ក្រុមចម្រៀងនារី NewJeans ក្លាយជាទូតសុឆន្ទៈថ្មី ផ្សព្វផ្សាយទេសចរណ៍កូរ៉េ ទៅកាន់ឆាកអន្តរជាតិ

ក្រុមចម្រៀងនារី NewJeans ត្រូវបានជ្រើសរើសតែងតាំងជាទូតសុឆន្ទៈ កិត្តិយស ឱ្យវិស័យទេសចរណ៍កូរ៉េខាងត្បូង ប្រចាំឆ្នាំ 2024។ នៅក្នុងតំណែងនេះ សមាជិកទាំង​ 5 របស់ NewJeans នឹងធ្វើការសហការគ្នាជាមួយស្ថាប័នទេសចរណ៍ Korea Tourism Organization ដើម្បីផ្សព្វផ្សាយអំពីសក្តានុពលទេសចរណ៍របស់កូរ៉េខាងត្បូង ទៅកាន់ពិភពលោក។

NewsJeans ទទួលយកតំណែងជាទូតសុឆន្ទៈកិត្តិយស​ ជំនួសឱ្យតារាសម្តែងស្រីឥណ្ឌា Anushka Sen ដែលត្រូវបានតែងតាំងដោយស្ថាប័នទេសចរណ៍កូរ៉េ កាលពីឆ្នាំ 2023 កន្លងទៅ។ ចំណែកសិល្បករផ្សេងៗទៀត ធ្លាប់បានជ្រើសរើសជាអ្នកតំណាងផ្សព្វផ្សាយទេសចរណ៍កូរ៉េ មានដូចជា Brave Girls, តារាសម្តែងប្រុស​ Lee Jae Wook និង influencer Lizzie Yeo។

ទន្ទឹមនឹងនេះ ប្រជាជនកូរ៉េសម្តែងការសាទរ និង សប្បាយចិត្តយ៉ាងខ្លាំង នៅពេលដែល NewJeans សម្រេចបាននូវជោគជ័យដ៏ត្រចះត្រចង់ ហើយពលរដ្ឋភាគច្រើនបញ្ចេញមតិថា ក្រុមចម្រៀងនារីវ័យក្មេងមួយនេះ ពិតជាស័ក្តិសមនៅក្នុងតំណែង ជាអ្នកតំណាងផ្សព្វផ្សាយវិស័យទេសចរណ៍របស់ប្រទេសទៅកាន់ឆាកអន្តរជាតិ។ គួរបញ្ជាក់ថា មួយរយៈពេលចុងក្រោយនេះ NewJeans ល្បីឈ្មោះបោះសំឡេងនៅក្នុងស្រទាប់យុវវ័យ ស្នេហាវិស័យ K-Pop ហើយពួកគេមានសមាជិកចំនួន 5 រូប គឺ Minji, Hanni, Danielle, Haerin និង Hyein៕