មានបញ្ហាសក់ស្តើងមែនទេ? សូមកុំធ្វើរឿងទាំងនេះបន្តទៀត បើមិនចង់ឱ្យខ្លួនទំពែកទាន់

មនុស្សម្នាក់ៗមានប្រភេទសរសៃសក់ខុសៗគ្នា ទៅតាមអរម៉ូននៃសុខុមាលភាពរៀងៗខ្លួន​ន។ អ្នកខ្លះមានសក់ក្រាស់ អ្នកខ្លះទៀតមានសក់ស្តើង និងសក់សំពោង ឬសក់រួញ ប៉ុន្តែប្រភេទសរសៃសក់ដែលពិបាកមើលថែទាំជាងគេ គឺសក់ស្តើង និងបែកចុង។ មូលហេតុដែលបណ្តាលឱ្យសក់ស្តើងរួមកត្តាមួយចំនួនដូចជា កង្វះជាតិប្រូតេអ៊ីន ប្រើប្រាស់សាប៊ូខុស ទម្លាប់ប្រចាំថ្ងៃ និង មិនយកចិត្តទុកដាក់ក្នុងការថែរក្សាសុខភាពសរសៃសក់។

នេះជាដំណឹងល្អចំពោះអ្នកដែលមានបញ្ហាសក់ស្តើង ឡេឌីស៍ នឹងបើកបង្ហាញជូននូវគន្លឹះខ្លះៗក្នុងការថែទាំសក់ប្រភេទនេះប្រកបដោយប្រសិទ្ធិភាព ៖​

ការកក់សក់

ការជ្រើសរើសសាប៊ូកក់សក់ គឺជារឿងសំខាន់បំផុត។ សូមជ្រើសរើសសាប៊ូដែលត្រូវជាមួយស្បែកក្បាល​ និងសរសៃសក់ដើម្បីប្រើប្រាស់ឱ្យសមស្របនឹងស្បែកក្បាលរបស់អ្នកទទួលយកវា។ នៅពេលដែលអ្នកក់សក់ សូមកុំកក់ញីសក់ខ្លាំងៗពេក ព្រោះវាងាយបណ្តាលឱ្យសរសៃសក់ជ្រុះ និងទាក់រមូលចូលគ្នា អាចធ្វើឱ្យដាច់សក់ និងធ្វើឲ្យសក់កាន់តែស្តើងទៅៗ។

ការផ្លុំសក់

បន្ទាប់ពីការកក់សក់រួច អ្នកអាចផ្លុំសក់នៅក្នុងសីតុណ្ហភាពដែលសមរម្យ ចៀសវាងការដាក់កម្រិតខ្យល់ក្តៅខ្លាំងពេក ព្រោះអាចនឹងធ្វើឱ្យរលាកស្បែកក្បាល (គល់សរសៃសក់) ដោយសារតែសក់មានសភាពស្តើង។

ប្រើប្រាស់ស្រោមខ្នើយសូត្រ

ប្រសិនបើអ្នកជាមនុស្សមានសក់ស្តើង ពិតប្រាកដណាស់អ្នកគួរតែប្រើប្រាស់នូវប្រភេទស្រោមខ្នើយសូត្រ ព្រោះវាមានអត្ថប្រយោជន៍ជាច្រើនដល់សុខភាពសក់ដែលស្តើង។ ស្រោមខ្នើយសូត្រគឺមាន “ភាពរលោងនៃ Satin អាចកាត់បន្ថយពីការកកិតសរសៃសក់ ហើយវាភ្ជាប់មកជាមួយខ្នើយកប្បាស” ។

កាត់បន្ថយការលេងស្ទាយល៍ម៉ូតសក់

សរសៃសក់ស្តើង ពិតជាមិនអាចទ្រាំទ្រនឹង កម្តៅនៃការអ៊ុត ឬកៀបសក់ខ្លាំងពេកឡើយ ជាពិសេសសារធាតុគីមីនៅក្នុងស្រ្ពៃយ៍បាញ់សក់ សូមព្យាយាមកាត់បន្ថយរឿងទាំងនេះ ប្រសិនបើអ្នកមិនចង់ទំពែក។

លើសពីនេះ អ្នកគួរតែទទួលទាននូវបន្លែ ផ្លែឈើដែលសម្បូរទៅដោយវីតាមីនជាច្រើនដើម្បីជំនួយស្បែកក្បាល និងសរសៃសក់ឱ្យកាន់តែមានភាពរឹងមាំ និងសុខភាពល្អ។

ទឹកកិនចេញពីបន្លែ

ការពិសាទឹកការ៉ុត គឺជាវិធីព្យាបាលបែបធម្មជាតិដ៏មានប្រសិទ្ធភាពមួយប្រភេទ ដើម្បីព្យាបាលសក់ស្តើង។ ម្យ៉ាងទៀត អ្នកក៏អាចពិសាទឹកផ្ទីស្រស់ផងដែរ ដើម្បីព្យាបាលសក់ស្តើងនេះ។