ឌូបៃ កំពុងសាងសង់ព្រលានយន្តហោះដ៏ធំបំផុត និងបំពាក់បច្ចេកវិទ្យាទំនើបបំផុតរបស់ពិភពលោក

ឌូបៃ កំពុងសាងសង់ព្រលានយន្តហោះដ៏ធំបំផុត និងបច្ចេកវិទ្យាខ្ពស់បំផុតមួយរបស់ពិភពលោក។ នៅពេលបញ្ចប់ វានឹងធំជាងអាកាសយានដ្ឋានអន្តរជាតិឌូបៃបច្ចុប្បន្ន ដល់ទៅប្រាំដង។ ហើយនឹងមានទំហំធំគ្រាប់គ្រាន់ ដើម្បីស្វាគមន៍អ្នកដំណើរជាង ២៦០ លាននាក់ជារៀងរាល់ឆ្នាំ។ ទីក្រុងឌូបៃ មានព្រលានយន្តហោះមួយចំនួន ប៉ុន្តែអាកាសយានដ្ឋានសំខាន់ពីរគឺ អាកាសយានដ្ឋានអន្តរជាតិឌូបៃ (DXB) និងអាកាសយានដ្ឋានអន្តរជាតិ Al Maktoum (DWC)។ ហើយនៅពេលដែលមនុស្សធ្វើដំណើរតាមយន្តហោះទៅកាន់ទីក្រុងឌូបៃសព្វថ្ងៃនេះ ពួកគេជាធម្មតាចុះចត នៅព្រលាន DXB ។

ប៉ុន្តែអ្វីៗនឹងផ្លាស់ប្តូរឆាប់ៗនេះ នៅពេលដែលអាកាសយានដ្ឋានថ្មី ដែលសាងសង់ និងពង្រីកនៅលើព្រលានចាស់ ដែលមានស្រាប់ ត្រូវបានស្ថាបនារួចរាល់នាពេលខាងមុខ។ ចក្ខុវិស័យរបស់អាជ្ញាធរក្រុងឌូបៃ គឺនឹងសាងសង់ព្រលានថ្មីមួយ នៅលើព្រលានចាស់ដែលមានស្រាប់ ហើយនឹងពង្រីកអោយធំ បំពាក់ដោយបច្ចេកវិទ្យាទំនើបចុងក្រោយ។ ឥឡូវនេះ ចក្ខុវិស័យនោះកំពុងក្លាយជារូបរាង ហើយក្នុងរយៈពេលចន្លោះ ពី ៥ ទៅ ១០ឆ្នាំខាងមុខ អាកាសយានដ្ឋានអន្តរជាតិ Al Maktoum នឹងក្លាយទៅជាមជ្ឈមណ្ឌលសំខាន់របស់ទីក្រុងឌូបៃបន្តិចម្តងៗ។ ព្រលាននេះ នឹងមានច្រកទ្វារយន្តហោះជាង ៤០០ និងផ្លូវរត់ស្របគ្នាចំនួន ៥ ដែលជាដំណោះស្រាយ ជួយដល់អាកាសយានដ្ឋាន ប្រើដើម្បីបង្កើនសុវត្ថិភាព និងសមត្ថភាពចរាចរណ៍ផ្លូវអាកាស។

យោងតាមលោក Paul Griffiths នាយកប្រតិបត្តិនៃ DubaiAirports បញ្ជាក់ថាការពង្រីក និងសាងសង់ DWC ឡើងវិញនឹងត្រូវចំណាយយ៉ាងហោចណាស់ ៣៤,៨៥ ពាន់លានដុល្លារអាមេរិក។ ជាមួយនឹងអ្នកដំណើរ ៨៧ លាននាក់ ទីក្រុងឌូបៃ គឺជាព្រលានយន្តហោះដែលមមាញឹកបំផុតទីពីរនៅលើពិភពលោកកាលពីឆ្នាំមុន នៅពីក្រោយអាកាសយានដ្ឋានអន្តរជាតិ Hartsfield-Jackson Atlanta ដែលមានអ្នកដំណើរចំនួន ១០៤ លាននាក់។ អាជ្ញាធរទីក្រុងឌូបៃ និយាយថា អាកាសយានដ្ឋានថ្មីនេះត្រូវបានរចនាឡើងដើម្បីដោះស្រាយជាមួយនឹងអ្នកដំណើរ ២៦០ លាននាក់ជារៀងរាល់ឆ្នាំ។ នៅពេលដែលពួកគេនិយាយដូច្នេះ អ្វីដែលពួកគេមានន័យគឺពួកគេរំពឹងថាព្រលានយន្តហោះ DWC នឹងទទួលបានចំណាត់ថ្នាក់លេខមួយនៅក្នុងបញ្ជីពិសេសនេះ។ កាលពីឆ្នាំមុន មនុស្ស ៨,៦ ពាន់លាននាក់បានធ្វើដំណើរដោយយន្តហោះយ៉ាងហោចណាស់ម្តង ហើយយោងទៅតាម ACI (Airports Council International) ចំនួននេះនឹងកើនឡើងនៅក្នុងប៉ុន្មានឆ្នាំខាងមុខនេះ នៅពេលដែលចំនួនប្រជាជនពិភពលោកកើនឡើង៕