ម៉ូតច្នៃពីក្រមាខ្មែរ មាន សូនីតា ត្រូវ​ប្រព័ន្ធផ្សព្វផ្សាយអឺរ៉ុបផ្សាយព្រោងព្រាត

បេសកកម្ម​ផ្សព្វផ្សាយសិល្បៈវប្បធម៌ខ្មែរនៅទីក្រុងកានរបស់ មាន សូនីតា ទទួលផ្លែផ្កាល្អដោយ​មានសារព័ត៌មានធំៗនៅអឺរ៉ុបចុះផ្សាយព្រោងព្រាត។

ម្សិលមិញនេះ មាន សូនីតា បានបង្កការចាប់អារម្មណ៍យ៉ាងខ្លាំងនៅក្នុងកម្មវិធីមហោស្រព​ភាពយន្តទីក្រុងកានលើកទី ៧៧ ជាមួយសំលៀកបំពាក់រ៉ូបដ៏វែងមួយឈុតច្នៃចេញពីក្រមាខ្មែរ នៅក្រោម​កាណុងកាមេរ៉ាអ្នកក្រុមអ្នកថតរូបអាជីព​កម្រិតពិភព​លោកជាច្រើន។

 

ប្រិយមិត្តលើបណ្ដាញសង្គម បានកើតមានមោទកភាពចំពោះកិច្ចខិតខំរបស់នាង ស្រប​ពេល​ពិភព​លោកក៏កំពុងសម្លឹងមើលនាងដែរ។ តាមសាមីខ្លួនរបស់តារាស្រី បាន​អោយដឹង​ថា បេសកកម្មរបស់នាង ត្រូវបានចុះផ្សាយដោយសារព័ត៌មានធំៗនៅអឺរ៉ុប មាន Dailymailរបស់ចក្រភពអង់គ្លេស និង Nicematin របស់បារាំង។

 

ទាំងនេះ បានធ្វើអោយរាជនីក្រមា មានការភ្ញាក់ផ្អើល និងមិននឹកស្មានថា សារព័ត៌មានធំៗទាំងនោះស្គាល់នាងឡើយ។ សូនីតា ថ្លែងថា “OMG សំខាន់ពត៌មានចុះគ្រប់ទំព័រហើយដឹងចុះច្បាស់ៗសាហាវ”​។

រូបភាព៖ gettyimages

សារព័ត៌មាន Dailymail របស់​ចក្រភព​អង់គ្លេស បានចុះផ្សាយរូបថតរបស់ មាន សូនីតា នៅក្នុងអត្ថបទមួយដែលនិយាយពីគូស្វាមីវ័យចំណាស់មួយគូរបស់អង់គ្លេស។ ដោយឡែក nicematin របស់បារាំង បានរាយការណ៍​ផ្ទាល់ពី រាជនីក្រមា ដោយចាប់ផ្ដើមជាមួយចំណងជើងអត្ថបទរបស់គេថា “ដឹងស្គាល់ទេថា សិល្បករដែលដើរកម្រាលព្រំក្រហមជាមួយរ៉ូបដ៏វែងជាងជានរណា?

 

សារព័ត៌មានប្រចាំតំបន់របស់បារាំង បានពិព័រណ៌នាថា អ្នកដែលស្លៀកឈុតវែងជាងគេនេះ គឺ មាន សូនីតា មកពីកម្ពុជា។ “និយាយដោយស្មោះត្រង់ មាន សូនីតា ជា​សិល្បការិនីពីកម្ពុជា នាងបាន​មកដល់លើកម្រាលព្រំក្រហមជាមួយសំលៀកបំពាក់តំណាងអោយប្រទេសរបស់ខ្លួន ហើយវាជាស្នាដៃដ៏គួរអោយកត់សម្គាល់មួយ!”។

 

តាមដំណឹង បន្ទាប់ពីបានធ្វើអោយមានការចាប់អារម្មណ៍លើឈុតក្រមាខ្មែរ មាន សូនីតា ត្រៀមនឹងបង្ហាញឈុតទី២ទៀត​របស់​នាង​នៅ​រសៀល​នេះ៕