ខ្មែរ
English
ចាប់ផ្តើមតាំងពីព្រឹកថ្ងៃទី១៤ ខែធ្នូ ឆ្នាំ២០២៣ មក ព្រឹត្តិការណ៍ពិព័រណ៍សៀវភៅកម្ពុជា លើកទី១០ ឆ្នាំ២០២៣ បានបង្កើនចំណាប់អារម្មណ៍ក៏ដូចជាទាក់ទាញ យុវជន និងកុមារចូលទស្សនា និងទិញយ៉ាងច្រើនកុះករ ដែលនេះបង្ហាញ ថាយុវជន និងកុមារកម្ពុជា បានកំពុងងាកមករកការអានកាន់តែច្រើន។
ព្រឹត្តិការណ៍ពិព័រណ៍សៀវភៅដ៏ធំនាឆ្នាំនេះ នឹងធ្វើឡើងក្នុងរយ:ពេល ៤ថ្ងៃ គឺចាប់ពីថ្ងៃទី១៤ រហូតដល់ថ្ងៃទី១៧ ខែធ្នូ ឆ្នាំ២០២៣ ដែលមានស្តង់ពិព័រណ៍សៀវភៅប្រមាណជា ៣០០ស្តង់ បានដាក់បង្ហាញសៀវភៅជាច្រើនម៉ឺនក្បាល មានការចូលរួមពីគ្រឹះស្ថានបោះពុម្ពផ្សាយ បណ្ណាគារនានា និងអ្នកនិពន្ធល្បីៗជាច្រើន រហូតដល់ ១៥២ ស្ថាប័ន នឹងដាក់លក់ក្នុងតម្លៃពិសេសដើម្បីលើកទឹកចិត្តដល់អ្នកអានថែមទៀតផង។
បើតាមការប្រកាសពីផេកពិព័រណ៍សៀវភៅ ចំនួនអ្នកទស្សនានៅថ្ងៃទី១ មានរហូតដល់ ២៤,៥០០នាក់ នេះបង្ហាញថា សន្ទុះអ្នកចូលចិត្តអាននៅប្រទេសយើងកាន់តែមានការកើនឡើងហើយ។ គួរបញ្ជាក់ថា អំណាន គឺជាមូលដ្ឋានគ្រឹះ នៃការសិក្សាដែលត្រូវតែបណ្ដុះតាំងពីវ័យក្មេង ជាបុព្វហេតុឲ្យក្រសួងអប់រំ យុវជន និងកីឡា រៀបចំកញ្ចប់អំណានដំបូង បានប្រមូលផ្តុំវិធីសាស្ត្រអំណាន ក៏ដូចជា រៀបចំជាសៀវភៅ និងបណ្ណាល័យដែលមានសៀវភៅ ៦កម្រិត ចាប់ពីថ្នាក់ទី៤ ដល់ថ្នាក់ទី៦ ដើម្បីបង្រៀនកុមារឲ្យមានមូលដ្ឋានគ្រឹះរឹងមាំ ក្នុងការអានឈានទៅចាប់យកចំណេះដឹងជាច្រើនទៀត។ ព្រឹត្តិការណ៍ពិព័រណ៍សៀវភៅ នឹងក្លាយជាជម្រុកវប្បធម៌មួយ សម្រាប់លើកកម្ពស់ការតែងនិពន្ធ និងការអាន ក្នុងយុគសម័យថ្មីសតវត្សទី២១នេះ។ បន្ថែមពីលើនោះទៀត អ្នកចូលរួមអាចមកទិញសៀវភៅផង ជួបជាមួយអ្នកនិពន្ធផ្ទាល់ ជាវវត្ថុអនុស្សាវរីយ៍ជាមួយនឹងក្រុមការងារ និងបានថតរូបលេងកម្សាន្តផងដែរ។ នៅសល់មួយថ្ងៃទៀតប៉ុណ្ណោះ សម្រាប់ព្រឹត្តិការណ៍ពិព័រណ៍សៀវភៅកម្ពុជា លើកទី១០ កុំភ្លេចចូលរួមទាំងអស់គ្នាណា!!!
