ក្រុមបិសាចក្រហម Manchester United និង Tottenham កំពុងស្វែងរកការផ្លាស់ប្តូរដើម្បីចុះហត្ថលេខាលើខ្សែប្រយុទ្ធនៅខែនេះ

ក្រុមទាំងពីរបានជួបការលំបាកក្នុងការលេងនៅរដូវកាលនេះ ហើយទំរង់លេងរបស់ពួកគេនៅក្នុងលីកបង្ហាញឱ្យឃើញថាមានការធ្លាក់ចុះខ្លាំង។
Man United របស់លោក Ruben Amorim និង Tottenham របស់លោក Ange Postecoglou កំពុងឈរនៅពាក់កណ្តាលតារាងក្នុងលីក ហើយពួកគេទាំងពីរត្រូវការគុណភាព និងភាពស៊ីជម្រៅនៅក្នុងក្រុមរបស់ពួកគេបន្ថែមទៀត។
នៅទីផ្សារដោះដូរកីឡាករខែមករាបានមកដល់ក្នុងពេលដ៏ល្អឥតខ្ចោះនេះសម្រាប់ក្រុមទាំងពីរដែលកំពុងតស៊ូយ៉ាងខ្លាំងក្នុងការស្វែងរកភាពស៊ីសង្វាក់គ្នាក្នុងរដូវកាលនេះសម្រាប់ក្រុម ហើយក្នុងខែនេះអាចផ្តល់ឱ្យពួកគេនូវឱកាសក្នុងការពង្រឹងក្រុមរបស់ពួកគេឡើងវិញ។

Man United បានបង្ហាញចំណាប់អារម្មណ៍ក្នុងការចុះហត្ថលេខាលើខ្សែប្រយុទ្ធរបស់ក្លឹប Paris Saint-Germain គឺកីឡាករ Randal Kolo Muani នៅក្នុងខែនេះ ប៉ុន្តែយោងតាមអ្នកកាសែតលោក Ben Jacobs បានអះអាងថាក្លឹប Tottenham ក៏បានបង្កើតទំនាក់ទំនងដោយផ្ទាល់ដើម្បីចុះហត្ថលេខាលើកីឡាកររូបនេះនៅចំពោះមុខបិសាចក្រហមផងដែរ។

ប្រធានក្លឹប Spurs លោក Daniel Levy កំពុងស្ថិតក្នុងការចរចាមួយដើម្បីចុះហត្ថលេខាលើកីឡាករ Kolo Muani ពីក្លឹប PSG ហើយទំនាក់ទំនងរបស់គាត់ជាមួយក្លឹបបារាំងអាចផ្តល់ឱ្យពួកគេច្រើនជាងភាគីនៅខាងជើងទីក្រុងឡុងគឺក្លឹប Man United ដើម្បីចុះហត្ថលេខាយកខ្សែប្រយុទ្ធរូបនេះមករួមក្រុម។

Man United និង Tottenham សុទ្ធតែចង់ចុះហត្ថលេខាលើកីឡាករ Randal Kolo Muani

ក្រុមនៅ Premier League ត្រូវការការបន្ថែមតំបន់ប្រយុទ្ធទៅក្នុងក្រុម។ ខណៈពេលដែលក្លឹប Spurs មានសំណាងមិនល្អជាមួយនឹងកីឡាកររបួសច្រើនក្នុងរដូវកាលនេះ។ ហើយក្លឹប Man United វិញមានបញ្ហាក្នុងការស្វែងរកស្ថិរភាពក្នុងក្រុម បន្ទាប់ពីការចាកចេញរបស់អតីតអ្នកចាត់ការលោក Erik ten Hag កីឡាកររបស់ Man United មិនអាចបង្កើតលទ្ធផលជាប់លាប់ក្រោមការដឹកនាំរបស់លោក Amorim បាននៅឡើយទេ។ វានៅតែត្រូវមើលថាតើអនាគតរបស់ Kolo Muani នឹងទៅជាយ៉ាងណា ហើយក្លឹបមួយណាដែលអាចចុះហត្ថលេខាលើគាត់បាន ប៉ុន្តែនៅពេលដែលអ្វីៗនៅដដែលនោះ Tottenham ហាក់បីដូចជាមានការពេញចិត្តខ្លាំង៕