

ក្នុងរយៈពេល១១ខែ នៃឆ្នាំ២០២៤ កម្ពុជាបាននាំចេញអង្ករបានចំនួន ៥៧៥ ៥៦២តោន តាមរយៈក្រុមហ៊ុននាំចេញអង្ករចំនួន ៥៥ ក្រុមហ៊ុន ទៅកាន់គោលដៅចំនួន ៦៧ ដោយយោងតាមសេចក្ដីប្រកាសរបស់សហព័ន្ធស្រូវអង្ករកម្ពុជានៅថ្ងៃទី០៥ ខែធ្នូ ឆ្នាំ២០២៤។

ដោយក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ បានបរិមាណអង្ករចំនួន ២៨៣ ៩៨១តោន គិតជាទឹកប្រាក់ចំនួន ២០៧,៥៥លានដុល្លារ ទៅកាន់ប្រទេសចិនរួមទាំងហុងកុង និងម៉ាកាវចំនួន ១០៩ ៤៤៨តោន គិតជាទឹកប្រាក់ចំនួន ៦៩,៩៧លានដុល្លារ ទៅកាន់ប្រទេសក្នុងអាស៊ាន រួមទាំងទីម័រខាងកើត ចំនួន៧ប្រទេស បានបរិមាណចំនួន ១១៣ ៧៩២តោន គិតជាទឹកប្រាក់ចំនួន៧៦,៣៤លានដុល្លារ និងទៅកាន់គោលដៅ៣១ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី និងញ៉ូហ្សេឡេន។ល។ បានចំនួន ៦៨ ៣៤១តោន គិតជាទឹកប្រាក់ចំនួន ៦០,០៤លានដុល្លារ។ចំពោះប្រភេទអង្ករ បាននាំចេញអង្ករក្រអូបចំនួន៧៤,៨៥ភាគរយ ប្រភេទអង្ករសធម្មតា ២០,១០ភាគរយ អង្ករចំហ៊ុយ ២,៩៥ភាគរយ អង្ករសរីរាង្គចំនួន១,៨១ភាគរយ និងអង្ករផ្សេងៗចំនួន០,២៩ភាគរយ។

កាលពីថ្ងៃអង្គារ ទី១០ ខែកញ្ញា ឆ្នាំ២០២៤ កន្លងទៅ កម្ពុជាបានរៀបចំ វេទិកាស្រូវអង្ករកម្ពុជាលើកទី៧ ឆ្នាំ២០២៤ ក្រោមពាក្យស្លោក៖ ការប្រែក្លាយច្រវាក់ផ្តគត់ផ្គង់អង្ករកម្ពុជាឲ្យកាន់តែមាន ភាពធន់ បរយាបន្ន និងនិរន្តរភាព ដែលរៀបចំឡើងនៅសណ្ឋាគារ សូហ្វីតែល ភ្នំពេញ ភូគីត្រា។ កម្មវត្ថុចម្បងនៃវេទិកាស្រូវអង្ករកម្ពុជាឆ្នាំ២០២៤ គឺដើម្បីផ្សព្វផ្សាយអំពីសក្តានុពលនៃវិស័យស្រូវអង្ករកម្ពុជាទៅកាន់ពិភពលោក តាមរយៈការបង្ហាញអំពីសមត្ថភាពផលិតកម្មស្រូវ ការកិនកែច្នៃ និងភាពប្រជែងឈ្នះផ្សេងទៀតរបស់វិស័យស្រូវអង្ករកម្ពុជា ចែករំលែកនិន្នាការនៃទីផ្សារ ការដាំដុះ និងបច្ចេកវិទ្យាដែលពាក់ព័ន្ធដល់ការដាំដុះស្រូវ ការកិនកែច្នៃស្រូវអង្ករ ចែករំលែកអំពីទស្សនៈនយោបាយ និងវិធានការនានារបស់រដ្ឋាភិបាលលើវិស័យស្រូវអង្ករ និងស្វែងរកធាតុចូល និងអនុសាសន៍នានាសម្រាប់លើកកម្ពស់វិស័យស្រូវអង្ករនៅកម្ពុ។

គួរបញ្ជាក់ដែរថា ប្រទេសកម្ពុជាក៏បាននាំចេញស្រូវចំនួន ៤ ៦៤២ ៥១១ តោនស្រូវសើម ដែលគិតជាទឹកប្រាក់បានប៉ាន់ប្រមាណ ១ ៣៧៨,៧៣ លានដុល្លារ ដែលក្នុងនោះ ៨៨ភាគរយ បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញពីអាជ្ញាធរមានសមត្ថកិច្ច៕