កាលពីថ្ងៃទី 23 រហូតដល់ថ្ងៃទី 25 ខែកុម្ភៈ ឆ្នាំ 2025 កម្ពុជា និងចិនបានប្រារព្ធពិធីបិទបញ្ចប់យុទ្ធនាការ “ឆ្នាំនៃការផ្លាស់ប្តូរប្រជាជន និងប្រជាជន កម្ពុជា-ចិន 2024” ដោយប្រព្រឹត្តឡើងនៅទីក្រុង Zhengzhou ខេត្ត Henan ប្រទេសចិន នឹងដោយចាប់ផ្តើមព្រឹត្តិការណ៍មួយផ្សេងទៀត ដើម្បីជម្រុញការទាក់ទាញភ្ញៀវទេសចរចិនមកកាន់កម្ពុជានៅឆ្នាំ 2025។
នៅក្នុងឆ្នាំ 2024 កន្លងទៅ មានភ្ញៀវទេសចរចិនប្រមាណជាង 84 ម៉ឺននាក់បានមកទស្សនកិច្ចកម្សាន្តកម្ពុជា ពោលគឺជាប់លំដាប់ទី 3 នៃចំនួនភ្ញៀវទេសចរអន្តរជាតិសរុប 6,7 លាននាក់ ដែលមកកាន់ប្រទេសកម្ពុជា បន្ទាប់ពីភ្ញៀវទេសចរថៃ និងវៀតណាម។
ក្នុងចំណោមភ្ញៀវទេចរអន្តរជាតិសរុបចំនួន 6,7 លាននាក់ដែលមកកម្ពុជាក្នុងឆ្នាំ 2024 ឃើញថា ចំនួនទេសចរចិនមិនបានឈរនៅលំដាប់ទី 1 ដូចមុនពេលមានជំងឺកូវីដ 19 ឡើយ ក៏ប៉ុន្តែលោករដ្ឋមន្ត្រីក្រសួងទេសចរណ៍កម្ពុជា ហួត ហាក់ បានលើកឡើងថា កំណើននៃភ្ញៀវទេសចរចិន គឺជាឱកាសដ៏សំខាន់មួយដែលមិនត្រឹមតែជម្រុញការអភិវឌ្ឍឧស្សាហកម្មទេសចរណ៍ប៉ុណ្ណោះទេ… ថែមទាំងបង្កើតនូវឱកាសជាច្រើនលើការវិនិយោគក្នុងវិស័យផ្សេងៗទៀតដែរ។
ព្រឹត្តិការណ៍នេះបានបង្ហាញពីសក្តានុពលនៃ សិល្បៈ វប្បធម៌ និងទេសចរណ៍ដ៏សម្បូរបែបរបស់ប្រទេសកម្ពុជាឱ្យកាន់តែទូលំទូលាយទៅកាន់ទីផ្សារអន្តរជាតិ ជាពិសេសទៅកាន់ទីផ្សារប្រទេសចិនផ្ទាល់តែម្តង។

វាបានផ្តល់នូវឱកាសដើម្បីភ្ជាប់ និងពង្រីកទំនាក់ទំនងរវាងប្រជាជន និងប្រជាជន ពាណិជ្ជកម្ម និងទំនាក់ទំនង ព្រមទាំងពង្រឹងភាពជាដៃគូ និងកិច្ចសហប្រតិបត្តិការ ដើម្បីកសាង “សហគមន៍កម្ពុជា-ចិន ដែលមានជោគវាសនារួមគ្នា”។