ខ្មែរ
English
ភូមិទឹកធ្លាក់វេទមន្តនៅទីក្រុង Furong នៃខេត្ត Hunan របស់ប្រទេសចិនហាក់ដូចដឹកដៃអ្នកឆ្លងចូលទៅក្នុងរូបគំនូរបុរាណមួយផ្ទាំង ពោរពេញទៅដោយសម្រស់ធម្មជាតិស្រស់ត្រកាលក្នុងសម័យកាលបុរាណ ឆ្លុះបញ្ចាំងអំពីប្រពៃណី ទំនៀមទម្លាប់ក្នុងការរស់នៅរបស់ជនជាតិភាគតិចនៃប្រទេសចិន។
ទីក្រុងបុរាណនេះមានអាយុកាលប្រមាណជាង 2000 ឆ្នាំមកហើយ និងជាទីជម្រករបស់ជនជាតិភាគតិច “Tujia” មានទីតាំងស្ថិតក្នុងខេត្ត Hunan នៅចន្លោះភ្នំ Avatar ក្នុងទីក្រុង Zhangjiajie និងភូមិ Phoenix បុរាណនៃតំបន់ Fenghuang។ ទីក្រុង Furong គឺជាភូមិមួយក្នុងចំណោមភូមិបុរាណចំណាស់ទាំងអស់នៅក្នុងប្រទេសចិន ដែលនៅរក្សាភាពទាក់ទាញនៃសម័យកាលអតីតកាល។
ទីក្រុង Furong មានលក្ខណៈខុសប្លែកពីគេ ព្រោះភូមិនេះបានសាងសង់នៅព័ទ្ធជុំវិញទន្លេអមជាមួយទឹកធ្លាក់ដ៏ស្រស់ស្អាតនៅចំកណ្តាល។
ប្រជាជននៅទីនោះនៅតែប្រកាន់ខ្ជាប់ការរស់នៅតាមបែបទំនៀមទម្លាប់ ប្រពៃណីបុរាណរបស់ជនជាតិចិន រួមទាំងស្ថាបត្យកម្មបុរាណដែលថែរក្សាបានយ៉ាងល្អ មានផ្ទះប្រពៃណី Tujia (ទម្រង់ផ្ទះលក្ខណៈដំបូលឈើ ជញ្ជាំងថ្ម និងមានចម្លាក់ដ៏ស្មុគស្មាញ) ។ ដូច្នេះហើយ ភ្ញៀវទេសចរអាចស្វែងយល់អំពីការពិតនៃជនជាតិចិនរស់នៅក្នុងសម័យដើម ជាពិសេសវាបាននៅរក្សាទម្រង់វប្បធម៌ដូចដើមទាំងអស់។
កន្លែងដែលទាក់ទាញដ៏មានភានល្បីល្បាញបំផុតនៅក្នុងទីក្រុងបុរាណ Furong គឺទឹកជ្រោះ Wangcun វាបានច្រានចលនាទឹកជ្រោះធ្លាក់ចូលទៅក្នុងទន្លេ Tuojiang នៅច្រកចូលនៃទីក្រុងមួយនេះ។
ភ្ញៀវទេសចរអាចចាប់ផ្តើមដំណើរកំសាន្តវិស្សមកាលទៅកាន់ “ទីក្រុងFurong” នៅចន្លោះចាប់ពីខែឧសភា ដល់ខែតុលា ព្រោះក្នុងអំឡុងខែនេះគឺជារដូវវស្សា ដោយនៅពេលភ្លៀងធ្លាក់ ទឹកជ្រោះបានរំលេចសម្រស់នៃទឹកធ្លាក់អមជាមួយសន្សើមទុំលើព្រៃប្រឺក្សា ពិតជាស្រស់ស្អាតណាស់!
