កម្មវិធីរបស់ អូលីវ៉ា គង់ រកឃើញបេក្ខភាព ៥នាក់ចុងក្រោយឆ្ពោះទៅផ្ដាច់ព្រ័ត្រនៅខែក្រោយ

កម្មវិធី​ប្រកួតដើរម៉ូត បង្កើតឡើង​ដោយ អូលីវ៉ា គង់ “Cambodia’s Queen of The Catwalk” បាន​រក​ឃើញបេក្ខភាពសម្រាំង ៥នាក់ចុងក្រោយហើយ ហើយពួកគេនឹងត្រូវប្រកួតគ្នានៅវគ្គផ្ដាច់ព្រ័ត្រនៅខែក្រោយនេះ ដើម្បី​យកតែបេក្ខភាពជ័យលាភីតែម្នាក់។

នេះជា​លើកទី១​របស់ អូលីវ៉ា សម្រាប់ការបង្កើត​កម្មវិធីប្រកួតដើរម៉ូដ ដើម្បីផ្ដល់ជាវេទិកា​អោយ​អ្នកមាននិស្ស័យចូលចិត្ត​វិស័យដើរម៉ូតបានបញ្ចេញសមត្ថភាព និង​សម្រេច​ក្ដីស្រមៃរបស់ពួកគេ។

 

កម្មវិធី​នេះ បានដំណើរ​អស់រយៈ​ពេលជាង ១ខែ​មកហើយ។ តាម អូលីវ៉ា តាំងពីដំបូង មានបេក្ខជន​បានដាក់ពាក្យ​ចូល​រួម​ប្រកួត​ចំនួន​ដល់​ទៅ​ជាង ៣០០នាក់​ឯណោះ។ បន្តមកកម្មវិធីបានធ្វើការជម្រុះ យក ៦០នាក់ ហើយចុងក្រោយ​នេះ នៅសល់​តែ ៥នាក់ប៉ុណ្ណោះ។

ពួកគេទាំង ៥ ​នឹង​ប្រកួតគ្នាបន្តទៀតក្នុងកម្មវិធី​រៀបចំផ្ទាល់នៅ «𝗛𝗮𝗹𝗹 𝗔𝗘𝗢𝗡 𝗠𝗲𝗮𝗻𝗰𝗵𝗲𝘆» ប្រព្រឹត្តឡើងនៅថ្ងៃទី 06 ខែកក្កដា ឆ្នាំ2024 ដោយ​មាន​ការផ្សាយផ្ទាល់តាមរយៈ Page Facebook “Cambodia Queen of the Catwalk” ចាប់ពីម៉ោង7:30នាទី។

 

សម្រាប់ការទស្សនាផ្ទាល់ តម្រូវ​អោយទិញសំបុត្រដែលមានតម្លៃចែកជា៣ប្រភេទ គឺសំបុត្រ VVIP មានតម្លៃ 50ដុល្លារ សំបុត្រ VIP មានតម្លៃ 30ដុល្លារ និងសំបុត្រធម្មតាតម្លៃ 20ដុល្លារ។

លោក អូលីវ៉ា គង់ ដែលជាស្ថាបនិក បាន​បញ្ជាក់ថា ថវិកាចំនួន ៥០% ដែលបានមកពីការលក់សំបុត្រ នឹងត្រូវយកទៅបរិច្ចាគជូនទៅដល់កុមាររស់នៅក្បែរគំនរសម្រាមមួយផ្នែក និងមួយផ្នែកទៀត បរិច្ចាគទៅមន្ទីពេទ្យគន្ធបុប្ផា។

 

នៅថ្ងៃនេះ ក៏នឹងមានការដើរបង្ហាញម៉ូតសម្លៀកបំពាក់ និងការប្រកួតប្រជែងដ៏ស្វិតស្វាញរបស់បេក្ខនារីទាំង Top 5 អ្វីដែលពិសេសនឹងមានការចូលរួមពីតារាចម្រៀងល្បីៗជាច្រើនរូបនៅក្នុងព្រះរាជាណាចក្រកម្ពុជាថែមទៀត៕