គន្លឹះថែរក្សាស្បែក ក្នុងកំឡុងរដូវធ្លាក់ខ្យល់ត្រជាក់

រដូវធ្លាក់ខ្យល់បានឈានចូលមកដល់ហើយ… អាកាសធាតុប្រែប្រួលទាំងស្រុង ខ្យល់ត្រជាក់ចាប់ផ្តើមធ្លាក់ ហើយបរិយាកាសក៏ចាប់ផ្តើមមានសំណើម។

នៅក្នុងកំឡុងរដូវរងា ស្បែករបស់អ្នកអាចនឹងប្រឈមជាមួយបញ្ហាមួយចំនួន ដូចជា ស្ងួតខ្លាំង ប្រេះប្រកា ឡើងក្រហម មានអាការៈរលាក និងគ្មានសំណើមជាដើម។ ហេតុដូច្នេះហើយ រឿងចាំបាច់បំផុត ដែលអ្នកគួរធ្វើ គឺកែសម្រួលទម្លាប់ថែរក្សាស្បែករបស់អ្នក ដើម្បីរក្សាវាឲ្យមានផាសុកភាពល្អ និងភ្លឺថ្លា។

តស់! មកស្វែងយល់ពីអំពីរបៀបថែទាំសុខភាពស្បែក និងវិធីសាស្ត្រក្នុងការជ្រើសរើសសារធាតុផ្សំ ប្រភេទណា ដែលសាកសមសម្រាប់ស្បែកក្នុងលក្ខខណ្ឌអាកាសធាតុបែបនេះ៖

ចៀសវាងការស្រ្កាប់ ឬខាត់ស្បែកច្រើនលើសពេក

ការស្រ្កាប់ ឬខាត់ស្បែក អាចជួយកម្ចាត់កោសិកាស្បែកងាប់ និងជម្រុញការផ្លាស់ប្តូរកោសិកាថ្មីៗក៏ពិតមែន ប៉ុន្តែនៅក្នុងរដូវធ្លាក់ខ្យល់ត្រជាក់ អ្នកមិនគួរធ្វើវាញឹកញាប់ពេកទេ ព្រោះវាអាចកម្ចាត់ប្រេងធម្មជាតិនៃស្រទាប់ស្បែក ដែលបណ្តាលឱ្យវាកាន់តែស្ងួត និងបង្កការរលាក។

ការដុសសម្អាតស្បែកខ្លាំងៗពេក

ការដុសសម្អាតស្បែកខ្លាំងៗហួសកម្រិតពេក អាចកម្ចាត់ប្រេងធម្មជាតិលើស្បែក និងរំខានដល់ការលូតលាស់របស់កោសិការល្អ នឹងអាចបណ្តាលឱ្យខូចរបាំងស្បែក ធ្វើឲ្យស្បែកស្ងួត និងរលាក។
គន្លឹះ៖ សូមជ្រើសរើសផលិតផលណាដែលគ្មាន សារធាតុស៊ុលហ្វាត ឬជាតិអាល់កុល។

លាបក្រែមផ្តល់ជាតិសំណើមជាប្រចាំថ្ងៃ

អ្នកគួរតែលាបក្រែមផ្តល់ជាតិសំណើមឱ្យបានជាប់លាប់ជារៀងរាល់ថ្ងៃ ហើយប្រសិនបើអ្នកមានស្បែកងាយប្រតិកម្ម សូមជ្រើសរើសក្រែមផ្តល់សំណើមណាដែលគ្មានក្លិនក្រអូប ឬសារធាតុឡាណូលីន។ គន្លឹះសំខាន់ដែលអ្នកគួធ្វើ គឺលាបផ្ទាល់ទៅលើស្បែកកំពុងសើមតិចៗ បន្ទាប់ពីងូតទឹក។

ជ្រើសរើសក្រែមផ្តល់ជាតិសំណើមឱ្យបានត្រឹមត្រូវ

សូមចៀសវាងផលិតផលណាដែលមានសារធាតុផ្សំ ដែលបង្កការរលាកដូចជា សារធាតុ Retinoids, អាស៊ីត Exfoliating, និងវីតាមីន C។ បន្ថែមពីនេះ សូមស្វែងរកក្រែមផ្តល់ជាតិសំណើមដែលមានធាតុផ្សំដែលមានវាស់កម្រិតត្រឹមត្រូវាតាមស្តង់ដា។ សារធាតុដែលគួរស្វែងរកនៅក្នុងផលិតនោះមាន ទាំងនេះ ៖

• ឌីមេទីកុន (Dimethicone)

• គ្លីសេរីន (Glycerin)

• អាស៊ីត Hyaluronic

• ប្រេងសំណើម រួមមានដូចជា ប្រេង jojoba និងប្រេងរ៉ែធម្មជាតិ

• ឡាណូលីន (Lanolin)

• Petrolatum

• Shea Butter

ការប្រើប្រាស់ឡេការពារកម្តៅថ្ងៃ (Sunscreen)

បើទោះបីមានខ្យល់ត្រជាក់ខ្លាំង ធ្វើឱ្យអ្នកមិនមានអារម្មណ៍ថាក្តៅហួតហែងក៏ដោយ ក៏អ្នកមិនត្រូវធ្វេសប្រហែសក្នុងការលាបឡេការពារកម្តៅដែរ។ អ្នកគប្បីលាបឡេការពារកម្តៅថ្ងៃដែលមានកម្រិត SPF 30 ឬខ្ពស់ជាងនេះ។